ច្បាស់ខ្លួនឯងមាន ៧ចំណុចនេះចង់ទាក់ទងអ្នកណាក៏ជោគជ័យដែរ

2019-01-16 02:14:05
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងសង្គម មិនថាជាការងារ ឬ ជីវិតឯកជនឡើយ របៀបប្រាស្រ័យទាក់ទងដ៏ល្អ និងមានប្រសិទ្ធភាព ពិតជាចាំបាច់ ដើម្បីជួយឲ្យជីវិតអ្នកកាន់តែងាយស្រួល និង សម្រេចការកាន់តែធំ។ របៀបទំនាក់ទំនងដែលល្អ គឺត្រូវមានភាពបត់បែនឲ្យសមស្របនឹងពេលវេលា ទីកន្លែង និងស្ថានភាព ខណៈក្នុងនោះភាពស្មោះត្រង់ អំណត់ និងការយោគយល់ក៏ត្រូវតែមានដូចគ្នា។

ដើម្បីឲ្យយុទ្ធសាស្ត្រទំនាក់ទំនងកាន់តែមានប្រសិទ្ធភាព ដាច់ខាតមិនអាចខ្វះចំណុចទាំង ៧នេះជាមូលដ្ឋានបានឡើយ ដូចជា៖

១. កំណត់ឲ្យច្បាស់ពីគោលដៅនៃការទំនាក់ទំនង៖ និយាយឲ្យសាមញ្ញមានន័យថា ហេតុអ្វីអ្នកត្រូវប្រាស្រ័យទាក់ទងម្នាក់នោះ ដើម្បីស៊ីបសួរបានព័ត៌មាន ឬ ក៏គ្រាន់តែការគួរសមដើម្បីបង្កើតបណ្ដាញសង្គម។ ដឹងច្បាស់ពីអ្វីដែលខ្លួនចង់បានពីទំនាក់ទំនង អាចឲ្យអ្នកធ្វើសកម្មភាពបានត្រឹមត្រូវ។

២. រៀបឫកពារ ឬ កាយវិការឲ្យបានសមរម្យ ៖ កាយវិការ របៀបដែលអ្នកឈរ ទឹកមុខ ក្រសែភ្នែក ទាំងអស់នេះហើយ នឹងផ្ញើសារដំបូងទៅកាន់មនុស្សជុំវិញខ្លួនអ្នក អំពីអ្នក។ ការរៀបចំខ្លួនឲ្យបានសមរម្យ និងមានរបៀបគ្រប់ពេលវេលា ក៏ជាការបង្ហាញពីការគោរពចំពោះខ្លួនឯងដែរ មុនអ្នកទទួលបានការគោរពរាប់អានពីអ្នកដទៃ។

៣. ផ្តល់ការគោរពចំពោះបុគ្គលដែលអ្នកកំពុងប្រាស្រ័យទាក់ទង ៖ មានការគោរពចំពោះគ្នា នឹងជួយឲ្យការបង្កើតទំនាក់ទំនងមានប្រសិទ្ធភាព និងច្បាស់លាស់។

(រូបតំណាង)

**៤. មានភាពជឿជាក់លើតម្លៃខ្លួនឯង** ៖ រក្សាការគិតជាវិជ្ជមានចំពោះគ្រប់គ្នាក្នុងជីវិតរបស់អ្នក បើទោះពេលខ្លះ មនុស្សមួយចំនួនអាចមើលងាយអ្នកដោយសារអ្នកមិនបានស្លៀកពាក់ហ៊ឺហារ ប្រើសម្ភារថ្លៃៗ ឬ ជិះរថយន្តទំនើបដូចគេក្តី នោះជាបញ្ហារបស់គេ វាមិនធ្វើឲ្យតម្លៃអ្នកបាត់បង់ឡើយ។

៥. ស្តាប់ឲ្យបានច្រើន និងយល់ឲ្យបានស៊ីជម្រៅ ៖ រាល់ការចែករំលែករបស់អ្នកដទៃតែងផ្តល់ព័ត៌មានអ្វីមួយដល់អ្នកមិនខាន។ការចំណាយពេលស្តាប់ឲ្យបានច្រើន មានន័យថាអ្នកក៏បានអង្កេតមើលអ្នកដែលកំពុងនិយាយនោះបានគ្រប់ជ្រុងជ្រោយ ទាំងកាយវិការ និងក្រសែភ្នែក ដែលទម្លាប់បែបនេះនឹងធ្វើឲ្យអ្នកមានអាចឆ្លុះបញ្ចាំងពីខ្លួនឯង ហើយជួយអភិវឌ្ឍជំនាញទំនាក់ទំនងរបស់អ្នកកាន់តែប្រសើរ។

៦. មានសិល្បៈនៃការនិយាយ ៖ ដាច់ខាត កុំនិយាយច្រើនឲ្យសោះ ត្រូវនិយាយខ្លី ខ្លឹម និងច្បាស់ៗ។ សិល្បៈនៃការនិយាយនេះ មិនសំដៅលើតែការប្រើពាក្យពេចន៍ ត្រឹមត្រូវ ថ្លៃថ្នូរ ចេះលើដាក់សម្លេងឲ្យត្រូវតាមស្ថានការណ៍ប៉ុណ្ណោះទេ វាក៏មានន័យថាអ្នកអាចដឹងថាអ្វីគួរ និងមិនគួរនិយាយផងដែរ។

គ្រប់គ្នាអាចក្លាយជាមនុស្សដែលមានសិល្បៈនៃការនិយាយបាន ដោយការប្រឹងប្រែងហ្វឹកហាត់ខ្លួនឯងជារឿយៗ នៅមុខកញ្ចក់ រៀនត្រាប់តាម ឬរៀនពីទម្លាប់អ្នកដែលធ្វើបានល្អ និង ប្រមូលចំណេះដឹង ឬព័ត៌មានដោយការអានសៀវភៅឲ្យបានច្រើនជាដើម ៕