Apple ធ្លាក់ពីលេខ ១ នៅត្រឹមលេខ ១៧

2019-02-22 07:50:53
ចំនួនមតិ 0 | ចំនួនចែករំលែក 0

ចន្លោះមិនឃើញ

Fast Company ដែលជាទស្សនាវដ្ដីវាយតម្លៃឈានមុខមួយ បានចេញផ្សាយបញ្ជីថ្មីប្រចាំឆ្នាំ ២០១៩ ដែលស្ដីអំពីក្រុមហ៊ុនច្នៃប្រឌិតជាងគេទាំង ៥០ នៅលើពិភពលោក ដោយជាលទ្ធផល Apple បានធ្លាក់ពីតំណែងកំពូលលេខ ១ មកនៅត្រឹមលេខ ១៧ វិញ។

តាមការចេញផ្សាយខាងលើ ក្រុមហ៊ុនដែលច្នៃប្រឌិតជាងគេសម្រាប់ឆ្នាំ ២០១៩ នេះគឺក្រុមហ៊ុនចិន Meituan Dianping ដែលបានធ្វើឲ្យរីកចម្រើនលើសេវាកក់ និងដឹកជញ្ជូនដូចជាចំណីអាហារ សណ្ឋាគារ និងសំបុត្រកុនជាដើម។ ក្នុងឆ្នាំ ២០១៨ ក្រុមហ៊ុននេះមានការទូទាត់សាច់ប្រាក់ចំនួន ៣៣,៨ ពាន់លានដុល្លារ សម្រាប់មនុស្សជាង ៣៥០ លាននាក់ ក្នុងទីក្រុងចំនួន ២ ៨០០។

ក្រុមហ៊ុនផ្សេងទៀតដែលស្ថិតនៅតំណែងកំពូលមានដូចជា Grab, NBA, The Walt Disney Company និង Stitch Fix ជាដើម។ Square, Oatly, Twitch, Shopify និង Alibaba Group របស់លោក Jack Ma ក៏ស្ថិតនៅចំណាត់ថ្នាក់ខ្ពស់ជាង Apple ផងដែរ។

Fast Company បានលើកឡើងថា សម្រាប់ឆ្នាំ ២០១៨ ផលិតផលអស្ចារ្យថ្មីរបស់ Apple មិនមែនជា iPhone ឬ Tablet នោះទេ ប៉ុន្តែជាបន្ទះឈីប។ បន្ទះឈីប A12 Bionic ដែលចេញកាលពីចុងឆ្នាំមុន គឺជាបន្ទះឈីបដំបូងគេដែលមានទំហំត្រឹម ៧ ណាណូម៉ែត្រ ដែលផ្ដល់ដំណើរការប្រសើរជាងមុន និងសន្សំសំចៃថាមពល។

គួរដឹងថាតំណែងលេខ ១ ដែល Apple អាចទទួលបានកាលពីឆ្នាំទៅ គឺដោយសារផលិតផលដូចជា iPhone X, Apple Watch Series 3, ARKit និង CareKit រួមទាំង ResearchKit។

ការចាត់ថ្នាក់នេះដែរ Fast Company បានឲ្យដឹងថា ធ្វើឡើងដោយមានការស្ទង់មតិលើក្រុមហ៊ុនរាប់ពាន់ ដើម្បីលើវិភាគផលិតផលដែលច្នៃប្រឌិតបំផុតរបស់ពួកគេប្រចាំឆ្នាំ និងតាមដានការជះឥទ្ធិពលនៃផលិតផលទាំងនោះលើមុខជំនួញ និងក្នុងសហគ្រាសជាដើម៕

ចុចអាន៖

ប្រភព៖ macrumors ប្រែសម្រួល៖ សុខហេង