ខ្លោចចិត្ត! មុនអស់ដង្ហើម Aloysius ខំពោលពាក្យ ១ឃ្លានេះទៅម្ដាយទាំងខ្លួនកំពុងឈឺចាប់
- 2019-01-28 04:47:00
- ចំនួនមតិ 0 | ចំនួនចែករំលែក 0
ខ្លោចចិត្ត! មុនអស់ដង្ហើម Aloysius ខំពោលពាក្យ ១ឃ្លានេះទៅម្ដាយទាំងខ្លួនកំពុងឈឺចាប់
ចន្លោះមិនឃើញ
បន្ទាប់ពីមរណភាពរបស់តារាសម្ដែងវ័យក្មេងប្រចាំសិង្ហបុរី Aloysius Pang ទាំងក្រុមគ្រួសារ មិត្តរួមអាជីព និងអ្នកគាំទ្រពិតជាមានការសោកស្ដាយជាពន់ពេករកពាក្យអ្វីមកថ្លែងពុំបាន ព្រោះវាមានរយៈពេលខ្លីពេក។
កាន់តែក្ដុកក្ដួល ទោះបីខ្លួនរងរបួសក៏ដោយ ប៉ុន្តែចិត្តគំនិតរបស់ Aloysius នៅតែបារម្ភគិតពីម្ដាយជានិច្ច។ ម្ដាយរបស់លោក គឺជាមនុស្សតែម្នាក់គត់ដែលបានឃើញសភាពរបស់ Aloysius ពេលសម្រាកព្យាបាលនៅក្នុងមន្ទីរពេទ្យ។ ដោយសារកូនស្ថិតក្នុងសភាពយ៉ាប់យ៉ឺនបែបនេះ អ្នកស្រីយំរហូត ប៉ុន្តែសម្រាប់ Aloysius ជាកូនវិញ ពេលឃើញម្ដាយយំមិនឈប់ ក៏ខំប្រាប់ និងលួងម្ដាយ កុំឲ្យយំ។
និយាយក្នុងពិធីបុណ្យសព កាលពីថ្ងៃអាទិត្យ ទី ២៧ ខែមករាកន្លងទៅ បងប្រុសធំរបស់ Aloysius គឺលោក Jefferson បាននិយាយថា៖ "នៅពេលម្ដាយខ្ញុំយំលើគ្រែរបស់ Aloysius ពាក្យដំបូងដែលគាត់និយាយទៅកាន់ម្ដាយគឺ 'ម៉ាក់ កុំយំ បើម៉ាក់យំ កូនក៏យំដែរ ហើយកូនរឹតតែឈឺចាប់។ ប៉ុន្មានថ្ងៃទៀត កូននឹងឆាប់ជាសះស្បើយឡើងវិញហើយ ហើយចាំកូននាំម៉ាក់ទៅដើរលេងកាស៊ីណូនៅប្រទេសណូវែលហ្សេឡង់'”។
បងប្រុសដដែលបានបន្តថា៖ "អ៊ីចឹងហើយ ពេលខ្ញុំឃើញរូបភាពទាំងនេះ កើតឡើងចំពោះប្អូនខ្ញុំ ខ្ញុំអាចយល់បានថា គាត់មានអារម្មណ៍ឈឺចាប់ណាស់ ហើយមនុស្សសំខាន់ដែលគាត់គិតមុនគេគឺ ម៉ាក់”។
សូមបញ្ជាក់ផងដែរថា តារាសម្ដែង Aloysius Pang បានរងរបួសធ្ងន់ អំឡុងពេលហាត់សមបាញ់កាំភ្លើងនៅប្រទេសណូវែលហ្សេឡង់កាលពីថ្ងៃទី ១៩ ខែមករា។ ថ្ងៃនោះ លោកត្រូវសមហាត់បាញ់កាំភ្លើងជាមួយមិត្តផ្សេងទៀត ប៉ុន្តែជារឿងចៃដន្យគ្រាប់កាំភ្លើងធ្លាយចេញមក តម្រង់ចំទ្រូង និង ពោះរបស់ Aloysius តែម្ដង។ ភ្លាមៗ លោកត្រូវបានបញ្ជូនមកមន្ទីរពេទ្យដើម្បីទទួលការសង្គ្រោះ ប៉ុន្តែដោយសារសភាពធ្ងន់ធ្ងរពេក តារាប្រុសរូបនេះក៏ត្រូវទទួលមរណភាពនៅថ្ងៃទី ២៣ ខែមករា ក្នុងវ័យ ២៨ឆ្នាំ។
លោកគឺជាបុគ្គលម្នាក់ដែលទទួលបានក្ដីស្រឡាញ់ពីសំណាក់មនុស្សជុំវិញខ្លួនជាច្រើន។ តារាប្រុសត្រកូល Pang នេះជាមនុស្សដែលខិតខំធ្វើការមិនខ្លាចនឿយហត់ មានទឹកចិត្តល្អចំពោះអ្នកនៅជុំវិញខ្លួន ជាកូនប្រុសដែលគោរពស្រឡាញ់ឪពុកម្ដាយ និងគោរពអ្នកជុំវិញខ្លួនជានិច្ច។ ការបាត់បង់ Aloysius គឺជាការបាត់បង់ធនធានដ៏សំខាន់ម្នាក់របស់សិង្ហបុរី ក្រោយលោកបានបម្រើជាតិ និងប្រឡូកក្នុងវិស័យសិល្បៈ ដើម្បីបម្រើអារម្មណ៍មនុស្សជាច្រើន ហើយបើទោះលោកឃ្លាតទៅភពផ្សេងទៀតក៏ពិតមែន ប៉ុន្តែស្នាដៃ និងអំពើល្អទាំងឡាយរបស់លោក នឹងស្ថិតក្នុងការចងចាំរបស់មនុស្សគ្រប់គ្នាដែលស្គាល់លោក៕