ហង់ ជួនណារ៉ុន ក្រើនរំលឹកសហព័ន្ធមួយចំនួនដែលអសកម្ម ទទួលតែលុយឧបត្ថម្ភពីក្រសួង
- 2019-02-06 09:52:12
- ចំនួនមតិ 0 | ចំនួនចែករំលែក 0
ហង់ ជួនណារ៉ុន ក្រើនរំលឹកសហព័ន្ធមួយចំនួនដែលអសកម្ម ទទួលតែលុយឧបត្ថម្ភពីក្រសួង
ចន្លោះមិនឃើញ
រដ្ឋមន្ត្រីក្រសួងអប់រំ យុវជន និងកីឡា ក្រើនរំលឹកដល់សហព័ន្ធមួយចំនួនដែលមិនសូវមានសកម្មភាព ធ្វើឲ្យតែបាន ហើយយកតែថវិកាឧបត្ថម្ភប៉ុណ្ណោះ ត្រូវគិតរៀបចំផែនការ និងពង្រឹងសកម្មភាពការងារឡើងវិញ ដើម្បីឈានទៅរកភាពជោគជ័យ ឬឈ្នះមេដាយនានា។
ឯកឧត្ដម ហង់ ជួនណារ៉ុន លើកឡើងក្នុងថ្ងៃបិទកម្មវិធីបូកសរុបការងារអនុវិស័យអប់រំកាយ និងកីឡាថា សម្រាប់សហព័ន្ធកីឡាមួយចំនួន គឺមិនទាន់បានអនុវត្តផែនការ និងមានរបាយការណ៍មិនទាន់សមស្របនៅឡើយទេ ពោលធ្វើឲ្យតែបានប៉ុណ្ណោះ។ សហព័ន្ធមិនមានសកម្មភាព ដូចជាការបណ្ដុះបណ្ដាលល្អត្រឹមត្រូវ មិនមានការចេញទៅហ្វឹកហាត់ ឬទៅប្រកួតនៅក្រៅប្រទេសនោះទេ។
បន្ថែមពីរនេះទៀតនោះ ឯកឧត្ដម បញ្ជាក់ថាមកដល់ពេលនេះសហព័ន្ធទាំងនោះមិនមានការពង្រីកផ្សព្វផ្សាយឲ្យបានទូលំទូលាយនៅឡើយទេ មានត្រឹម២-៣ក្លឹប ឬមានតែនៅភ្នំពេញនោះទេ ដូច្នេះហើយការស្វែងរកធនធានកីឡាករថ្មី ដែលមានសមត្ថភាពក៏មានកម្រិតទៅតាមនោះដែរ។ សហព័ន្ធដែលឈ្នះមេដាយបានច្រើន គឺជាសហព័ន្ធដែលមានសកម្មភាព ឬមានការដឹកនាំ អនុវត្តន៍ផែនការបានល្អ។
ចំពោះសហព័ន្ធដែលនឹងត្រូវចូលរួមក៏កីឡាស៊ីហ្គេម ឆ្នាំ២០២៣ នៅពេលដែលកម្ពុជាធ្វើម្ចាស់ផ្ទះក៏ត្រូវពង្រឹងខ្លួនឲ្យបានល្អដែរទាំងផែនការ និងការអនុវត្តត្រូវឲ្យច្បាស់លាស់។ សហព័ន្ធផ្ទាល់ត្រូវក្ដាប់ឲ្យបានពីសមត្ថភាពកីឡាករ កីឡាការិនីរបស់ខ្លួន និងព្យាយាមស្វែងយល់ពីប្រទេសប្រកួតប្រជែងទាំង៩ផ្សេងៗទៀតដែរ ងាយស្រួលការរៀបចំចាត់ចែងធនធានរបស់ខ្លួនក្នុងដណ្ដើមមេដាយឲ្យបាននៅពេលខាងមុខ។
រំលឹកដែរថា កម្មវិធីប្រជុំបួកសរុបការងារអប់រំកាយ និងកីឡា នេះធ្វើឡើងរយៈពេល ១ថ្ងៃកន្លះ គឺចាប់ពីថ្ងៃទី៤-៥ ខែកុម្ភៈ ឆ្នាំ២០១៩ នៅភោជនីយដ្ឋានទន្លេបាសាក់២។ ចំពោះការអ្នកចូលរួមវិញមានខាងមន្ទីរអប់រំនានា រួមទាំងតំណាងសហព័ន្ធកីឡាផ្សេងៗផងដែរ៕