មកស្គាល់បុរសជប៉ុន អាចផុតជីវិតពីការទម្លាក់គ្រាប់បែកបរមាណូ ២លើកផ្ទួនគ្នា

2019-01-17 08:10:32
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Tsutomu Yamaguchi បានកើតនៅថ្ងៃទី១៦ ខែមីនា ឆ្នាំ១៩១៦ គឺជាអ្នករស់រានមានជីវិតម្នាក់ពីហេតុការណ៍ទម្លាក់គ្រាប់បែកបរមាណូទាំង ២លើក នៅក្នុងទីក្រុង Hiroshima និង Nagasaki នៃប្រទេសជប៉ុន ក្នុងអំឡុងសង្គ្រាមលោកលើកទី២។

លោក Tsutomu Yamaguchi

ថ្វីបើមនុស្សយ៉ាងហោចណាស់ ៧០នាក់បានរងផលប៉ះពាល់ពីហេតុការណ៍នោះក្តី ប៉ុន្តែលោក Tsutomu គឺជាមនុស្សតែម្នាក់គត់ដែលត្រូវបានទទួលស្គាល់ជាផ្លូវការ ដោយរដ្ឋាភិបាលនៃប្រទេសជប៉ុន។

លោក Yamaguchi ដែលជាអ្នករស់នៅក្នុងទីក្រុង Nagasaki បានទៅកាន់ទីក្រុង Hiroshima ដើម្បីធ្វើជំនួញ នៅពេលដែលគ្រាប់បែកបានទម្លាក់មកលើទីក្រុងនៅវេលាម៉ោង ៨ និង ១៥នាទីព្រឹក ថ្ងៃទី០៦ ខែសីហា ឆ្នាំ១៩៤៥។

នៅថ្ងៃបន្ទាប់ លោកបានត្រលប់ទៅកាន់ទីក្រុង Nagasaki វិញ ហើយថ្វីបើលោករងរបួសក្ដី ក៏លោកនៅតែត្រលប់ទៅធ្វើការវិញធម្មតា នៅថ្ងៃទី០៩ ខែសីហា ដែលជាថ្ងៃគ្រាប់បែកបរមាណូទី២ ត្រូវបានទម្លាក់។ នៅព្រឹកនោះ ខណៈពេលដែលអ្នកគ្រប់គ្រងរបស់លោក Yamaguchi កំពុងនិយាយអំពីការទម្លាក់គ្រាប់បែកបំផ្លាញទីក្រុង Hiroshima ស្រាប់តែគ្រាប់បែកមួយទៀតបានផ្ទុះឡើងតែម្ដង នៅក្នុងទីក្រុង Nagasaki។

នៅក្នុងឆ្នាំ១៩៥៧ លោក Yamaguchi ត្រូវបានទទួលស្គាល់ថាជាអ្នករងគ្រោះនៃការទម្លាក់គ្រាប់បែកបរមាណូ ប៉ុន្តែរហូតដល់ថ្ងៃទី២៤ ខែមីនា ឆ្នាំ២០០៩ ទើបរដ្ឋាភិបាលនៃប្រទេសជប៉ុន សម្រេចទទួលស្គាល់លោកជាផ្លូវការ។ លោកបានស្លាប់ដោយសារតែជំងឺមហារីកក្រពះ នៅថ្ងៃទី០៤ ខែមករា ឆ្នាំ២០១០ នៅអាយុ ៩៣ឆ្នាំ៕

ប្រភព៖ Wikipedia ប្រែសម្រួល៖ សេង ឡុង