ចម្ការផ្កាឈូករ័ត្ន និងស្បៃរឿង ខេត្តត្បូងឃ្មុំ ក្លាយទៅជាទីកម្សាន្តដ៏ស្រស់ស្អាត

2019-01-18 04:34:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ដាំនៅលើផ្ទៃទំហំជិត ៥ហិកតា ចម្ការផ្កាឈូករ័ត្ន និងស្បៃរឿងមួយកន្លែង បាននឹងកំពុងរីកស្គុះស្គាយស្វាគមន៍ភ្ញៀវទេសចរយ៉ាងច្រើនកុះករទៅកម្សាន្តឥតដាច់ ពិសេសថ្ងៃចុងសប្ដាហ៍។ ចម្ការផ្កាឈូករ័ត្ននេះស្ថិតនៅក្នុងឃុំជីរោទ៍ទី១ ស្រុកត្បូងឃុំ ខេត្តត្បូងឃ្មុំ។

ដើម្បីទៅដល់ចម្ការផ្កាឈូករ័ត្ន លោកអ្នកអាចធ្វើដំណើរចុះពីស្ពានគីហ្សូណាត្រើយខាងកើតតាមផ្លូវបេតុងចម្ងាយ៦គីឡូម៉ែត្រ ជិតដល់វត្តជីរោទ៍បត់ស្ដាំដៃបន្តិច នឹងទៅដល់ចម្ការផ្កាដ៏ស្រស់បំព្រងនេះ ជាមួយនឹងអារម្មណ៍ស្រស់ស្រាយ និងខ្យល់បរិសុទ្ធពិតៗ។

មែនទែនទៅការដាំផ្កាឈូករ័ត្ន និងផ្កាស្បៃរឿង គឺក្នុងបំណងទាក់ទាញហ្វូងឃ្មុំ មកក្រេបលំអងផ្កាតែប៉ុណ្ណោះ។ នេះបើតាម លោក ប៉ត សុផល ម្ចាស់ចម្ការផ្កាឈូករ័ត្ន។ លោក សុផល មានមុខរបរជាអ្នកចិញ្ចឹមឃ្មុំ ដែលគិតមកដល់ពេលនេះ លោកបានចិញ្ចឹមឃ្មុំមានជាង ១០០ឡាំងហើយ។ “ដំបូងខ្ញុំដាំឈូករ័ត្នតិចដែរទេ ប៉ុន្តែចាប់ចិញ្ចឹមឃ្មុំកាន់តែច្រើន ផ្ទៃដីដាំផ្កាក៏បានពង្រីករហូតជិត ៥ហិចតា។ ឃ្មុំចូលចិត្តលំអងផ្កាឈូករ័ត្ន និងស្បៃរឿង”។

លោក ប៉ត សុផល បង្ហាញអារម្មណ៍រីករាយ ដែលចម្ការរបស់លោកទាក់ទាញភ្ញៀវទេសចរជិតឆ្ងាយមកទស្សនាកម្សាន្ត ខណៈថ្ងៃខ្លះមានរហូតដល់ខ្ទង់រយនាក់ និងបានធ្វើឱ្យជីវភាពប្រជាពលរដ្ឋនៅតំបន់នោះកាន់តែល្អប្រសើរឡើងតាមរយៈលក់ដូរ។ ក្នុងឆ្នាំ២០១៩ នេះលោក សុផល ក៏គ្រោងពង្រីកផ្ទៃដីដាំដុះផ្កាឈូករ័ត្នឱ្យកាន់តែធំជាងមុន បង្កើតជាកន្លែងអង្គុយលេងបន្ថែមទៀតបានច្រើនកន្លែង ព្រមទាំងដាំននោងជាជួរបង្កើតជាម្លប់ត្រជាក់នៅក្នុងរដូវប្រាំងផងដែរ។

ចំពោះភ្ញៀវមកកម្សាន្តនៅចម្ការឈូករ័ត្នមិនតម្រូវឲ្យបង់ប្រាក់នោះទេ គ្រាន់តែយកថ្លៃផ្ញើម៉ូតូ ១ ០០០រៀលក្នុង១គ្រឿង និងរថយន្តចំនួន ៣ ០០០រៀលក្នុងមួយគ្រឿងប៉ុណ្ណោះ។

យ៉ាងនេះក្តី លោក សុផល បានសំណូមពរភ្ញៀវទេសចរ ដែលមកលេងនៅចម្ការផ្កាឈូករ័ត្ន មេត្តាកុំចោលសំរាមពាសវាលពាសកាល ពោលគឺត្រូវដាក់ចូលក្នុងធុងសំរាម ដើម្បីរួមគ្នាលើកកម្ពស់សោភ័ណ និងបន្តទាក់ទាញភ្ញៀវទេសចរបានច្រើនទៀតមកកម្សាន្តចម្ការឈូករ័ត្ន៕