និស្សិតជយលាភីអាហារូបករណ៍ទៅប្រទេសជប៉ុន ចែករំលែកបទពិសោធន៍

2019-01-18 03:58:01
ចំនួនមតិ 0 | ចំនួនចែករំលែក 0

ចន្លោះមិនឃើញ

គេសង្កេតឃើញថា ក្នុងរយៈពេល១០ឆ្នាំចុងក្រោយនេះ និស្សិតខ្មែរកាន់តែច្រើនទៅៗបានចេញទៅ និងកំពុងតែបន្តការសិក្សានៅក្រៅប្រទេស រួមមានអាមេរិក ជប៉ុន កូរ៉េ សឹង្ហបុរី ថៃ វៀតណាម និងបណ្ដាប្រទេសសហភាពអ៊ឺរ៉ុប។ និស្សិតទាំងនោះសិក្សាក្នុងមុខជំនាញចម្រុះ ចាប់ពីថ្នាក់ជំនាញបច្ចេកទេស រហូតដល់ថ្នាក់បណ្ឌិត។ កាលពីពេលថ្មីៗនេះ និស្សិតខ្មែរចំនួន១២រូបផ្សេងទៀតបានជាប់អាហារូបករណ៍ថ្នាក់បរិញ្ញាបត្រជាន់ខ្ពស់ និងថ្នាក់បណ្ឌិត ក្រោមកម្មវិធីMEXTដែលត្រូវបានឧបត្ថម្ភដោយរដ្ឋាភិបាលជប៉ុន។

លោកសន លីដា និស្សិតបញ្ចប់ការសិក្សាពីជំនាញសំណង់ស៊ីវិល របស់សាកលវិទ្យាល័យហ្សាម៉ាន់ បច្ចុប្បន្នសាកលវិទ្យាល័យផារ៉ាហ្គនអន្តរជាតិនឹងទៅបន្តការសិក្សាថ្នាក់បរិញ្ញាបត្រជាន់ខ្ពស់ រយៈពេលពីរឆ្នាំកន្លះនៅវិទ្យាស្ថានបច្ចេកវិទ្យាតូក្យូជំនាញវិស្វកម្មគ្រោងរបស់សំណង់ (Structural Engineering)។ ក្នុងរយៈពេល២ឆ្នាំកន្លះនៃការសិក្សា លោកនឹងចំណាយពេល៦ខែដើម្បីសិក្សាភាសាជប៉ុន។ ថ្លែងទាក់ទងនឹងរបៀបដាក់អាហារូបករណ៍នេះ លីដា បញ្ជាក់ថាមានចំនួនបួនដំណាក់កាល។

ដំណាក់កាលទី១ ជាដំណាក់កាលដាក់សំណើស្រាវជ្រាវ ដែលបេក្ខជនបេក្ខនារីត្រូវប្រមែប្រមូលទិន្នន័យ និងសរសេរសំណើផែនការស្រាវជ្រាវជាភាសាអង់គ្លេសចំនួន១០០០ពាក្យ។ ក្នុងដំណាក់កាលទី២ បេក្ខជនបេក្ខនារីត្រូវប្រលងតេស្ដភាសាភាសាអង់គ្លេស និងជប៉ុន។ បេក្ខជនបេក្ខនារីមិនចាំបាច់បារម្ភនោះឡើយ ក្នុងករណីដែលខ្លួនមិនចេះភាសាជប៉ុន ឬចេះភាសាជប៉ុន តែមិនសូវច្បាស់ភាសាអង់គ្លេស ដ្បិតគណៈកម្មការនឹងជ្រើសយកពិន្ទុខ្ពស់បំផុត របស់តេស្ដមួយក្នុងចំណោមពីរ។

ក្នុងករណីដែលអ្នកដាក់ពាក្យជាប់តេស្ដភាសាហើយនោះ បេក្ខជនបេក្ខនារីនឹងត្រូវឆ្លងវគ្គសម្ភាសន៍ទម្រាំតែទទួលបានលទ្ធផលចុងក្រោយ។ ក្រោយពីនេះ បេក្ខជនបេក្ខនារីត្រូវបំពេញបែបបទរដ្ឋបាលមួយចំនួនរួមមានលទ្ធផលការពិនិត្យសុខភាពទៅកាន់ស្ថានទូត និងសាលានៅឯប្រទេសជប៉ុន។

រូបភាព៖ លោកសន លីដាទទួលសញ្ញាបត្របញ្ចប់ការសិក្សាពីសាកលវិទ្យាល័យអន្តរជាតិផារ៉ាហ្គន

លោកសឿន ថារិទ្ធិ អតីតនិស្សិតរបស់សាកលវិទ្យាល័យផារ៉ាហ្គនអន្តរជាតិម្នាក់ទៀត ក៏នឹងទៅបន្តការសិក្សានៅឯប្រទេសជប៉ុន តាមរយៈសាកលវិទ្យាល័យWaseda ក្នុងជំនាញវិទ្យាសាស្ត្រហិរញ្ញវត្ថុផងដែរ។ ថារិទ្ធិលើកឡើងថា ទម្រាំតែជាប់អាហារូបករណ៍MEXTនេះ លោកត្រូវដោះស្រាយបញ្ហាលំបាកមួយចំនួន។ ការលំបាក់ទីមួយត្រង់ថា វគ្គប្រកួតតេស្ដភាសាជាវគ្គដែលមានការប្រកួតប្រជែងខ្ពស់ ព្រោះតែបេក្ខជនបេក្ខនារីទាំងអស់ដែលដាក់គម្រោងស្រាវជ្រាវរបស់ខ្លួនមិនត្រូវបានជម្រុះក្នុងវគ្គនោះទេ តែពួកគេទាំងអស់នោះត្រូវមកប្រកួតជម្រុះវគ្គភាសាឯណោះវិញ។

ដោយសារតែវិញ្ញាសាមិនសូវជាពិបាកប៉ុន្មាន បេក្ខជនបេក្ខនារីម្នាក់ៗត្រូវខិតខំធ្វើឱ្យបានល្អបំផុត មិនឱ្យមានចន្លោះប្រហោង ត្បិតបេក្ខជនបេក្ខនារីជាច្រើនអាចមានសមត្ថភាពប្រហាក់ប្រហែលគ្នា។ ការលំបាកមួយវិញទៀតត្រង់ការជ្រើសរើសប្រធានបទសម្រាប់សំណេរស្រាវជ្រាវ។ លោកយកឈ្នះលើការលំបាកនេះបានតាមរយៈ ការព្យាយាមស្វែងយល់ពីចន្លោះខ្វះខាតរបស់មុខវិជ្ជាចំណង់ចំណូលចិត្តរបស់លោក ហើយចន្លោះខ្វះខាតនោះជាបញ្ហាដែលពុំទាន់មានអ្នកដោះស្រាយនៅឡើយ។ ការលំបាកចុងក្រោយនៅត្រង់ថា សំណើស្រាវជ្រាវត្រូវទទួលបានការយល់ព្រមពីសាស្ត្រាចារ្យនៅប្រទេសជប៉ុន ដោយយើងត្រូវស្វែងយល់ថាតើសាស្ត្រាចារ្យនៅតាមសាកលវិទ្យាល័យក្នុងប្រទេសជប៉ុននោះ មានជំនាញបច្ចេកទេសច្បាស់លាស់ ឬចំណាប់អារម្មណ៍សម្រាប់ប្រធានបទស្រាវជ្រាវរបស់បេក្ខជនបេក្ខនារីឬទេ។

រូបភាព៖ លោកសឿន ថារិទ្ធិក្នុងទស្សនកិច្ចសិក្សានៅក្រៅប្រទេស

លោកប៉ុក អ៊ីឡុង អតីតនិស្សិតសាកលវិទ្យាល័យផារ៉ាហ្គនអន្តរជាតិដែរនោះ ក៏ជាជយលាភីអាហារូបករណ៍ថ្នាក់បរិញ្ញាបត្រជាន់ខ្ពស់ទៅសិក្សាជំនាញរចនាប្រព័ន្ធផ្សព្វផ្សាយនៅសាកលវិទ្យាល័យ Keio ទីក្រុងតូក្យូ ប្រទេសជប៉ុនផងដែរ។ អ៊ីឡុងនឹងសិក្សាមុខវិជ្ជាផ្សេងៗទាក់ទងនឹងប្រព័ន្ធផ្សព្វផ្សាយ ការលើកកម្ពស់ម៉ាកផលិតផលជាដើម។ និស្សិតដែលទើបបញ្ចប់ការសិក្សាថ្នាក់បរិញ្ញាបត្រកាលពីឆ្នាំទៅនេះ ជម្រុញនិស្សិតដែលចង់ទៅសិក្សានៅក្រៅប្រទេសដូចរូបលោក ឱ្យមានភាពក្លាហាន និងហ៊ានសាកដាក់អាហារូបករណ៍ទៅក្រៅប្រទេស។ និស្សិតគួរតែជឿជាក់លើខ្លួនឯង ព្រមទាំងហ៊ានបញ្ចេញសមត្ថភាពដែលខ្លួនមានក្នុងវគ្គជម្រុះរបស់អាហារូបករណ៍ផងដែរ។ ចំពោះថ្ងៃអនាគត អ៊ីឡុងចង់បន្តការសិក្សាថ្នាក់បណ្ឌិតជំនាញសិល្បៈ និងអក្សរសាស្ត្រក្នុងតំបន់អាស៊ីអាគ្នេយ៍ ដោយលោកអាចសម្លឹងមើលការសិក្សានៅឯប្រទេសថៃ បើពុំនោះទេ លោកនឹងត្រលប់មកប្រទេសខ្មែរវិញដើម្បីចែករំលែកបទពិសោធន៍ចំណេះជំនាញរបស់លោក ដល់អ្នកជំនាន់ក្រោយ ដ្បិតជំនាញរបស់លោកពុំសូវមានធនធានសម្រាប់បណុះបណ្ដាល់ដល់កូនខ្មែរនោះទេ។

រូបភាព៖ លោកប៉ុក អ៊ីឡុងពេលបញ្ចប់ការសិក្សា គួរបញ្ជាក់ដែរថា អាហារូបករណ៍MEXTរបស់រដ្ឋាភិបាលជប៉ុននេះនេះ ទទួលរ៉ាប់រងថ្លៃសិក្សា សំបុត្រយន្តហោះ និងប្រាក់ប្រចាំខែរបស់និស្សិតអាហារូបករណ៍។ ផងដែរ និស្សិតទាំងអស់ដែលទទួលបានអាហារូបករណ៍នៅឆ្នាំនេះនឹងចាប់ផ្ដើមការសិក្សារបស់ខ្លូនខ្លូននៅប្រទេសជប៉ុន នៅខែមេសាខាងមុខនេះ៕

ដោយ៖ ថា ម៉ាលីដា

ពាក្យទាក់ទង