បិតា Huawei និយាយថា ក្រុមហ៊ុនមិនបានស៊ើបការណ៍ឲ្យចិននោះទេ

2019-01-17 02:33:07
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីថ្ងៃអង្គារ ស្ថាបនិកក្រុមហ៊ុន Huawei លោក Ren Zhengfei បានច្រានចោលការលើកឡើងដែលថាក្រុមហ៊ុនខ្លួនត្រូវបានប្រើប្រាស់ដោយរដ្ឋាភិបាលចិនសម្រាប់ការស៊ើបការណ៍។ នេះបើតាមការចុះផ្សាយរបស់កាសែត Financial Times។

“Huawei មិនធ្លាប់បានទទួលសំណើពីរដ្ឋាភិបាល ដើម្បីផ្ដល់ព័ត៌មានមិនត្រឹមត្រូវម្ដងណាឡើយ។ ខ្ញុំនៅតែស្រឡាញ់ប្រទេសរបស់ខ្ញុំ ខ្ញុំគាំទ្របក្សកុម្មុយនិស្ត ប៉ុន្តែនឹងមិនធ្វើអ្វីឲ្យប៉ះពាល់ដល់ប្រទេសដទៃឡើយ”។ នេះជាការលើកឡើងរបស់លោក Zhengfei។

Huawei ដែលជាក្រុមហ៊ុនផលិតឧបករណ៍ទូរគមនាគមន៍ធំជាងគេក្នុងលោក រងភាពតានតឹងខ្លាំងពីលោកខាងលិច ដោយសារទំនាក់ទំនងខ្លួនជាមួយរដ្ឋាភិបាលចិន រហូតនាំឲ្យសហរដ្ឋអាមេរិកចោទប្រកាន់ថា ឧបករណ៍របស់ Huawei ត្រូវបានប្រើដោយរដ្ឋាភិបាលប៉េកាំងសម្រាប់ស៊ើបការណ៍។

មិនមានភស្តុតាងច្បាស់លាស់លើការចោទប្រកាន់នេះឡើយ ហើយក្រុមហ៊ុន Huawei តែងតែច្រានចោលលើការចោទប្រកាន់នេះជានិច្ច។ ប៉ុន្តែប្រទេសលោកខាងលិចមួយចំនួនបានរឹតបន្តឹងការចរាចរណ៍ផលិតផល Huawei ក្នុងទីផ្សាររបស់ខ្លួន។

ទាក់ទិនចំណុចនេះ លោក Zhengfei បានលើកឡើងថា ៖ "រឿងបែបនេះតែងតែកើតមានឡើងហើយ គឺយើងមិនអាចធ្វើការជាមួយមនុស្សគ្រប់គ្នាបាននោះទេ...យើងនឹងបង្វែរទិសដៅទៅរកប្រទេសណាដែលស្វាគមន៍ Huawei វិញ”។ លោកបន្ថែមថា Huawei មានកុងត្រាចំនួន ៣០ លើសកលលោក ក្នុងការសាងសង់ប្រព័ន្ធ 5G។

ស្ថាបនិករូបនេះបន្ថែមថា Huawei អាចនឹងរងការប្រកួតប្រជែង និងការលំបាកខ្លាំងលើទីផ្សារអន្តរជាតិ និងនិយាយថាកំណើនរបស់ក្រុមហ៊ុននៅឆ្នាំបន្ទាប់ អាចនឹងមានតិចជាង ២០%៕

ចុចអាន៖

ប្រភព៖ Reuters ប្រែសម្រួល៖ សុខហេង