កម្មវិធីទូរសព្ទនិងគេហទំព័រពីប្រវត្តិសាស្ត្រខ្មែរក្រហមស្នាដៃនិស្សិត DMC ដាក់ឲ្យប្រើប្រាស់ផ្លូវការ!

2019-02-04 05:06:00
ចំនួនមតិ 0 | ចំនួនចែករំលែក 0

ចន្លោះមិនឃើញ

កម្មវិធីទូរសព្ទ និងគេហទំព័រស្ដីពីប្រវត្តិសាស្ត្រខ្មែរក្រហមថ្មីមួយ មានឈ្មោះថា «ទីចងចាំ ឬ Mapping Memories Cambodia (MMC) ស្នាដៃនិស្សិតនៃដេប៉ាតឺម៉ង់ប្រព័ន្ធផ្សព្វផ្សាយនិងសារគមនាគមន៍ ត្រូវបានសម្ភោធនិងដាក់ឲ្យដំណើរការជាផ្លូវការហើយ ។

ប្រធានគម្រោងទីចងចាំ ឬ Mapping Memories Cambodia (MMC) កញ្ញា ចាន់ មុយហុង បានពន្យល់អំពីលក្ខណៈពិសេសនៃគម្រោងនេះថា ៖ «កម្មវិធីទូរស័ព្ទ និងគេហទំព័រ ទីចងចាំ ឬ MMC នេះ និយាយអំពីទីតាំងសំខាន់ៗនៃប្រវត្តិសាស្ត្រខ្មែរក្រហម ដោយបង្ហាញទីកន្លែងសំខាន់ៗទាំងនោះ នៅលើផែនទីប្រទេសកម្ពុជាតែម្ដង។

ហើយមកទល់ពេលនេះ យើងបានដៅខេត្តក្រុងក្នុងព្រះរាជាណាចក្រកម្ពុជាបានប្រមាណជា១៨ហើយ មានដូចជា ទីក្រុងភ្នំពេញ ខេត្តព្រះសីហនុ ខេត្តបាត់ដំបង បន្ទាយមានជ័យ សៀមរាប កំពង់ធំ ជាដើម។

ខ្លឹមសារនៅក្នុងកម្មវិធីទូរស័ព្ទ និងគេហទំព័រទីចងចាំនេះ គឺជាការផលិត ដោយនិស្សិតដេប៉ាតឺម៉ង់ប្រព័ន្ធផ្សព្វផ្សាយនិងសារគមនាគមន៍ ជំនាន់ទី១៥ និងទី១៦ ដែលបានខិតខំប្រឹងប្រែងអស់រយៈពេលមួយឆ្នាំសិក្សាកន្លងទៅនេះ ដោយចុះស្រាវជ្រាវផ្ទាល់នៅកន្លែង និងបានសម្ភាសអ្នកនៅរស់រានមានជីវិតពីរបបខ្មែរក្រហម។

ជាមួយគ្នានេះដែរ កញ្ញា មុយហុង ក៏បានឲ្យដឹងពីលក្ខណៈពិសេសៗរបស់កម្មវិធីទូរស័ព្ទ និងគេហទំព័រនេះថា៖

“កម្មវិធីទូរសព្ទ និងគេហទំព័រទីចងចាំ ឬ MMC មានលក្ខណៈពិសេសចំនួន ៥ រួមមាន៖

ទី១៖ វាមានមុខងារនាំផ្លូវអ្នកប្រើប្រាស់ទៅកាន់ទីតាំងប្រវត្តិសាស្ត្រកើតហេតុដោយផ្ទាល់ ដើម្បីឲ្យគាត់បានដឹងរឿងរ៉ាវ ក៏ដូចជាសិក្សាស្រាវជ្រាវប្រវត្តិសាស្ត្រខ្មែរក្រហម តាមរយៈបច្ចេកវិទ្យាជាពហុប្រព័ន្ធផ្សព្វផ្សាយ មានដូចជា អត្ថបទព័ត៌មាន ភាពយន្តឯកសារខ្នាតខ្លី បទយកការណ៍វិទ្យុ កម្រងរូបភាព និងព័ត៌មានមានប្រយោជន៍ជាដើម។
ទី២៖ គ្រប់រឿងរ៉ាវនៅក្នុងពហុប្រព័ន្ធផ្សព្វផ្សាយ គឺធ្វើឡើងជាពីរភាសា។ អ្នកប្រើប្រាស់អាចជ្រើសយកភាសាខ្មែរ ឬ អង់គ្លេស។
ទី៣៖ អ្នកប្រើប្រាស់ ក៏អាចចែករំលែករឿងរ៉ាវរបស់ពួកគេក្នុងសម័យខ្មែរក្រហម មកកាន់គម្រោង ទីចងចាំ ផងដែរ។
ទី៤៖ ស្រដៀងគ្នានឹង Facebook អ្នកប្រើប្រាស់អាចផ្ដល់ជាមតិយោបល់នៅទីតាំងណាមួយ ដែលគាត់ចាប់អារម្មណ៍ ឬប្រាប់នូវព័ត៌មានបន្ថែមទៀតពីតាំងនោះ។
ទី៥៖ ទីចងចាំ មានផ្នែក “ព័ត៌មានមានប្រយោជន៍” ឬ Factbox ដែលជាអត្ថបទខ្លីៗ អំពីព័ត៌មានទាក់ទងនឹងទីតាំងសំខាន់ៗនៅក្នុងរបបខ្មែរក្រហម ដែលបានស្រាវជ្រាវ និងសរសេរឡើងដោយក្រុមការីនិពន្ធរបស់គម្រោងទីចងចាំផ្ទាល់តែម្ដង។

គម្រោងទីចងចាំ ឬ MMC នេះ ប្រើរយៈពេល១៣ខែក្នុងការបង្កើតនូវកម្មវិធីទូរស័ព្ទ និងគេហទំព័រ ដោយលក្ខណៈពិសេសដូចតាមរៀបរាប់ខាងលើនេះ ពោលគឺចាប់កកើត ឡើងនៅខែកុម្ភៈ ឆ្នាំ២០១៨ និងបញ្ចប់គម្រោងនៅខែមីនា ឆ្នាំ២០១៩នេះ។

កញ្ញា មុយហុង បញ្ជាក់ថា បើទោះបីគម្រោងទីចងចាំ ឬ MMC នេះនឹងបញ្ចប់នៅពេលឆាប់ៗនេះ ក៏ពិតមែន តែកម្មវិធីទូរស័ព្ទនិងគេហទំព័រ ទីចងចាំ ឬMMC គឺនៅតែបន្តទៅមុខចែករំលែក ចំណេះដឹងទាក់ទងនឹងរឿងរ៉ាវខ្មែរក្រហមបន្តទៀត ដោយនឹងមានការដាក់បញ្ចូល ស្នាដៃនិស្សិតDMCជំនាន់ក្រោយៗ ដែលមានខ្លឹមសារទាក់ទងនឹងរឿងរ៉ាវ ខ្មែរក្រហមដោយផ្សាភ្ជាប់នឹងទីតាំងលើផែនទីប្រទេសកម្ពុជាផងដែរ។

ក្នុងនាមជាប្រធានគម្រោង ទីចងចាំ ឬMMC កញ្ញា មុយហុង សង្ឃឹមថា នៅពេលខាងមុខនេះ ពួកយើងមានបំណងចង់អភិវឌ្ឍកម្មវិធីទូរស័ព្ទ និងគេហទំព័រ ទីចងចាំ ឬMMC ឲ្យរឹតតែពិសេស និងគួរឲ្យចាប់អារម្មណ៍បន្ថែម ដូចជាការបញ្ចូលនូវមុខងារថ្មីទៀត ដូចជា Gamification ឬ AR ជាដើម ប្រសិនបើ DMC អាចរកបានកញ្ចប់ថវិកាបន្ថែមទៀត។

លោក អ៊ុង ប៊ុនអ៊ី ប្រធានស្ដីទីដេប៉ាតឺម៉ង់ប្រព័ន្ធផ្សព្វផ្សាយនិងសារគមនាគមន៍ (DMC) ក៏ដូចជាអ្នកផ្ដួចផ្ដើមគម្រោង ទីចងចាំ ឬ MMC នេះ ឲ្យដឹងថា៖ “គម្រោងទីចងចាំ ឬ MMC នេះបង្កើតឡើងក្នុងគោលបំណងជំរុញឲ្យយុវជនខ្មែរជំនាន់ក្រោយប្រើប្រាស់បច្ចេកវិទ្យានាពេលបច្ចុប្បន្ននេះ ដើម្បីចុះទៅស្រាវជ្រាវបន្តអំពីព័ត៌មានទាក់ទងនឹងរឿងរ៉ាវខ្មែរក្រហម នៅតំបន់ប្រវត្តិសាស្ត្រទាំងនោះព្រមទាំងបង្កើតការសន្ទនាអំពីប្រវត្តិសាស្ត្រខ្មែរក្រហមក្នុងចំណោមយុវជន និងក្រុមគ្រួសារ”។

ស្របគ្នានេះដែរ លោក អ៊ុង ប៊ុនអ៊ី បានឲ្យដឹងពីមូលហេតុដែលលោកសម្រេចសហការបង្កើតគម្រោង ទាក់ទិននឹងប្រវត្តិសាស្ត្រខ្មែរក្រហមនេះថា៖ « DMC គិតថា ការបន្តការសន្ទនាអំពីប្រវត្តិសាស្ត្រ ខ្មែរក្រហមគឺជាការសំខាន់។ នេះជាមូលហេតុ ដែលប្រធានបទប្រវត្តិសាស្ត្រខ្មែរក្រហម លេចឡើងម្ដងហើយម្ដងទៀត សម្រាប់កិច្ចការនិស្សិតរបស់DMC ក្នុងអំឡុងពេលសិក្សារបស់ពួកគេ។»

ក្នុងនោះផងដែរ លោក ប៊ុនអ៊ី ក៏បានពន្យល់បន្ថែមផងដែរថា៖ “បញ្ហាជាច្រើននៅក្នុងសង្គមកម្ពុជានាពេលបច្ចុប្បន្ន មានឬសគល់ចេញពីសោកនាដកម្ម ដែលបានកើតឡើងនៅរបបខ្មែរក្រហម។ យុវជនជំនាន់ក្រោយត្រូវរៀនពីអតីតកាលរបស់ប្រទេសកម្ពុជា ដើម្បីយល់ថាអតីតកាលមានឥទ្ធិពលលើជីវិតរស់នៅនិងសង្គមរបស់ពួកគេនាពេលបច្ចុប្បន្ន។ ការសន្ទនាគឺជាឧបករណ៍ដ៏សំខាន់មួយ ដល់ការរៀនសូត្ររបស់សាធារណជន និងការផ្សះផ្សាអតីតកាល ជាមួយបច្ចុប្បន្ន។”

ស្នាដៃនៅក្នុងកម្មវិធីទូរស័ព្ទ និងគេហទំព័រ ទីចងចាំ ឬ MMC នេះ មានរឿងរ៉ាវជាច្រើនដែលកើតឡើងក្នុងសម័យខ្មែរក្រហមដូចជា ការរៀបការដោយបង្ខំ ការបង្ខំធ្វើការហួសកម្លាំងដើម្បីសម្រេចគម្រោងទំនប់ធំៗ ការធ្វើទុក្ខបុកម្នេញខាងសាសនា កិច្ចការទូតបរទេសរបស់ខ្មែរក្រហម។

កញ្ញា គួច ម៉ាស៊ី និងសមាជិកក្រុមបានរួមគ្នាផលិតភាពយន្តឯកសារខ្លីមួយឈ្មោះថា “កោះតាង” ដែលនិយាយពីជម្លោះដែនទឹករវាងទ័ពខ្មែរក្រហម និងទ័ពអាមេរិក ក្រោយពេលដែលខ្មែរក្រហមបានឡើងកាន់អំណាច។

កញ្ញាបានរៀបរាប់ថា៖ “តាមរយៈការផលិតវីដេអូឯកសារនេះ ខ្ញុំបានរៀនសូត្រពីការងារបានយ៉ាងច្រើនដូចជា ការចេះសាមគ្គី តស៊ូ និងអត់ធ្មត់ ក្នុងធ្វើការជាក្រុម រៀនពីបច្ចេកទេសផលិតរឿងបានល្អជាងមុន។ហើយអ្វីដែលសំខាន់គឺចេះអំពីប្រវត្តិសាស្ត្រខ្មែរក្រហម។” យ៉ាងណាមិញ កញ្ញា ម៉ាស៊ី ក៏បានលើកឡើងពីបញ្ហាប្រឈម ខណៈពេលដែលក្រុមខ្លួនផលិតភាពឯកសារនេះ មានដូចជា កង្វះឯកសារ និងប្រភពព័ត៌មានជាដើម។”

ក្នុងឱកាសសម្ពោធនេះ ក្នុងនាមជាប្រធានគម្រោង កញ្ញា មុយហុង បានគូសបញ្ជាក់ថា គម្រោងមួយនេះ អាចសម្រេចជារូបរាងបានជោគជ័យដូចពេលនេះ ក៏ព្រោះតែមានកិច្ចខិតខំប្រឹងប្រែងរបស់ ដេប៉ាតឺម៉ង់ប្រព័ន្ធផ្សព្វផ្សាយនិងសារគមនាគមន៍ (DMC) ដោយមានការគាំទ្រ ពីអង្គការសេវាសន្តិភាពស៊ីវិល (ស៊ី.ភី.អេស.) នៃកិច្ចសហប្រតិបត្តិការអាល្លឺម៉ង់ (GIZ) និងមានដៃគូសហការពីមជ្ឈមណ្ឌលឯកសារកម្ពុជា ( DC-Cam) ដែលបានជួយពិនិត្យផ្ទៀងផ្ទាត់ ភាពពិតរបស់ខ្លឹមសារទាំងអស់ក្នុងកម្មវិធីទូរស័ព្ទនិងគេហទំព័រ ទីចងចាំ ឬMMC ព្រមទាំងបានផ្ដល់ជារូបភាពនិងវីដេអូឯកសារពាក់ព័ន្ធនឹងសម័យខ្មែរក្រហម។

ក្នុងនាមជាទីប្រឹក្សារបស់អង្គការសេវាសន្តិភាពស៊ីវិល (ស៊ី.ភី.អេស.)នៃកិច្ចសហប្រតិបត្តិការអាល្លឺម៉ង់ (ជី.អាយ.ហ្ស៊ី.) លោកស្រី Stefanie Duckstein បានឲ្យដឹងពីហេតុផល ដែលជម្រុញឲ្យស៊ី.ភី.អេស.គាំទ្រគម្រោងទីចងចាំនេះថា៖ ដោយស៊ី.ភី.អេស. តែងតែគាំទ្រ DMC ក្នុងការផ្ដល់ជាការអប់រំវិជ្ជាជីវៈលើប្រព័ន្ធផ្សព្វផ្សាយ ហើយទន្ទឹមនឹងនេះ ស៊ី.ភី.អេស.ក៏បានសហការជាមួយអង្គការសង្គមស៊ីវិលក្នុងប្រទេសកម្ពុជា និងស្ថាប័នរដ្ឋាភិបាលក្នុងការអនុវត្តគម្រោងអប់រំស្ដីពីប្រវត្តិសាស្ត្រខ្មែរក្រហម។ ហេតុដូច្នេះ យើងក៏យកឱកាសនេះ បញ្ចូល“ការបណ្ដុះបណ្ដាលនិស្សិតសារព័ត៌មាន និងការបង្កើតជាឧបករណ៍អប់រំ” បញ្ចូលគ្នាតែម្ដង ។

និស្សិតក៏ដូចជាប្រជាជនកម្ពុជាជាច្រើនទៀត គឺកំពុងតែចាប់អារម្មណ៍នឹងបច្ចេកវិទ្យាឌីជីថល ដោយប្រើប្រាស់ស្មាតហ្វូនឬថេប្លេត ក្នុងការទទួលយកព័ត៌មានពីផ្សព្វផ្សាយ។ ដូច្នេះវាហាក់ដូចជាឃើញច្បាស់ណាស់ថា វាជាជម្រើសដ៏ល្អក្នុងការជ្រើសរើសកម្មវិធីស្មាតហ្វូនជាឧបករណ៍ដើម្បីផ្សព្វផ្សាយរឿងរ៉ាវនានាក្នុងសម័យខ្មែរក្រហម។»

ជាចុងក្រោយ ប្រធានស្ដីទីដេប៉ាតឺម៉ង់ប្រព័ន្ធផ្សព្វផ្សាយនិងសារគមនាគមន៍ (DMC) លោក អ៊ុង ប៊ុនអ៊ី បានថ្លែងគំនិតសុទ្ធិនិយមទៅលើគម្រោងនេះថា៖ “កម្មវិធីទូរស័ព្ទនិងគេហទំព័រនេះ នឹងដើរតួជាវេទិកាដ៏សំខាន់មួយសម្រាប់កិច្ចសន្ទនាប្រកបដោយ អត្ថន័យ និងដោយចំហ អំពីប្រវត្តិសាស្ត្រខ្មែរក្រហមសម្រាប់យុវជនជំនាន់ក្រោយរួមទាំងអ្នករស់រានពីរបបខ្មែរក្រហម៕”

ចុចដោនឡូតលើ Play Store | App Store