ឆ្នាំនេះកម្ពុជាជួបគ្រោះរាំងស្ងួត តែខេត្តព្រះសីហនុ នៅប្រភពទឹកសាបតែ១កន្លែងនេះគត់

2019-01-22 07:12:57
ចំនួនមតិ 0 | ចំនួនចែករំលែក 0

ចន្លោះមិនឃើញ

តាមសារាចរណែនាំរបស់ក្រសួងធនធានទឹក និងឧតុនិយមដែលបានចេញផ្សាយកន្លងមកឲ្យដឹងថា នៅក្នុងឆ្នាំ ២០១៩នេះ កម្ពុជាអាចនឹងប្រឈមខ្វះខាតទឹកសាបប្រើប្រាស់ ដោយរដូវវស្សាអាចមកយឺត មានភ្លៀងធ្លាក់តិចតួច ជួបគ្រោះរាំងស្ងួត ក្ដៅហួតហែងខ្លាំង រហូតក្រសួងបានអំពាវនាវឲ្យប្រជាពលរដ្ឋធ្វើការស្តុកទឹកទុកប្រើប្រាស់ទៀតផង។ ក្រឡេកមកមើលខេត្តព្រះសីហនុវិញ ចាប់ផ្ដើមកំពុងប្រឈមខ្វះខាតទឹកសាបប្រើប្រាស់តាំងពីឥឡូវនេះហើយ ខណៈប្រភពផ្គត់ផ្គង់ទឹកសាប នៅសល់តែមួយកន្លែងគត់ គឺតំបន់ក្បាលឆាយ។

រូបភាព៖ រដ្ឋបាលខេត្តព្រះសីហនុ

តាមប្រភពពីរដ្ឋបាលខេត្តព្រះសីហនុ បានឲ្យដឹងថា នៅវេលាព្រឹកថ្ងៃទី២១ ខែ មករា ឆ្នាំ ២០១៩ លោក ស៊ុ្រន ស៊្រន់ អភិបាលរងខេត្ត ព្រះសីហនុ បានដឹកនាំកម្លាំងជម្រុះ បន្តចុះទៅអនុវត្តការកាយប្រឡាយព្រំ ការពារតំបន់ប្រើប្រាស់ច្រើនយ៉ាងក្បាលឆាយ។ គោលបំណងសំខាន់នៃការកាយប្រឡាយព្រំការពារតំបន់ប្រភពទឹកសាប នៅក្បាលឆាយនេះ គឺដើម្បីទប់ទល់ការចូលទន្ទ្រានដោយខុសច្បាប់ពីសំណាក់ប្រជាពលរដ្ឋធ្វើយ៉ាងណាដើម្បីរក្សាទីនេះសម្រាប់ជាប្រភពទឹកស្អាតប្រើប្រាស់នៅទូទាំងខេត្តព្រះសីហនុ។

តាមប្រសាសន៍ លោក ស្រ៊ុន ស្រ៊ន់ បានបញ្ជាក់ថា តំបន់ប្រើប្រាស់ច្រើនយ៉ាងក្បាលឆាយនេះចាំបាច់ត្រូវតែរក្សាឲ្យបាន ព្រោះវាជាប្រភពទឹកសាបតែមួយគត់ ដែលមិនអាចខ្វះបានសម្រាប់ប្រើប្រាស់ នៅទូទាំងខេត្តព្រះសីហនុទាំងមូល។ លោកអភិបាលរងខេត្តបានអំពាវនាវដល់ បុគ្គលដែល បានលួចសង់ផ្ទះនៅតំបន់ហាមឃាត់នេះត្រូវរុះរើចេញ។ លោកបានក្រើនរំលឹកដោយទទូចចំពោះបុគ្គលទាំងឡាយណា ដែលបានចូលទៅតាំងលំនៅ ដោយខុសច្បាប់នៅតំបន់ហាមឃាត់ខាងលើនេះដោយចេតនាក្តី ឬដោយចាញ់ការអូសទាញញុះញង់ពីក្រុមមេក្លោងអនាធិបតេយ្យក្តី សូមដកខ្លួនចេញជាបន្ទាន់៕