Sarri និង Pep នឹងប្រើក្បួនដូចគ្នាដោយឲ្យអ្នកនាំលេងចេញពីតំបន់បម្រើកណ្តាល
- 2019-02-10 09:31:40
- ចំនួនមតិ 0 | ចំនួនចែករំលែក 0
Sarri និង Pep នឹងប្រើក្បួនដូចគ្នាដោយឲ្យអ្នកនាំលេងចេញពីតំបន់បម្រើកណ្តាល
ចន្លោះមិនឃើញ
ទាំង Sarri និង Guardiola មានក្បួនលេងស្រដៀងគ្នាដោយគ្រូបង្វឹកទាំង២ចូលចិត្តក្បួនបុរាណរបស់ហូឡង់គឺប្រព័ន្ធ ៤-៣-៣ ដែលទាមទារអ្នកនាំលេងចែកបាល់ចេញពីតំបន់បម្រើកណ្តាល។
នេះជាមូលហេតុដែលគ្រូបង្វឹក Chelsea ចុះកុងត្រានាំយក Jorginho ខណៈលោក Guardiola ធ្លាប់ប្រើ Sergio Busquets នៅ Barcelona ហើយលោកដាក់ Fernandinho ជាអ្នកនាំលេងនៅតំបន់កណ្តាលសម្រាប់ Man City។
ភាពស្រដៀងគ្នាមួយទៀតនៃគ្រូបង្វឹកទាំង២នេះគឺ ចូលចិត្តលេង press (កៀប និង វាយបកគូបដិបក្ខ) ហើយការគ្រប់គ្រងបាល់។
រដូវកាលនេះគ្មានកីឡាករណាប៉ះបាល់នៅ Premier League បានច្រើនជាង Jorginho (២ ២១៩ ប៉ះ) ឡើយ ប៉ុន្តែ Sarri ដឹងថាក្រុមរបស់លោកនឹងមានការលំបាកក្នុងការគ្រប់គ្រងបាល់នៅឯកីឡដ្ឋាន Etihad ។
Sarri និយាយថា ៖"ពួកគេនៅតែអាចលេងបាន ប្រសិនបើយើងបញ្ឈប់ Fernandinho ហើយយើងក៏នៅតែអាចលេងបានដែរប្រសិនបើអ្នកបញ្ឈប់ Jorginho។ យើងមានជម្រើស។ ប្រហែលពួកគេមានជម្រើសច្រើនជាងយើង ព្រោះគេ [Guardiola] លេងនៅទីនេះ៣រដូវកាលហើយ"។
គួរបញ្ជាក់ថា នៅពេលក្លឹប Manchester City លេងទល់នឹង Napoli ក្នុងវគ្គជម្រុះតាមពូលនៃក្របខ័ណ្ឌ Champions League កាលពីរដូវកាលមុន ទិដ្ឋភាពដ៏កម្រកើតមានក្នុងចំណោមគ្រូបង្វឹក បានកើតឡើងរវាងគ្រូបង្វឹកទាំង២នេះ។
Sarri ជាអតីតបុគ្គលិកធនាគារ គឺជាមនុស្សចិត្តសាស្ត្រមិនធម្មតា។ លោកមិនដែលនិយាយបញ្ចើចបញ្ចើឲ្យគូបដិបក្ខឡើយ មានតែសរសើរថាពួកគេជាក្រុមល្អបំផុតគ្រូបង្វឹកល្អបំផុតជាដើម។ គ្រូបង្វឹកដែលបានដឹកនាំ១៨ក្លឹបមកហើយមុនពេលមកដល់ Chelsea ក៏មិនដែលយកសន្និសីទកាសែតក្រោយការប្រកួតមកការពារបរាជ័យខ្លួនដែរ។
កាលណោះជាការឆ្លើយតប Guardiola បានសរសើរទៅអតីតគ្រូ Napoli ថា Sarri គឺជាអ្នកគ្រប់គ្រងដែលទទួលបានជោគជ័យបំផុតនៅលើពិភពលោកក្នុងមួយទសវត្សរ៍ចុងក្រោយនេះ បើទោះជា Sarri មិនដែលដឹកនាំក្លឹបឈ្នះពានសូម្បីម្តង ខណៈ Guardiola ឈ្នះពាន១៤ពីគ្រប់ទីកន្លែង៕