ទម្លាយឈ្មោះ អាសយដ្ឋាន ក្រុមហ៊ុនចិន ហ៊ានយករូបប្រាសាទអង្គរវត្ត ច្នៃជាគម្របចានបង្គន់

2019-01-18 02:53:24
ចំនួនមតិ 0 | ចំនួនចែករំលែក 0

ចន្លោះមិនឃើញ

តាមលិខិតមួយដែលលោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ ផ្ញើទៅកាន់ឧបនាយករដ្ឋមន្ត្រី រដ្ឋមន្ត្រីក្រសួងការបរទេស បានឲ្យដឹងថា ក្រុមហ៊ុនដែលបង្កើតកម្រាលជើងក្នុងបន្ទប់ទឹក គម្របចានបង្គន់ និងវាំងននងូតទឹក ដែលមានរូបទង់ជាតិកម្ពុជា ប្រាសាទបុរាណ និងរូបភាពសិល្បៈខ្មែរផ្សេងទៀត ជាក្រុមហ៊ុនរបស់ប្រទេសចិន។

ក្រសួងបានបង្ហាញទៀតថា បណ្ដាក្រុមហ៊ុនទាំងនោះ មានឈ្មោះ និងអាសយដ្ឋានដូចជា៖ ក្រុុមហ៊ុន Bestchong (លេខចុះបញ្ជីពាណិជ្ជកម្ម 91120101055262462l និងមានអាសយដ្ឋាន diyizuo26B-24 heping quanjinglu235haohe chuan dasha tianjin china 300000 CN) ក្រុមហ៊ុន Keiwlorn (លេខចុះបញ្ជីពាណិជ្ជកម្ម 1510107 MA6CDH និងមានអាសយដ្ឋាន Wuhuoqulongxlanglu1hao3dong1danyuan1ceng4ha cheng dushi sichuansheng 610000 CN) ព្រមទាំងក្រុមហ៊ុនផ្សេងទៀត ដែលក្រសួងពុំបានកំណត់ប្រភពច្បាស់លាស់។

ដើម្បីទប់ស្កាត់បញ្ហានេះ ក្រសួងវប្បធម៌ និងវិចិត្រសិល្បៈបានស្នើឲ្យឯកឧត្ដម ឧបរដ្ឋមន្ត្រី មេត្តាស្នើសុំទៅកាន់ស្ថានទូត នៃសាធារណរដ្ឋប្រជាមានិតចិន ដើម្បីអន្តរាគមន៍ឲ្យបណ្ដាក្រុមហ៊ុនទាំងនេះ ប្រមូលផលិតផលដែលបានផលិតរួច និងបញ្ឈប់ជាបន្ទាន់នូវការចរាចរ និងផលិតតទៅទៀត។ អាជ្ញាធរអប្សរានឹងផ្ញើលិខិតដោយឡែកមួយទៀត ទៅកាន់ក្រុមហ៊ុនអាម៉ាហ្សូន (Amazon) ដើម្បីស្នើសុំឲ្យបញ្ឈប់ការចរាចរលក់ផលិតផលទាំងនេះ នៅលើប្រព័ន្ធអនឡាញរបស់ក្រុមហ៊ុន៕