អ្នកជំនាញជលផល គ្រោងប្រើបច្ចេកទេសបង្កាត់ពូជត្រីល្បីឈ្មោះមួយនៅខេត្តស្ទឹងត្រែង
- 2019-01-18 04:56:45
- ចំនួនមតិ 0 | ចំនួនចែករំលែក 0
អ្នកជំនាញជលផល គ្រោងប្រើបច្ចេកទេសបង្កាត់ពូជត្រីល្បីឈ្មោះមួយនៅខេត្តស្ទឹងត្រែង
ចន្លោះមិនឃើញ
បើមិនមានការប្រែប្រួលទេ នៅឆ្នាំក្រោយនេះមន្ត្រីជំនាញផ្នែកជលផល គ្រោងនឹងប្រើប្រាស់បច្ចេកទេសបង្កាត់ពូជត្រីប៉ាស៊ីអ៊ី ដែលមានឈ្មោះល្បីខ្លាំងនៅខេត្តស្ទឹងត្រែង។ នេះបើតាមប្រសាសន៍ លោក ទុំ នីរ៉ូ នាយខណ្ឌរដ្ឋបាលជលផលនៃមន្ទីរកសិកម្ម រុក្ខាប្រមាញ់ និងនេសាទខេត្តស្ទឹងត្រែង។ ត្រីប៉ាស៊ីអ៊ី ជាប្រភេទត្រីទឹកសាប ដែលមានរសជាតិឆ្ងាញ់ខុសពីត្រីដទៃ មាននៅទន្លេសេកុង និងទន្លេមេគង្គក្នុងខេត្តស្ទឹងត្រែង កំពុងថយចុះពីមួយឆ្នាំទៅមួយឆ្នាំ ហើយមានតម្លៃថ្លៃ។
“អញ្ចឹងប្រហែលឆ្នាំ ២០២០ យើងចាប់ផ្ដើមយកមកផ្សាំ ត្រីទម្ងន់រង្វង់៣ខាំ ទៅ៤ខាំអីហ្នឹង នៅក្នុងស្រះថាតើអត្រារស់របស់វាហ្នឹង អាចរស់បានអត់ បន្ទាប់មកយើងបំប៉នវាឱ្យធំធាត់មានពងមានអីហើយ អាហ្នឹងយើងចាប់ផ្ដើមបង្កាត់អីចឹង។ ហ្នឹងគ្រាន់តែជាផែនការទេ។ បើសិនជាយើងពឹងតែលើធម្មជាតិ យើងអត់អាចធានានិរន្តរភាពបានទេ ព្រោះកំណើនប្រជាជនកើនឡើងរាល់ថ្ងៃ តម្រូវការក៏កើនឡើង ហើយធនធានក៏កាន់តែថយចុះ។ដូច្នេះហើយវាអត់មានតុល្យភាពគ្នាទេ”។ លោក ទុំ នីរ៉ូ និយាយ។
លោកបានបន្ថែមថា មូលហេតុដែលត្រូវរង់ចាំដល់ឆ្នាំ ២០២០ ដោយសារខេត្តស្ទឹងត្រែងនៅមិនទាន់មានស្ថានីយស្រាវជ្រាវ និងពិសោធន៍ពូជត្រីនៅឡើយទេ។ បច្ចុប្បន្នស្ថានីយស្រាវជ្រាវ និងពិសោធន៍ គ្រោងនឹងបញ្ចប់ការសាងសង់នៅដើមឆ្នាំ ២០២០។ ស្ថានីយស្រាវជ្រាវ និងពិសោធន៍ត្រី គឺមានទំហំផ្ទៃដី ១០ហិចតា។ “យើងត្រូវការប្រឹងប្រែង ការព្យាយាម និងភាពអត់ធ្មត់ ទាំងអស់គ្នា។ ខ្ញុំឧទាហរណ៍ថា ត្រីដែលយើងបង្កាត់រាល់ថ្ងៃហ្នឹងពពួកត្រីប្រា ត្រីឆ្ពិន ត្រីកាហែ និងត្រីអណ្ដែងផ្សេងៗនេះ កាលពីដើមមក យើងអត់អាចបង្កាត់បានទេ ក៏ប៉ុន្តែបច្ចុប្បន្នយើងអាចធ្វើបាន។ ដូច្នេះយើងមានសុទិដ្ឋិនិយមថា អាចធ្វើបាន”។
លោកបានឱ្យដឹងទៀតថា បើការបង្កាត់ទទួលបានជោគជ័យ គឺយើងអាចធានាបាននូវការមិនផុតពូជប្រភេទត្រីប៉ាស៊ីអ៊ី ក្នុងប្រទេសកម្ពុជា និងធ្វើឱ្យជីវភាពប្រជាពលរដ្ឋនៅតាមសហគមន៍កាន់តែមានភាពល្អប្រសើរ ព្រោះថា ត្រីប៉ាស៊ីអ៊ី ជាប្រភេទត្រីមានតម្លៃថ្លៃ។
ទិន្នផលត្រីប៉ាស៊ីអ៊ី នៅខេត្តស្ទឹងត្រែងសម្រាប់ឆ្នាំនេះ ប្រហាក់ប្រហែលនឹងឆ្នាំមុនដែរ ប៉ុន្តែជាង៧០% មានទំហំតូចជាងឆ្នាំមុន។ នេះបើតាមលោក ទុំ នីរ៉ូ។ ចំពោះតម្លៃវិញត្រូវបានបែងចែកជាបីប្រភេទ ក្នុងនោះទម្ងន់ចាប់ពី ៤ខាំទៅ ៦ខាំ តម្លៃ មួយគីឡូក្រាមចន្លោះពី ៨ម៉ឺនរៀលទៅ ១០ម៉ឺនរៀល។ ទម្ងន់ចាប់ពី ៧ខាំ ទៅ៩ខាំ តម្លៃចាប់ពី១២ម៉ឺនរៀល ទៅ១៥ម៉ឺនរៀល។ ទម្ងន់ចាប់ពី ១គីឡូក្រាមទៅជិត ២គីឡូក្រាម តម្លៃចាប់ពី ២០ម៉ឺនរៀល ទៅ៣៥ម៉ឺនរៀល។
ចុងក្រោយលោក ទុំ នីរ៉ូ បានអំពាវនាវដល់ប្រជាពលរដ្ឋទាំងអស់ចូលរួមថែរក្សា និងប្រើប្រាស់ធនធានជលផល ក្នុងប្រទេសកម្ពុជា ដោយការទទួលខុសត្រូវខ្ពស់ បើមិនដូច្នេះទេធនធានជលផល ក្នុងប្រទេសអាចប្រឈមនឹងភាពអន្តរាយនៅថ្ងៃណាមួយជាក់ជាមិនខាន៕