មានទម្លាប់៣យ៉ាងនេះ ទោះជាកូនអ្នកមាន ក៏អាចធ្លាក់ខ្លួនក្រដោយមិនដឹងខ្លួនដែរ

2019-01-22 04:37:10
ចំនួនមតិ 0 | ចំនួនចែករំលែក 0

ចន្លោះមិនឃើញ

និយាយពីរឿងចង់ជោគជ័យ ចង់មានបាន អ្នកណាៗក៏ចង់បាន ប៉ុន្តែបុគ្គលមួយចំនួន មិនអាចដើរទៅដល់គោលដៅនេះ ព្រោះមានទម្លាប់មិនល្អៗបានតោងជាប់ប្រាណ។ យ៉ាងណាក្ដី សម្រាប់យុវវ័យកម្ពុជា កុំបណ្ដោយឲ្យពេលវេលាកន្លងហួស គួរណាស់ខិតខំសិក្សាបង្កើនសមត្ថភាព និងជំនឿលើខ្លួនឯងឲ្យបានច្រើន។ នេះគឺជាដំណោះស្រាយ ដើម្បីកែប្រែទម្លាប់អាក្រក់មួយចំនួន ឲ្យដើរទៅដល់គោលដៅ។

១) ការវាយបំបាក់ស្មារតីខ្លួនឯង

ពាក្យមួយចំនួនដូចជា ខ្ញុំមិនអាចធ្វើវាបាន ខ្ញុំខ្លាចធ្វើមិនបានល្អ ខ្ញុំខ្វះភាពជឿជាក់ធ្វើ … សុទ្ធតែជាការវាយបំបាក់ស្មារតីខ្លួនឯង ទាំងដែលអ្នកមិនទាន់បានសាកល្បង។ ផ្ទុយទៅវិញ មិនថាអ្វីក៏ដោយ ឲ្យតែចិត្តអ្នកស្រមើស្រមៃ និងមានភាពជឿជាក់ នោះចិត្តរបស់អ្នកនឹងទទួលបានវា។

រូបតំណាង

ពីពេលនេះតទៅ អ្នកត្រូវជំនួសមកវិញនូវពាក្យ "ខ្ញុំអាចធ្វើបាន"។ រាល់មនុស្សជោគជ័យតែងផ្តោតយកចិត្តទុកដាក់ជានិច្ច ទៅលើគោលដៅរបស់ខ្លួន និង រៀបចំគម្រោងរួចជាស្រេចដើម្បីសម្រេចវា។ ដូច្នេះអ្នកគួរ បង្កើតរូបភាពជោគជ័យមួយឲ្យខ្លួនឯង បង្កើតនិយមន័យនៃភាពជោគជ័យឲ្យខ្លួន ហើយត្រូវជឿថាអ្នកអាចសម្រេចបាននូវរឿងគ្រប់យ៉ាងដែលអ្នកចង់បាន។

២) ខ្វះការដាក់វិន័យឲ្យខ្លួនឯង

បុរស ឬ ស្ត្រីដែលជោគជ័យ គឺជាមនុស្សដែលធ្វើការស្ទើរគ្រប់ពេលទាំងអស់លើការងារអាទិភាពរបស់ខ្លួន។ ប្រសិនបើអ្នកចង់ក្លាយជាសហគ្រិនមួយជោគជ័យដូចពួកគេ អ្នកត្រូវជម្រុះចោលការងារតូចតាចមិនសំខាន់ មិនជះឥទ្ធិពលដល់គោលដៅរបស់អ្នក ចេញឲ្យឆ្ងាយ ពីការងារធំរបស់អ្នក។ ការដាក់វិន័យឲ្យខ្លួនឯង គឺជាគោលដៅ ត្រូវសរសេរចេញនូវអ្វីដែលអ្នកត្រូវធ្វើប្រចាំថ្ងៃប្រចាំសប្ដាហ៍ ប្រចាំខែ ឬ ប្រចាំឆ្នាំ។ ត្រូវកំណត់ខ្លួនឯងតើអ្នកត្រូវចំណាយ ពេលប៉ុន្មានសម្រាប់ការងារទាំងនោះ ហើយពេលប៉ុន្មានសម្រាប់ការងារដែលគ្មានសារសំខាន់។

៣) ការធ្វើអ្វីដោយឥតព្រាងទុក

អ្នកត្រូវតែបង្កើតរូបមន្តជោគជ័យមួយឲ្យខ្លួនឯងជាមុនសិន ហើយអ្នកត្រូវអនុវត្តន៍រូបមន្តនោះម្តងហើយម្តងទៀត ឲ្យបានច្រើនដង។ អ្នកត្រូវតែចេះលួចមើលពីសកម្មភាពជោគជ័យរបស់បុគ្គលដទៃ ព្រោះពួកគេបានជោគជ័យមុនអ្នករួចទៅហើយ ហេតុដូចនេះវាអាចជាគំរូមួយ ដែលអ្នកគួររៀនតាម។

ប្រសិនបើសកម្មភាពនេះជោគជ័យសម្រាប់នរណាម្នាក់ វាក៏អាចជោគជ័យផងដែរសម្រាប់អ្នក រហូតធ្វើឲ្យគំរូដែលអ្នករៀនតាមទាំងនោះក្លាយជាទម្លាប់ នឹង វិន័យផ្ទាល់ខ្លួនរបស់អ្នក។

ប្រភព៖ CAMHR Career Development

អត្ថបទ៖ ស៊ិន សាវ៉េត