ក្តៅៗ! យន្តហោះ Boeing 707 ចុះចតបុកអគារ ស្លាប់មនុស្សយ៉ាងតិច១០នាក់

2019-01-14 08:01:46
ចំនួនមតិ 0 | ចំនួនចែករំលែក 0

ចន្លោះមិនឃើញ

យន្តហោះដឹកទំនិញយោធាមួយគ្រឿង បានធ្លាក់នៅជិតរដ្ឋធានី Tehran នៃប្រទេសអ៊ីរ៉ង់ ជាមួយនឹងមនុស្សយ៉ាងហោចណាស់ ១០នាក់នៅលើនោះ នាថ្ងៃច័ន្ទ ទី១៤ ខែមករា ឆ្នាំ២០១៩ នេះ។

ភ្នាក់ងារព័ត៌មាន Fars ដែលជិតស្និទ្ធនឹងកងទ័ពអ៊ីរ៉ង់ បានឲ្យដឹងថា មានមនុស្ស ១៦នាក់នៅលើយន្តហោះ ហើយមានតែវិស្វករយន្តហោះម្នាក់ប៉ុណ្ណោះដែលបានរួចជីវិតពីហេតុការណ៍ខាងលើ។

អ្នកនាំពាក្យអង្គភាពអាកាសចរណ៍របស់ប្រទេសអ៊ីរ៉ង់ លោក Reza Jafarzadeh បានប្រាប់ទូរទស្សន៍ IRIB ថា «វាគឺជាយន្តហោះដឹកទំនិញយោធា ប្រភេទ Boeing 707 ដែលបានជួបគ្រោះថ្នាក់នៅពេលចុះចត»។

ភ្នាក់ងារសារព័ត៌មាន Tasnim បាននិយាយថា យន្តហោះខាងលើបានដឹកសាច់ពីទីក្រុង Bishkek របស់ប្រទេសកៀគីស៊ីស្ថាន (Kyrgyzstan)។ ជាមួយគ្នានេះ ទូរទស្សន៍ IRIB បានអះអាងបញ្ជាក់ថា យន្តហោះបានបុកជាមួយអគារមួយខ្នង បន្ទាប់ពីអ្នកបើកយន្តហោះជ្រើសផ្លូវរត់ខុស ខណៈព្យាយាមចុះចតនៅព្រលានយន្តហោះ Fath ក្នុងខេត្ត Alborz ភាគលិចទីក្រុង Tehran៕