ប៉ាប៉ា YG ចេញសារសុំទោស ទាក់ទងនឹងករណីផ្ទុះហិង្សាក្នុងក្លឹបរបស់ Seungri

2019-02-01 03:51:28
ចំនួនមតិ 0 | ចំនួនចែករំលែក 0

ចន្លោះមិនឃើញ

ទីបំផុតស្ថាបនិកផលិតកម្ម YG លោក Yang Hyun Suk បានបញ្ចេញសារមួយហើយទាក់ទងនឹងករណីដែលបានកើតឡើងទាក់ទងនឹងក្លឹបរបស់ Seungri។

ដូចប្រិយមិត្តមួយចំនួនជ្រាបស្រាប់ថា ក្លឹបរបស់ Seungri មានឈ្មោះថា Burning Club បានផ្ទុះរឿងរ៉ាវជ្រួលច្របល់ថាមានករណីបៀតបៀនផ្លូវភេទ និងហិង្សា បង្កឡើងដោយបុគ្គលិកក្នុងក្លឹប ហើយក្រុមរក្សាសន្តិសុខក៏បានទាក់ទងទៅ Seungri ដែលជាម្ចាស់ក្លឹបមកដោះស្រាយរឿងនេះ។

ក្រោយហេតុការណ៍នេះ មហាជនមានការងឿងឆ្ងល់ហេតុអ្វី ផលិតកម្ម YG ដែលជាអ្នកមើលការខុសត្រូវ Seungri ស្ងាត់មិនមានយោបល់អ្វីសោះទាក់ទងនឹងបញ្ហានេះ? យ៉ាងណាក្ដីនៅពេលនេះ លោក Yang Hyun Suk បានចេញសារទាក់ទងនឹងករណីដែលបានកើតឡើងនោះ។

ក្នុងសារនោះដែរ ប៉ាប៉ា YG ក៏បានថ្លែងសុំទោសដែរ ដែលចេញមុខយឺតពេលបន្តិច ប៉ុន្តែលោកក៏កំពុងរង់ចាំស្ដាប់ដំណឹងបន្ថែមពី Seungri ដែរ។ ក្នុងសារបានសរសេរថា៖

“មនុស្សម្នាក់គត់ដែលខ្ញុំអាចសួរបានគឺ Seungri ហើយខ្ញុំបានដឹងថានៅថ្ងៃនោះ Seungri បាននៅកន្លែងកើតហេតុរហូតដល់ម៉ោង៣ទៀបភ្លឺ ថ្ងៃទី ២៤ ខែវិច្ឆិកា ហើយរឿងហេតុកើតឡើងម៉ោង ៦ភ្លឺទៅហើយ”

បន្ថែមពីលើនេះ ស្ថាបនិក YG រូបនេះនៅបញ្ជាក់ដែរថា Seungri លែងធ្វើជានាយកប្រតិបត្តិរបស់ក្លឹប Burning Sun ហើយ ប៉ុន្តែមិនមែនដោយសារមានរឿងនោះ ទើប Seungri សម្រេចលាឈប់ទេ។ មូលេហតុពិតក៏ដោយសារ លោកត្រូវទៅបំពេញតួនាទីជាទាហានបម្រើជាតិក្នុងពេលឆាប់ៗ អាចចាខែមីនា ឬខែមេសា។

មួយវិញទៀត លោក Yang ក៏បាននាំពាក្យសុំទោសរបស់ Seungri ជូនអ្នកគ្រប់គ្នាដែរ និងបញ្ជាក់ថា Seungri ក៏ចង់ជម្រាបព័ត៌មាននៃការលាលែងតំណែងរបស់ខ្លួនដែរ ប៉ុន្តែលោក Yang ប្រាប់ថាឲ្យរង់ចាំពេលវេលាសមរម្យសិន៕

ប្រភព៖ sbs ប្រែសម្រួល៖ យី សុធារី