សមាគមសហគ្រិនវ័យក្មេងកម្ពុជា បូកសរុបលទ្ធផលការងារប្រចាំឆ្នាំ ២០១៨ និងលើកទិសដៅឆ្នាំថ្មី

2019-01-16 08:27:25
ចំនួនមតិ 0 | ចំនួនចែករំលែក 0

ចន្លោះមិនឃើញ

សមាគមសហគ្រិនវ័យក្មេងកម្ពុជា បានបូកសរុបលទ្ធផលការងារប្រចាំឆ្នាំ ២០១៨ និងការស្វែងរកការប្រឈម ដើម្បីដោះស្រាយធ្វើយ៉ាងណាឲ្យសម្រេចបានតាមផែនការយុទ្ធសាស្ត្រនៅឆ្នាំ ២០២១។

នៅឯពិធីលៀងសាយភោជន នៃសន្និបាតបូកសរុបលទ្ធផលការងារប្រចាំឆ្នាំ ២០១៨ ឧកញ៉ា គួច ផេង ប្រធានសមាគមសហគ្រិនវ័យក្មេងកម្ពុជា បានថ្លែងតាមរយៈសន្ទរកថា កាលពីពេលថ្មីៗនេះ បានឲ្យដឹងថា ឆ្នាំ២០១៨ គឺជាឆ្នាំទី២ នៃផែនការយុទ្ធសាស្ត្រ ៥ឆ្នាំ ២០១៧-២០២១ របស់សមាគមសហគ្រិនវ័យក្មេងកម្ពុជា។

(លោក គួច ផេង និង ឯកឧត្តម ចមប្រសិទ្ធ រដ្ឋមន្ត្រីក្រសួង ឧស្សាហកម្ម និង សិប្បកម្ម កាលពីពេលកន្លងទៅ)

ផែនការយុទ្ធសាស្ត្រ ៥ឆ្នាំ បានផ្ដោតលើសកម្មភាពគោលចំនួន ៦ ដូចខាងក្រោម៖

១. បង្កើនលទ្ធភាពទទួលបានហិរញ្ញប្បទានសម្រាប់សហគ្រាសធុនតូច និងមធ្យម ២. បង្កើនផលិតភាព និងទំនើបកម្មនៃសហគ្រាសធុនតូ និងមធ្យម ៣. ពង្រឹង និងជំរុញឲ្យមានកម្លាំងពលកម្មជំនាញ ៤. គោលនយោបាយអនុគ្រោះដល់សហគ្រាសធុនតូច និងមធ្យម ៥. ការជ្រៀងចូលទីផ្សារក្នុងតំបន់ ៦. ការរីកចម្រើន និងនិរន្តភាពរបស់សមាគម

ក្រោយពីបូកសរុបការងារប្រចាំឆ្នាំ២០១៨ របស់សមាគម ជាលទ្ធផលនៅក្នុងអំឡុងពេល១ឆ្នាំកន្លងមកនេះ ដោយមានការតម្រង់ទិសពីក្រុមប្រឹក្សាភិបាល ពីប្រធាន អនុប្រធានសមាគម គណៈកម្មាធិការ លេខាធិការដ្ឋាន នៃសមាគមសហគ្រិនវ័យក្មេងកម្ពុជាបានធ្វើការសម្របសម្រួល និងអនុវត្តសកម្មភាពទៅតាមផែនការគោល និងសម្រេចបាននូវលទ្ធផលដូចខាងក្រោម៖

បានពង្រីកសមាគមបន្ថែមទៅកាន់ខេត្តកំពង់ចាម បាត់ដំបង និងទៅខេត្តបន្ទាយមានជ័យ
បានរៀបចំវគ្គបណ្ដុះបណ្ដាលគ្រូបង្គោលក្នុងក្រុមហ៊ុនចំនួន ២វគ្គ
បានរៀបចំវគ្គបណ្ដុះបណ្ដាល KPI in Performance Management ដើម្បីបង្កើនប្រសិទ្ធិភាពក្នុងការគ្រប់គ្រង និងស្វែងយល់ពីការផ្លាស់ប្ដូរអាកប្បកិរិយារបស់មនុស្ស។
បានរៀបចំប្រជុំ CEO Lunch ចំនួន៦លើក
បានរៀបចំវេទិកាសប្ដាហ៍សហគ្រិនសកលលើប្រធានបទ ស្ត្រី និងយុវជនក្នុងសហគ្រិនភាព និងសេដ្ឋកិច្ចឌីជីថល ដោយសហការជាមួយសាខានៅខេត្តសៀមរាប ដោយមានអ្នកចូលរួមជិត ៦០០ នាក់។
បានចូលរួមប្រជុំពិគ្រោះយោបល់លើគោលនយោបាយជាតិស្ដីពី ប្រាក់បំណាច់អតីតភាពជាមួយក្រសួងការងារ និងបណ្ដុះបណ្ដាលវិជ្ជាជីវៈ សភាពាណិជ្ជកម្មកម្ពុជា សភាពពាណិជ្ជកម្មអន្តរជាតិ តំណាងសមាគម និងសហព័ន្ធពាណិជ្ជកម្មនានាក្នុងប្រទេស។
បានចូលរួមប្រជុំពិភាក្សាជាមួយក្រសួងសេដ្ឋកិច្ច និងជាសមាជិកក្នុងក្រុមការងារជាមួយសភាពាណិជ្ជកម្មកម្ពុជា នាយកដ្ឋានពន្ធដារ គយ និងរដ្ឋាករ ទាក់ទងនឹងគោលនយោបាយអនុគ្រោះពន្ធដល់សហគ្រាសធុនតូច និងមធ្យម (ចំណុចទី៤ នៃផែនការយុទ្ធសាស្ត្រ)
ការបណ្ដុះបណ្ដាល និងទំនាក់ទំនងរវាងសមាគមសហគ្រិនវ័យក្មេងកម្ពុជា និងសមាគមសហគ្រិន វ័យក្មេងក្នុងតំបន់អាស៊ាន ចិន ជប៉ុន អូស្ត្រាលី និងបន្តពង្រីកសមាជិកភាពទាំងក្នុងទីក្រុងភ្នំពេញ និងបណ្ដាញខេត្តសំខាន់ៗដូចជាខេត្តសៀមរាប កំពង់ចាម និងបាត់ដំបង ដែលយើងនឹងគ្រោងបង្កើនសមាជិករហូតដល់ ៥០០ ទូទាំងប្រទេសក្នុងឆ្នាំ ២០២១។
បាននឹងកំពុងរៀបចំធ្វើសៀវភៅមគ្គទេសក៍វិនិយោគ Siem Reap and Kampong Cham Investment Guidebook
បានរៀបចំពិគ្រោះយោបល់ជាមួយក្រសួងសេដ្ឋកិច្ច និងហិរញ្ញវត្ថុក្នុងការបង្កើត Entrepreneurs Promotion Center និងក្រសួងបានចេញនូវសេចក្ដីណែនាំពីការលើកលែងពន្ធក្នុងវិស័យអាទិភាព។

ឧកញ៉ា គួច ផេង បានបន្តទៀតថា ការសម្រេចបានមកដល់ពេលនេះ របស់សមាគម គឺជាកេរ្តិ៍ស្នាដៃបន្តពីអតីតប្រធាន និងស្ថាបនិកសមាគមសហគ្រិនវ័យក្មេងកន្លងទៅ និងរៀមច្បងទាំងអស់ដែលជាអតីតក្រុមប្រឹក្សាភិបាល និងសមាជិកទាំងអស់ ដែលបាននាំនូវសមិទ្ធផលជាច្រើនដល់សមាគមដូចជា៖

កិច្ចសហប្រតិបត្តិការជាមួយគម្រោង MBI របស់ធនាគារអភិវឌ្ឍន៍អាស៊ី (ADB) ក្នុងការបង្កើតឲ្យមាននូវមជ្ឈមណ្ឌលសេវាកម្មអាជីវកម្ម Business Information Center។
កិច្ចសហប្រតិបត្តិការ ជាមួយកម្មវិធីអង្គការសហប្រជាជាតិ
កិច្ចសហប្រតិបត្តិការជាមួយ JCI Cambodia ក្នុងការផ្ដួចផ្ដើមឲ្យមានការកម្មវិធីពានរង្វាន់សហគ្រិនវ័យក្មេងកម្ពុជា
ការចូលរួមចំណែកយ៉ាងសកម្មជាមួយរាជរដ្ឋាភិបាល ក្នុងការកែតម្រូវគោលនយោបាយមួយចំនួនដើម្បីជាប្រយោជន៍ដល់វិស័យឯកជន។
ការពង្រីកសក្ដានុពលរបស់សមាគមទៅតាមតំបន់
ការដឹកនាំសមាគមសហគ្រិនវ័យក្មេងកម្ពុជាទៅឆាកអន្តរជាតិ។

សមាគមសហគ្រិនវ័យក្មេងកម្ពុជា មកដល់ពេលនេះ មានអាយុ១០ឆ្នាំមកហើយ បន្ទាប់ពីបង្កើតឡើង នៅអំឡុងឆ្នាំ ២០០៩ កន្លងទៅ។ សមាគមនេះបង្កើតឡើងដោយស្ថាបនិកសហគ្រិនវ័យក្មេងកម្ពុជា មួយក្រុម ដែលជាម្ចាស់ក្រុមហ៊ុនអាជីវកម្ម សហគ្រាស មកពីវិស័យផ្សេងៗគ្នា នឹងចង់ក្លាយខ្លួនជាភ្នាក់ងារមួយ ក្នុងការផ្សាភ្ជាប់សហគ្រិនវ័យក្មេងទាំងឡាយ ដើម្បីផ្ទេរចំណេះដឹង និងចំណេះធ្វើ និងទទួលបាននូវឱកាសអាជីវកម្មនៅក្នុងប្រទេសកម្ពុជា ក៏ដូចជាក្នុងតំបន់អាស៊ាន និងពិភពលោក។ បេសកកម្មរបស់សមាគមសហគ្រិនវ័យក្មេងកម្ពុជា YEAC គឺត្រូវដើរតួជាអ្នកចូលរួមមតិយោបល់ ផ្នែកគោលនយោបាយដើម្បីលើកកម្ពស់ផលប្រយោជន៍សហគ្រិនវ័យក្មេងកម្ពុជាជាមួយរាជរដ្ឋាភិបាល ដៃគូអភិវឌ្ឍន៍ សភាពាណិជ្ជកម្មកម្ពុជា និងស្ថាប័ននានាក្នុងតំបន់៕

អត្ថបទ៖ ដៃគូសហការ