ទូរទស្សន៍ CW ត្រៀមចេញរឿងអាមេរិកយកលំនាំតាម "Strong Woman Do Bong Soon”

2019-01-15 03:15:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រិយមិត្តភាគច្រើន ប្រាកដជាចាំរឿងភាគកូរ៉េដ៏ល្បី ដែលមានចំណងជើងថា "Strong Woman Do Bong Soon”។ ភាពយន្តនេះដែរ ចូលរួមសម្ដែងជាពិសេសពីសំណាក់តារាស្រីដ៏ល្បី Park Bo Young ដែលនាងដើរតួជា Do Bong Soon មនុស្សស្រីដែលមើលទៅតួចល្អិត ប៉ុន្តែនាងមានកម្លាំងខ្លាំងក្លាខុសពីមនុស្សធម្មតា។

នៅពេលនេះ ខាងទូរទស្សន៍ផ្សព្វផ្សាយរបស់សហរដ្ឋអាមេរិក The CW នឹងបង្កើតរឿងថ្មីមួយសម្រាប់ទស្សនិកជនសញ្ជាតិអាមេរិក។ រឿងថ្មីនោះ ពួកគេនឹងយកលំនាំតាមភាពយន្តភាគកូរ៉េមួយនេះ ដោយកាត់ចំណងជើងក្ដីជាងរឿងដើម ដោយមកនៅត្រឹម "Strong Girl”។

រឿងអាមេរិកនេះដែរ បានធ្វើការផ្លាស់ប្ដូរសាច់រឿងមួយចំនួន។ ក្នុងរឿងភាគកូរ៉េ Do Bong Soon ជាអ្នកឌីហ្សាញហ្គេមមួយដែលតារាសម្ដែង Park Hyung Sik ជ្រើសជាគំរូតួអង្គហ្គេម ក្រោយលោករកឃើញថានាងមានកម្លាំងថាមពលខុសពីមនុស្សធម្មតា។ លោកបានជួលនាងឲ្យធ្វើជាអង្គរក្សផ្ទាល់ខ្លួន ដោយក្រោយមកក៏បានបាក់ចិត្តស្រឡាញ់គ្នា។

ក្នុងរឿងបែបអាមេរិកវិញនេះ សាច់រឿងរៀបរាប់ពីអតីតអ្នកថតរូបម្នាក់មានឈ្មោះថា Rayna ដែលបានរកឃើញថារូបនាងមានថាមពលអស្ចារ្យក្នុងខ្លួន។ ក្រោយបែកបាក់ស្នេហាជាមួយគូដណ្ដឹងនាង នៅពេលគូស្នេហ៍នាងមិនអាចទ្រាំទ្រកម្លាំងមហិមារបស់នាងបាន Rayna ត្រូវបានជួលឲ្យធ្វើជាអង្គរក្សរបស់មហាសេដ្ឋីម្នាក់ឈ្មោះ Oliver។

ខ្សែភាពយន្តរឿង "Strong Girl” នេះ បានផលិតឡើងដោយផលិតករ Ronda Rousey ដែលធ្លាប់ជាកីឡាការិនីប្រដាល់ អ្នកកីឡាកាស និងជាតារាសម្ដែងផងដែរនោះ រួមសហការគ្នាជាមួយលោក Ben Silverman ប្រតិបត្តិផលិតករនៃកម្មវិធីទូរទស្សន៍ដ៏ល្បី "Jane The Virgin”។ គួរបញ្ជាក់ដែរថា ចំពោះពេលវេលាចាក់បញ្ចាំង និងព័ត៌មានលម្អិតជុំវិញតួអង្គសម្ដែងសម្រាប់ភាពយន្តថ្មីមួយនេះ នៅមិនទាន់បានបង្ហាញនៅឡើយទេ៕

ប្រភព៖ Koreaboo ប្រែសម្រួល៖ អន សុភក្ត្រា