ស្នាដៃអ្នកនិពន្ធប្រលោមលោក "ទន្សាយ" នៅតែទទួលការគាំទ្រខ្លាំងមិនធម្មតារហូតត្រៀមចេញសៀវភៅថ្មីឆាប់ៗ

2019-01-17 03:03:04
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយចេញស្នាដៃប្រលោមលោកថ្មីចុងក្រោយរបស់អ្នកស្រី ម៉ៅ សំណាង គឺរឿង «ប្រលោមចិត្ត» មានចំនួន ២៦០ ទំព័រដែលនិពន្ធនៅឆ្នាំ ២០១៨ ដែលបោះពុម្ពចំនួន ៣០០០ ក្បាលមកថ្មីៗមិនទាន់បាន១ខែកន្លះស្រួលបួលផងត្រូវប្រិយមិត្តអ្នកគាំទ្របានជាវអស់ជាងពាក់កណ្តាលហើយ ខណៈអ្នកនិពន្ធរូបនេះខាននិពន្ធជិត ១០ ឆ្នាំមកនេះ។ ប្រលោមលោករបស់អ្នកនិពន្ធមានរហស្សនាម «ទន្សាយ» កំពុងតែទទួលបានការគាំទ្រពីប្រិយមិត្តអ្នកអានច្រើន ដោយសារតែការនឹករឭក និងខ្លឹមសារនៃសាច់រឿងពោរពេញដោយការអប់រំក្នុងសង្គមរស់នៅនាពេលបច្ចុប្បន្ន។

អ្នកនិពន្ធមានស្រុកកំណើតនៅខេត្តព្រះសីហនុដែលនិយមចូលចិត្តអានសៀវភៅតាំងពីតូចក៏ព្រោះតែមានឪពុកគឺជាសាស្ត្រាចារ្យអក្សរសាស្ត្រខ្មែរ បានបន្សាំបានផ្តល់ការសម្ភាសន៍មកកាន់ Sabay ថា៖ "អ្នកស្រីបានប្រឡូកនៅក្នុងអាជីពនិពន្ធនាឆ្នាំ ១៩៨០ និងសម្រុកនិពន្ធបាន ១០០ រឿងដែលប្រើពេលត្រឹមតែ ២ ឆ្នាំ។ ហើយស្នាដៃអ្នកស្រីធ្លាប់ជាប់ចំណាត់ថ្នាក់លេខ ១ ពានរង្វាន់ព្រះសីហនុរាជ ឆ្នាំ ១៩៩៥ រឿង «រលកបោកខ្សាច់» លេខ ៥ ពានរង្វាន់ព្រះសីហនុរាជទី ២ ឆ្នាំ ១៩៩៨ រឿង «ពន្លឺចន្ទ» លេខ ២ នៅអង្គការន័រវេស៍សង្គ្រោះកុមារឆ្នាំ ២០០០ រឿង «កម្រងផ្កាម្លិះ» និងចំណាត់ថ្នាក់លេខ ៥ ពានរង្វាន់មហោស្រពអង្គរឆ្នាំ ២០០០ រឿង «ឋានសួគ៌សាងបាប»ផងដែរ។

ពិសេសអ្នកស្រីក៏មានអត្ថបទជ្រើសរើសបកប្រែជាភាសាជប៉ុនឆ្នាំ ២០០១ គឺរឿង «កម្រងផ្កាម្លិះ» និង «សមុទ្រខ្មៅ»។ ជយលាភីលេខ ១ ពានរង្វាន់ទន្លេមេគង្គខ្មែរ-វៀតណាម- ឡាវ ឆ្នាំ ២០១០ រឿង «ចិត្តមួយថ្លើមមួយ» ទទួលគ្រឿងឥស្សរិយយសមុនីសារាភ័ណ្ឌថ្នាក់សេនាពីសម្ដេច ហ៊ុន សែន ក្នុងនាមជាអ្នកនិពន្ធមានស្នាដៃល្អក្នុងការចូលរួមចំណែកលើកស្ទួយនូវអក្សរសិល្ប៍ អក្សរសាស្ត្រ និងវប្បធម៌ជាតិខ្មែរឆ្នាំ ២០០៨។ លើសពីនេះទៅទៀតអ្នកស្រីក៏បានទទួលនូវព្រះរាជប្រទានពីព្រះករុណាព្រះបាទសម្តេច ព្រះបរមនាថ នរោត្តម សីហមុនី នូវគ្រឿងឥស្សរិយយសមុនីសារាភ័ណ្ឌថ្នាក់មហាសេនាកាលពីឆ្នាំ ២០១៤ ទៀតផង។

អ្នកស្រីបន្ថែមថា៖ «ប្រលោមលោកថ្មីខ្ញុំដែលទើបនិពន្ធចប់កាលចន្លោះខែ -៨-៩ ឆ្នាំ ២០១៨ចេញចុងក្រោយ កន្លងមកមាន ២៦០ ទំព័រសាច់រឿងនិយាយពីការលើកទឹកចិត្តទៅដល់មនុស្សគ្រប់ប្រភេទដែលជួបប្រទះនឹងភាពខកបំណងច្រើន ឬយើងហៅថាជំងឺបាក់ទឹកចិត្តនោះឯង។ បើនិយាយឲ្យពិតទៅការខកខាននិពន្ធប្រលោមលោកនារយៈពេលជិត ១ ទសវត្សរ៍នេះក៏ព្រោះតែខ្ញុំខ្វះថវិកាបោះពុម្ពខកចិត្តទៅនឹងភាពពុំផ្តល់តម្លៃពីបរិយាកាសជុំវិញមួយចំនួន និងខ្វះការលើកទឹកចិត្តសម្រាប់អាជីពអ្នកនិពន្ធ ខណៈមុខរបរនេះគឺពុំអាចរកប្រាក់ចំណូលឲ្យក្លាយខ្លួនទៅជាអ្នកមានបាននោះឡើយ»។ ហើយចុងក្រោយអ្នកស្រីសូមផ្តាំផ្ញើរបើមានក្តីស្រមៃចង់ក្លាយជាអ្នកនិពន្ធ ត្រូវទាមទារបទពិសោធន៍ក្នុងការចូលចិត្តអាន និងស្រាវជ្រាវឲ្យបានច្រើនក្នុងការតែងនិពន្ធ អរគុណការគាំំទ្រ &ការផ្តល់កំលាំងចិត្តមកឲ្យអ្នកស្រី ហើយអ្នកស្រីមិនធ្វើឲ្យអ្នកគាំទ្រខកបំណងទេត្រៀមនឹងមានចេញផ្សាយស្នាដៃប្រលោមលោកថ្មីចែកជូនជាបន្តទៀតគឺ រឿង "កុលាបខ្មៅ" នាដើមខែកុម្ភៈក្នុងពេលឆាប់ៗនេះ៕