«អន្ទងវិញ្ញាណ» សម្ពោធដាក់បញ្ចាំងយប់មិញ រន្ធត់ផ្អើលរោងភាពយន្ត
- 2019-01-23 04:50:00
- ចំនួនមតិ 0 | ចំនួនចែករំលែក 0
«អន្ទងវិញ្ញាណ» សម្ពោធដាក់បញ្ចាំងយប់មិញ រន្ធត់ផ្អើលរោងភាពយន្ត
ចន្លោះមិនឃើញ
ល្ងាចមិញនេះភាពយន្ត «អន្ទងវិញ្ញាណ» ដែលជាស្នាដៃទី៤ របស់ផលិតកម្ម Wonderfilm បានប្រារព្ធពិធីបើកសម្ពោធដាក់បញ្ចាំងជាផ្លូវការនៅរោងភាពយន្ត Major Cineplex សែនសុខ មានការចូលរួមពីសំណាក់ភ្ញៀវកិត្តិយសយ៉ាងច្រើនកុះករ។
សាច់រឿងភាពយន្តនេះគឺមានលក្ខណៈប្រទាក់ក្រឡា និងមានឈុតឆាកភ័យរន្ធត់ជាច្រើនធ្វើឲ្យអ្នកទស្សនាអង្គុយលើកៅអីមិននឹង។ ទោះបីជាទទួលបានការគាំទ្រពីអ្នកបានចូលទស្សនាយ៉ាងណាក្ដី ផលិតកររឿងនេះនិងតួឯកស្រី បានបង្ហើបថាខ្លួនមិនទាន់សង្ឃឹមច្រើននៅឡើយទេ។
ជុំវិញការដាក់បញ្ចាំងរឿងនេះ លីងលីង ដែលជាតួឯកស្រីបានឆ្លើយតបមកកាន់ Sabay ថាទោះបីជាភាពយន្តបែបខ្មោចរន្ធត់នៅក្នុងស្រុកមានច្រើន ដូច្នេះនាងមានតែខិតខំសម្ដែងយ៉ាងណាឲ្យកាន់តែដូចការពិត ធ្វើអ្នកទស្សនាកាន់តែរន្ធត់មួយកម្រិតទៀត។ "ចាសបង ដោយសារតែពេលនេះភាពយន្តបែបរន្ធត់កំពុងតែមានទីផ្សារ ដូច្នេះខ្ញុំត្រូវតែខិតខំប្រឹងសម្ដែងយ៉ាងណាឲ្យកាន់តែល្អមួយកម្រិតទៀត ឲ្យអ្នកដែលទស្សនាមើលទៅគឺប្រៀបដូចជាហេតុការណ៍កើតឡើងពិតៗអីចឹង ចំពោះតួសម្ដែងបែបកំប្លែងឬមនោសញ្ចេតនា ខ្ញុំនឹងរៀនបន្ថែមទៀតពេលក្រោយ។" អ្នកនាង លីងលីង បញ្ជាក់។
គូសបញ្ជាក់ថាភាពយន្តនេះគឺជាភាពយន្តថ្មីបន្តភាគពីរឿងចាស់ "ស្នូរជើងអ្នកណា" ដែលមានសាច់រឿងបន្តបន្ទាប់គ្នា។ ជុំវិញការថតភាពយន្ត «អន្ទងវិញ្ញាណ» លោក សែម វិសាល ម្ចាស់ផលិតកម្ម Wonderfilm Cambodia ថ្លែងថាភាពយន្តនេះបានចំណាយដើមទុនអស់ច្រើនជាងរឿងមុនៗ ដោយសារចំណាយពេលថតដល់ប្រទេសថៃឯណោះ ដើម្បីផ្ដិតយកទេសភាពស្រស់ស្អាតប្លែកៗ បូករួមជាមួយតំបន់សំខាន់ៗ នៅក្នុងប្រទេសកម្ពុជា។
ខ្សែភាពយន្ត«អន្ទងវិញ្ញាណ» បង្កប់នូវអំបិយជំនឿប្លែកៗ ទាំងកោដ្ឋ ទាំងអារក្សដុះស្នែងដែលសុទ្ធសឹងតែជាជំនឿបុរាណដែលលក្ខណៈសាកល និងបុរាណ។ «កោដ្ឋ» ត្រូវបានប្រជាជនខ្មែរប្រើដាក់សព ឬ ឆ្អឹង ធាតុ ជនដែលកាន់តាមព្រះពុទ្ធសាសនាក្នុង សង្គម។ តែកាលដំបូងភាគច្រើនគេប្រើកោដ្ឋដើម្បីដាក់សពអ្នកដែលមានឋានៈជា ព្រះរាជា និងព្រះរាជវង្សានុវង្ស, ព្រះសង្ឃ ឬអ្នកទាំងឡាយផ្សេងទៀតដែលព្រះមហាក្ស័ត្រិយ៍ទ្រង់ព្រះរាជានុញ្ញាតិ។ ហេតុដូចនេះ «កោដ្ឋ» មានន័យធំណាស់ក្នុងសង្គមខ្មែរ។
ចំណែក អារក្សដែលជាបុគ្គលមួយរូបដែលមាននៅគ្រប់ជំនឿបុរាណទាំងជំនឿប្រពៃណីសាកល ហើយជាស្តេចខ្មោចដុះស្នែង មាន ឈ្មោះ ថៈសកៈ ជាយមទូតទ្វារនរក មុននឹងវិញ្ញាណទៅដល់ស្ពានឆ្លងស្ទឹង វេតៈរណី ដែលតែងតែស្លៀកពាក់ពណ៌ក្រហម ឬខ្មៅ ដែលឈរនៅទ្វារនរកចាំបោះមនុស្សទៅក្នុងស្ថាននរក។ អបិយជំនឿទាំងនេះសុទ្ធសឹងតែរំលេចក្នុងភាពយន្ត «អន្ទងវិញ្ញាណ»។
ភាពយន្តនេះ នឹងចាប់ដាក់បញ្ចាំងជាផ្លូវការនៅថ្ងៃទី២៤ ខែមករាឆ្នាំ ២០១៩នេះហើយ៕
ទីដ្ឋភាពខ្លះៗ ពីកម្មវិធីសម្ពោធដាក់បញ្ចាំងរឿង «អន្ទងវិញ្ញាណ»៖