ទោះការលក់ iPhone ថមថយ Apple នៅតែជាប់ឈ្មោះជាក្រុមហ៊ុនគួរឲ្យគោរពបំផុតក្នុងលោក

2019-01-25 01:59:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងតារាងនៃបញ្ជីឈ្មោះក្រុមហ៊ុនគួរឲ្យគោរពបំផុតទូទាំងសកលលោកប្រចាំឆ្នាំ ២០១៩ លើ Fortune សង្កេតឃើញថា Apple នៅតែរក្សាតំណែងកំពូលបានយ៉ាងល្អក្នុងរយៈពេល ១២ ឆ្នាំជាប់គ្នា។ ក្រុមហ៊ុនមានមូលដ្ឋាននៅទីក្រុង Cupertino បានឆក់យកតំណែងកំពូលគ្រប់ផ្នែកនៅលើបញ្ជី Fortune រួមបញ្ចូលទាំងផ្នែកបង្កើតថ្មី គុណភាពនៃការគ្រប់គ្រង និងគុណភាពផលិតផលសេវាកម្មជាដើម។

Amazon ដែលជាក្រុមហ៊ុនយក្សនៅសហរដ្ឋអាមេរិកក៏ឈរនៅចំណាត់ថ្នាក់ទី ២ រយៈពេលបីឆ្នាំជាប់គ្នា តាមពីក្រោយដោយក្រុមហ៊ុន Berkshire Hathaway, Walt Disney និង Starbucks បិទតំណែង Top 5។ ធៀបនឹងគូប្រជែងលើវិស័យស្មាតហ្វូននិងបច្ចេកវិទ្យា មាន Microsoft និង Alphabet នៅចំណាត់ថ្នាក់ទី ៦/៧ ខណៈ Samsung នៅដល់លេខ ៥០។

សង្កេតឃើញថាក្រុមហ៊ុនមេរបស់ Google គឺ Alphabet បានធ្លាក់ពីលេខ ៣ ដល់លេខ ៧ ធៀបនឹងឆ្នាំចាស់ ខណៈ Facebook ខ្ទាតខ្លាំងពីលេខ ១២ ដល់ ៤៤ បន្ទាប់ពីផ្ទុះរឿងអាស្រូវបែកធ្លាយទិន្នន័យអ្នកប្រើប្រាស់ជាច្រើនលើកច្រើនសារកាលពីឆ្នាំ ២០១៨។ សរុបរួមក្នុងបញ្ជីក្រុមហ៊ុនគួរឲ្យគោរពបំផុតទាំង ១០ ក្នុងនោះមានក្រុមហ៊ុនបច្ចេកវិទ្យាចំនួន ៥។

បញ្ជាក់ថាការចាត់ចំណាត់ថ្នាក់ធ្វើឡើងតាមសំឡេងឆ្នោតពីនាយកប្រតិបត្តិ អ្នកវិភាគ អ្នកដឹកនាំនិងអ្នកជំនាញចំនួន ៣ ៧៥០ រូប ដោយក្នុងមា្នក់ៗមានសិទ្ធជ្រើសយកក្រុមហ៊ុនដែលខ្លួនគិតថាគួរឲ្យគោរពបំផុតចំនួន ១០។