យល់ដឹងបន្ត ពីផ្នែកសំខាន់ៗនៃប្រព័ន្ធបញ្ចុះកម្ដៅរបស់រថយន្ត
- 2019-02-18 05:30:00
- ចំនួនមតិ 0 | ចំនួនចែករំលែក 0
យល់ដឹងបន្ត ពីផ្នែកសំខាន់ៗនៃប្រព័ន្ធបញ្ចុះកម្ដៅរបស់រថយន្ត
ចន្លោះមិនឃើញ
កាលពីអត្ថបទមុន Sabay បាននាំយកអត្ថបទចំណេះដឹងទាក់ទងទៅនឹង ប្រព័ន្ធបញ្ចុះកម្ដៅរបស់រថយន្តម្ដងហើយ តែមិនទាន់បានបញ្ចប់ទាំងស្រុង។ ក្នុងថ្ងៃនេះ មិត្តអ្នកអានអាចតាមដាន ពីផ្នែកដែលនៅសេសសល់ក្នុងប្រព័ន្ធដ៏សំខាន់ក្នុងរថយន្តមួយនេះ ទាំងមូលបាន៖
- ធុងទឹក (Radiator)
ធុងទឹកគឺជាផ្នែកមេ សំខាន់បំផុតក្នុងការបញ្ចុះកម្ដៅម៉ាស៊ីនរថយន្ត ដែលវាជាកន្លែងសម្រាប់ឲ្យសារធាតុបញ្ចុះកម្ដៅហូរឆ្លងកាត់ និងបឺតយកកម្ដៅពីម៉ាស៊ីនរថយន្ត ហើយវាក៏ទទួលខ្យល់ត្រជាក់មកពីខាងក្រៅ ដើម្បីជួយរក្សាសីតុណ្ហភាពកុំឲ្យក្ដៅខ្លាំងលើសកម្រិតផងដែរ។ បើសិនជា រថយន្តប្រើប្រាស់ក្នុងអាកាសធាតុត្រជាក់ ធុងទឹកក៏អាចបញ្ជូនកម្ដៅពីម៉ាស៊ីនចូលមកផ្នែកខាងក្នុងរថយន្តដើម្បីឲ្យកម្ដៅផ្នែកខាងក្នុងបានអ៊ុនៗល្អ។
ស្នប់ទឹក ចាប់ផ្ដើមបូមសារធាតុបញ្ចុះកម្ដៅឲ្យហូរជុំវិញធុងទឹក ហើយទែម៉ូស្តារ និងបញ្ជាឲ្យកង្ហារបឺតខ្យល់ត្រជាក់វិល នៅពេលដែលសីតុណ្ហភាពចាប់ផ្ដើមឡើងក្ដៅខ្លាំង។ ការពិតមួយ ទោះបីជាធុងទឹករថយន្តភាគច្រើនធ្វើពី អាលុយមីញ៉ូម លាយប្លាស្ទិកក៏ដោយចុះ វានៅតែអាចច្រែះដដែល ដោយសារតែអាលុយមីញ៉ូមជាលោហៈ ហើយសារធាតុបង្ការកំណក (Antifreeze) ដែលលាយជាមួយទឹកបង្កើតបានជាសារធាតុបញ្ចុះកម្ដៅនោះ អាចបង្កជាច្រែះនៅផ្នែកខាងក្នុងធុងទឹកបានយ៉ាងងាយ ដែលអាចធ្វើឲ្យមានការលេចធ្លាយចេញពីធុងទឹកបាន។ បើផ្នែកដែលប្រើប្លាស្ទិកនោះ ទោះបីវាមិនមានច្រែះចាប់មែន ប៉ុន្តែវាអាចបែក ប្រេះ តាមស្ថានភាពជាក់ស្ដែង។ ដូចនេះហើយ បានក្រុមហ៊ុនផលិតរថយន្តខ្លះ ណែនាំឲ្យអ្នកប្រើប្រាស់ប្ដូរលាងធុងទឹកចេញ និងប្ដូរសារធាតុបញ្ចុះកម្ដៅចោល រៀងរាល់ ១៦០ ០០០ គ.ម៉ ម្ដង ឬក៏លើសហ្នឹង។ ប៉ុន្តែក៏មានក្រុមហ៊ុនខ្លះទៀត បានប្រាប់ឲ្យត្រឹមតែមើលកម្រិតសារធាតុបញ្ចុះកម្ដៅកុំឲ្យចុះទាបពេក ដោយមិនចាំបាច់ប្ដូរសារធាតុបញ្ចុះកម្ដៅតែម្ដងនោះឡើយ។ បញ្ហាផ្សេងទៀត ដែលធ្វើឲ្យធុងទឹករីងទឹកអស់ ក៏អាចដោយសារតែទុយោភ្ជាប់មកកាន់ធុងទឹកមានប្រហោងលេចធ្លាយ ដែលវាជាបញ្ហាប្រឈមធំផងដែរក្នុងការរក្សាកម្ដៅម៉ាស៊ីនកុំឲ្យក្ដៅខ្លាំងហួសកំណត់។
បើតាមមតិអ្នកជំនាញ យល់ល្អអ្នកប្រើប្រាស់រថយន្តគ្រប់រូប គួរតេស្តមើលពីសារធាតុបញ្ចុះកម្ដៅរថយន្តថាតើវាអាចធ្វើឲ្យឡើងច្រែះលឿនប៉ុណ្ណា ហើយអ្នកគួរឲ្យអ្នកជំនាញឆែកមើលប្រព័ន្ធធុងទឹកនេះ រាល់ ៥ ឆ្នាំម្ដង ឬក៏រាល់ ៨០ ០០០ គ.ម៉ ម្ដង។
- ទុយយោធុងទឹក (Radiator Hose)
ទុយយោធុងទឹក ជាទុយយោកៅស៊ូ ដែលមានមុខកាត់ធំ មានមុខងារសម្រាប់បញ្ជូនសារធាតុបញ្ចុះកម្ដៅចេញចូលរវាង ម៉ាស៊ីន និងធុងទឹក ដោយឆ្លងកាតស្នប់បូមទឹក។ ទុយយោធុងទឹក គួរតែឧស្សាហ៍ត្រួតពិនិត្យ ជៀសវាងការលេចធ្លាយជាយថាហេតុ ដែលវាងាយស្រួលក្នុងការផ្លាស់ប្ដូរ មិនចំណាយប្រាក់ច្រើន។
- ស្នូលកម្ដៅ (Heater Core)
ស្នូលកម្ដៅ ជាធុងទឹកតូចមួយ មានមុខងារសម្រាប់ផ្ដល់កម្ដៅដល់ផ្នែកខាងក្នុងរថយន្ត ដែលវាទាញយកកម្ដៅនោះ ពីសារធាតុបញ្ចុះកម្ដៅពេលវាឆ្លងកាត់ម៉ាស៊ីនរថយន្តហើយ។ ទុយយោនៅក្នុងប្រព័ន្ធបញ្ចុះកម្ដៅរថយន្ត នឹងហូរនាំសារធាតុបញ្ចុះកម្ដៅម៉ាស៊ីន ឆ្លងកាត់ស្នូលកម្ដៅ ដូចដែលវាហូរឆ្លងកាត់ម៉ាស៊ីន និងធុងទឹកធំអ៊ីចឹងដែរ។
បើសិនជា ស្នូលកម្ដៅខូចអ្នកអាចសម្គាល់បានតាមរយៈ ការលេចធ្លាយសារធាតុរាវនៅកន្លែងដាក់ជើង មានចំហាយទឹកចេញមកតាមម៉ាស៊ីនត្រជាក់ និងមានធំក្លិនសារធាតុបញ្ចុះកម្ដៅនៅក្នុងរថយន្ត។ ការជួសជុលគឺអាស្រ័យទៅតាមស្ថានភាពជាក់ស្ដែង ថាតើជាងអាចដោះ ស្នូលកម្ដៅតាមកន្លែងអង្គុយខាងក្នុង ឬក៏រើម៉ាស៊ីនខាងមុខ ដើម្បីយកវាចេញមកក្រៅ។
- ទុយយោកម្ដៅ (Heater Hose)
ទុយយោកម្ដៅគឺជាទុយយោកៅស៊ូ ដែលបង្ហូរសារធាតុបញ្ចុះកម្ដៅចេញ និងចូលពីស្នូលកម្ដៅ ដែលជាធុងទឹកតូចមួយ មានមុខងារផ្ដល់កម្ដៅដល់ផ្នែកខាងក្នុងរថយន្ត។ ទុយយោនេះភាគច្រើនតភ្ជាប់ពី ម៉ាស៊ីនរហូតដល់ចុងជញ្ជាំងខណ្ឌម៉ាស៊ីន ទល់ផ្នែកខាងក្នុងរថយន្ត។ ទុយយោកម្ដៅនេះ មានតម្លៃមិនសូវជាថ្លៃប៉ុន្មានទេ ប៉ុន្តែបើសិនជាអ្នកទិញមកប្ដូរ ត្រូវរក្សាទុកនៅកន្លែងមានស្ថានភាពល្អ មិនសើម មិនក្ដៅឬត្រជាក់ពេក មិនត្រូវពន្លឺថ្ងៃ ដើម្បីការពារកុំឲ្យមានប្រហោងលេចធ្លាយជាយថាហេតុ។
ចុចអាន៖