មើលឱ្យដឹងរវាងមនុស្សល្អពិត និងល្អក្លែងក្លាយ កុំឲ្យលង់ជឿខុសនាំខកចិត្ត

2019-02-19 12:49:21
ចំនួនមតិ 0 | ចំនួនចែករំលែក 0

ចន្លោះមិនឃើញ

មនុស្សយើងមិនគួរចេះតែដើរសេពគប់មនុស្សគ្រប់គ្នាមិនរើសមុខនោះទេ ព្រោះបើដើរចូលខុសមនុស្ស ចំប្រភេទបោកប្រាស់ ឬដើរខ្សែលើយើងនោះ អាចនាំគ្រោះ ឬ ខូចឈ្មោះពិបាកស្រោចស្រង់ណាស់។ តែធម្មតារស់នៅក្នុងសង្គម មិនអត់ទេ ឱកាសដែលអ្នកអាចជួបស្គាល់មនុស្សប្រភេទនេះ។ ដូច្នេះយល់ល្អ គួររៀនចេះមើល និងបែងចែកឲ្យច្បាស់រវាងមនុស្សល្អ និងល្អក្លែងក្លាយ ពេលខ្លះបើជ្រុលជាស្គាល់ហើយក្តី បើដឹងទាន់ កុំបណ្តោយខ្លួនទៅស្និតស្នាលឲ្យសោះ។

ចំណុចដែលមនុស្សល្អក្លែងក្លាយ ខុសប្លែកពីមនុស្សល្អពិត មានដូចជា៖

១. គោរពតែអ្នកធំ មើលងាយអ្នកតូច៖ មនុស្សល្អពិតតែងតែគោរពនិងឱ្យតម្លៃគ្រប់គ្នាជុំវិញខ្លួន។ រីឯមនុស្សលាក់ពុតវិញគោរពតែមនុស្សដែលមានអំណាច និងមានផលប្រយោជន៍ឱ្យខ្លួន ហើយតែងតែមើលងាយអ្នកទន់ខ្សោយ ដែលគេគិតថាគេមិនដល់ខ្លួន។

២. គ្មានជំហរផ្ទាល់ខ្លួន តែៗស្ករ ៗ ហៃអើយតាមគេ៖ មនុស្សល្អពិតមិនងាយធ្វើអ្វីដើម្បីតម្រូវចិត្តអ្នកដទៃ បើសិនរឿងនេះខុសពីឆន្ទៈរបស់គេ។ គេចូលចិត្តធ្វើអ្វីដែលជាខ្លួនគេដោយមិនគិតពីសម្ដីអ្នកដទៃ។ ចំណែកឯមនុស្សល្អលាក់ពុតវិញច្រើនតែខ្វាយខ្វល់ខ្លាចអ្នកដទៃដឹងពុតខ្លួន ហើយអាចធ្វើអ្វីគ្រប់យ៉ាងដើម្បីឲ្យខ្លួនឯងមានចំណែកក្នុងកែវភ្នែកអ្នកដទៃ ចូលចិត្តតែហៃអើ តែៗស្ករៗ។

៣. អួតអាង សម្ញែង ឥទ្ធិពល និងទ្រព្យសម្បត្តិ៖ មនុស្សគេល្អពិតមិនដែលនិយាយពីខ្លួនគេ ឬនិយាយពីអ្វីដែលគេមាន និងបានធ្វើនោះទេ។ គេតែងលាក់ទុកម្នាក់ឯង ហើយគិតថារឿងបែបនេះមិនចាំបាច់ទៅដើរនិយាយប្រាប់ឱ្យគេដឹងទេ។ សម្រាប់មនុស្សល្អក្លែងក្លាយវិញតែងតែអួតប្រាប់គេពីអ្វីដែលខ្លួនមានពេលខ្លះលើសពីការពិត ដើម្បីឱ្យគេចាប់អារម្មណ៍ និងស្ងើចសរសើរខ្លួន។

៤. និយាយពីមុខអ្នកផ្សេង ពីក្រោយផ្សេង៖ បើសិនជាមានអ្វីចង់និយាយមនុស្សល្អពិត ច្រើននិយាយចំពីមុខដោយមិនលាក់បាំង តែជាសម្ដីស្មោះត្រង់បែបគិតគូ និងមានសន្តានចិត្ត។ ប៉ុន្តែមនុស្សល្អផ្លែល្វាវិញច្រើនតែមានមុខពីរ នៅពីមុខអ្នកគេនិយាយល្អរហូត តែនៅពីក្រោយវិញគេមិនដែលនិយាយល្អនោះទេ ហើយចូលចិត្តបញ្ចេញបញ្ចូលលើសពីការពិតទៀត។

៥. បានតែសម្តី តែធ្វើមិនបាន ហើយសម្បូរលេសមិនចេះចប់៖ មនុស្សល្អខិតខំប្រឹងប្រែងធ្វើឱ្យបានល្អបំផុតជាជាងចំណាយពេលនិយាយ និងសន្យាពីនេះពីនោះ។ រីឯមនុស្សបានតែមាត់ គឺជាមនុស្សប្រភេទផ្លែល្វា គេចូលចិត្តសន្យាហើយធ្វើមិនបាន និងមានលេសមិនចេះចប់។

៦. ចូលចិត្តបង្អាប់អ្នកដទៃ រួចលើកតម្កើងខ្លួនឯង៖ មនុស្សល្អច្រើនតែសរសើរ និងអំណរនឹងការរីកចម្រើនរបស់អ្នកដទៃ។ គេគិតថាគេមិនល្អគ្រប់គ្រាន់ និងត្រូវរៀនពីអ្នកដទៃដើម្បីអភិវឌ្ឍខ្លួនបន្ថែម។ ចំណែកមនុស្សផ្លែល្វាចូលចិត្តរិះគន់អ្នកដទៃជានិច្ច ដើម្បីបង្ហាញថាខ្លួនគ្រាន់បើ ហើយសប្បាយចិត្តពេលឃើញគេបរាជ័យ។

៧. ជួយគេយកមុខមាត់៖ មនុស្សល្អពិតគេតែងមានសន្តានចិត្ត ជួយមនុស្សគ្រប់គ្នាតាមលទ្ធភាពដោយឥតលក្ខខណ្ឌ ហើយក៏មិនសូវប្រកូកប្រកាសយកមុខមាត់ដែរ។ រីឯមនុស្សល្អលាក់ពុតជួយតែអ្នកណាដែលអាចផ្តល់ប្រយោជន៍ឱ្យខ្លួនវិញប៉ុណ្ណោះ ហើយតាំងដើរនិយាយប្រាប់គេឯងគ្រប់គ្នាថាគេបានជួយច្រើនជាដើម៕

ប្រភព៖ Kanha ប្រែសម្រួល៖ លីដា