ផ្ដាំបងប្អូនខ្មែរថែខ្លួនផង! កម្រិតខ្យល់កខ្វក់នៅថៃ កំពុងកើនឡើងដល់កម្រិតគ្រោះថ្នាក់ហើយ
- 2019-01-31 10:15:58
- ចំនួនមតិ 0 | ចំនួនចែករំលែក 0
ផ្ដាំបងប្អូនខ្មែរថែខ្លួនផង! កម្រិតខ្យល់កខ្វក់នៅថៃ កំពុងកើនឡើងដល់កម្រិតគ្រោះថ្នាក់ហើយ
ចន្លោះមិនឃើញ
ទីប្រឹក្សាទទួលបន្ទុកពលករប្រចាំប្រទេសថៃ ចេញសេចក្ដីណែនាំដល់ពលករកម្ពុជាជាពិសេស សូមថែរក្សាសុខភាពឱ្យបានល្អ ដោយត្រូវពាក់ម៉ាសការពារឱ្យបានត្រឹមត្រូវ សម្រាប់បងប្អូនខ្មែរស្នាក់នៅ និងធ្វើការ នៅទីក្រុងបាងកក និងតាមបណ្តាខេត្តរងផលប៉ះពាល់ដោយសារខ្យល់កខ្វក់ PM2.5 នាពេលថ្មីៗនេះ។
សេចក្ដីណែនាំនេះ ក្រោយនាយកដ្ឋានគ្រប់គ្រងការបំពុលបង្ហោះភ្លាមៗលើហ្វេសបុកផ្លូវការថា គុណភាពខ្យល់ក្នុងទីក្រុងបាងកក បានធ្លាក់ចុះខ្លាំងដល់កម្រិតគ្រោះថ្នាក់ដោយមានកម្ទេចធូលីជាច្រើនដែលគេស្គាល់ឈ្មោះថា PM2.5 នៅតំបន់ចំនួន ៤១ជុំវិញទីក្រុង។ ចំណែកឯអង្គការសុខភាពពិភពលោកឲ្យដឹងដែរថា PM2.5 គឺជាភាគល្អិតនៃធូលីដែលមានទំហំតូចជាង ២,៥មីក្រូម៉ែត្រ ហើយត្រូវចាត់ទុកថាមានគ្រោះថ្នាក់បំផុតដោយសារទំហំដ៏តូចរបស់វាអាចចូលជ្រៅទៅក្នុងសួត និងប៉ះពាល់សរីរាង្គផ្សេងទៀត។
អាស្រ័យហេតុនេះ អភិបាលក្រុងបាងកក បានចេញសេចក្តីប្រកាសឱ្យសាលារៀនទាំងអស់ក្នុងទីក្រុងបាងកក និងខេត្តជុំវិញ ចំនួន៤៣៧កន្លែង បិទទ្វារផ្អាកការសិក្សាបណ្តោះអាសន្ន ចំនួន៣ថ្ងៃគឺចាប់ពីថ្ងៃទី៣០ ខែមករា ឆ្នាំ២០១៩ ដល់ថ្ងៃទី១ ខែកុម្ភៈ ឆ្នាំ២០១៩ ដោយសារឥទ្ធិពលខ្យល់កខ្វក់ PM2.5 នៅក្នុងតំបន់ទីក្រុងបាងកកមានការកើនឡើងជាលំដាប់ ដែលបណ្តាលឱ្យប៉ះពាល់ដល់សុខភាព។
ប្រភព៖ ហ្វេសបុកផេក ទីប្រឹក្សាទទួលបន្ទុកពលករប្រចាំប្រទេសថៃ