ដាក់ទារកអាំងថ្ងៃពេលព្រលឹមស្រាងៗ ជួយច្រើនដល់ស្បែក និងសុខភាព
- 2019-01-24 06:00:00
- ចំនួនមតិ 0 | ចំនួនចែករំលែក 0
ដាក់ទារកអាំងថ្ងៃពេលព្រលឹមស្រាងៗ ជួយច្រើនដល់ស្បែក និងសុខភាព
ចន្លោះមិនឃើញ
បន្ទាប់ពីចេញពីពេទ្យ ក្រោយពីសម្រាលកូនរួច គ្រូពេទ្យបានឲ្យយោបល់ត្រូវយកទារកសំដិល ឬអាំងថ្ងៃយ៉ាងតិច ២ដង ចាប់ពីចន្លោះម៉ោង ៧ ដល់៩ព្រឹក និងបន្ទាប់ពីម៉ោង ៤ល្ងាចនៅក្នុងមួយថ្ងៃ។ ការធ្វើបែបនេះ យ៉ាងហោចណាស់អោយបាន ១០ថ្ងៃដែរ។
ចាស់ៗពីដើមក៏បានអនុវត្តន៍បែបនេះ ជាយូរយារណាស់មកហើយ គឺក្នុងគោលបំណង កាត់បន្ថយភាពលឿងរបស់ទារក។ នេះបើតាមប្រភពពីទំព័រហ្វេសប៊ុក បន្ទប់ពិគ្រោះជំងឺកុមារ វត្តអង្គតាមិញ។
វេជ្ជបណ្ឌិត ប៉ែន កក្កដា ឯកទេសរោគកុមារ និងទារក ធ្វើការនៅមន្ទីរពេទ្យកុមារជាតិ និងជាវេជ្ជបណ្ឌិតនៃបន្ទប់ពិគ្រោះជំងឺកុមារវត្តអង្គតាមិញ បានបញ្ជាក់នៅក្នុងទំព៍រខាងលើថា ការចេញលឿងរបស់ទារកធម្មតាចន្លោះពីអាយុ ២ទៅ១០ថ្ងៃ ដោយគ្មានរោគសញ្ញាអ្វីទាំងអស់ ដូចជា ក្ដៅខ្លួន ឬត្រជាក់ខ្លួន ថយបៅ កន្ត្រាក់ដៃជើងនោះទេ ផ្ទុយមកវិញទារកអាចបៅធម្មតា និងឡើងទម្ងន់។
ចំពោះទារកគ្រប់ខែការចេញលឿងនេះមានរហូតដល់ ៦០% ឯទារកមិនគ្រប់ខែច្រើនជាង៩០%។ វេជ្ជបណ្ឌិតបន្តថា ជាតិលឿងនេះកើតមកពីការចាល់ច្រើននូវពួកបីលីរុយប៊ីន (ពាក្យបច្ចេកទេសវេជ្ជសាស្ត្រ) ក្នុងគ្រាប់ឈាម នៅក្នុងសរសៃឈាម ហើយជ្រាបចូលក្រោមស្បែកទារកដែលមិនអាចបញ្ចេញទាន់តាមថ្លើមទៅកាន់លាមក។
មូលហេតុបណ្ដាលមកពី ឈាមក្រហមទារក ដែលត្រូវជម្រុះចោលមានចំនួនច្រើន និងមុខងារថ្លើមមិនទាន់ដំណើរការល្អ រួមផ្សំនឹងពោះវៀនដែលមិនទាន់មានFlore នៅលើពោះវៀនដែលជំរុញអោយស្រូបជាតិលឿងទៅវិញច្រើន។
ការហាលថ្ងៃជាជម្រើសល្អបំផុត ដោយក្នុងពន្លឺថ្ងៃមានកាំរស្មីអ៊ុលត្រាវីយូឡេ UV ជួយអោយប៊ីលីរុយប៊ីនទាំងនោះ អាចចេញតាមទឹកនោមបាន និងកាត់បន្ថយជាតិលឿងរបស់ទារក។ ចំពោះការចេញលឿងមុន ២៤ម៉ោង និងលើសពី១០ថ្ងៃ រួមទាំងរោគសញ្ញាដទៃទៀត គឺជារឿងអាក្រក់បំផុតសម្រាប់ទារក ដែលទាមទារការព្យាបាលត្រឹមត្រូវនិងទាន់ពេលវេលា។
សូមបញ្ជាក់ថា ផលវិបាកមួយដែលតែងតែជួបចំពោះការចេញលឿងលើទារកមិនគ្រប់ខែគឺការប៉ះពាល់ខួរក្បាលដែលអោយកូនទៅជាប្រកាច់ និងមិនគ្រប់ទឹក ឬពិការកាយសម្បទា។
ក្រៅពីហាលថ្ងៃ គឺគ្រូពេទ្យទារកមានម៉ាស៊ីនពន្លឺដើម្បីជួយ ឬត្រូវការធ្វើការផ្លាស់ប្ដូរឈាមជាបន្ទាន់ដើម្បីយកជាតិលឿងចេញ។ នេះបើតាមប្រភពពី ទំព័រហ្វេសប៊ុក បន្ទប់ពិគ្រោះជំងឺកុមារ វត្តអង្គតាមិញ។