ករណីឆ្កែឆ្កួតខាំ តើលោកអ្នកអាចទៅចាក់ថ្នាំ នៅកន្លែងណាខ្លះ?
- 2019-02-23 03:35:37
- ចំនួនមតិ 0 | ចំនួនចែករំលែក 0
ករណីឆ្កែឆ្កួតខាំ តើលោកអ្នកអាចទៅចាក់ថ្នាំ នៅកន្លែងណាខ្លះ?
ចន្លោះមិនឃើញ
មនុស្សម្នាជាច្រើនកុះករបានបន្តប្រជ្រៀតគ្នាពីគ្រប់ទិសទី សម្រុកមកវិទ្យាស្ថានប៉ាស្ទ័រកម្ពុជា ដើម្បីចាក់វ៉ាក់សាំងបង្ការ ការពារជំងឺឆ្កែឆ្កួតខាំ ដោយក្នុងនោះមានទាំងអ្នកធ្លាប់ត្រូវបានសត្វឆ្កែ ឆ្មាខាំ ក្រញៅតាំងពីជាងបីបួនឆ្នាំមុនមកម្ល៉េះក៏មាន។ ការផ្អើលសម្រុកមកទទួលវ៉ាក់សាំងដ៏ច្រើននេះ គឺកើតមានឡើង បន្ទាប់ពីមានក្មេងស្រីម្នាក់បានស្លាប់នៅខេត្តស្វាយរៀង និងម្នាក់ទៀតនៅខេត្តកំពង់ចាមដោយសង្ស័យថា ឆ្កែ និងឆ្មាខាំ។ និយាយដាច់ដោយឡែកតែករណីឆ្កែឆ្កួតខាំ តើអាចទៅចាក់ថ្នាំនៅកន្លែងណាខ្លះ?
ក្នុងករណីឆ្កែឆ្កួតខាំ បងប្អូនអាចមកកាន់វិទ្យាស្ថានប៉ាស្ទ័រកម្ពុជា ដែលមានទីតាំងស្ថិតនៅតាមបណ្តោយមហាវិថីព្រះមុនីវង្ស ក្បែរមន្ទីរពេទ្យកាល់ម៉ែត្ររាជធានីភ្នំពេញ និងនៅខេត្តបាត់ដំបង គឺនៅមជ្ឈមណ្ឌលបង្ការជំងឺឆ្កែឆ្កួត។ មជ្ឈមណ្ឌលនេះទើបបង្កើតឡើងកាលពីឆ្នាំ២០១៨ មានទីតាំងស្ថិតនៅក្បែរមន្ទីរពេទ្យបង្អែកខេត្ត ក្នុងក្រុងបាត់ដំបង ដោយមានថ្នាំបង្ការមានលក្ខណៈស្តង់ដារដូចនៅភ្នំពេញដែរ។
លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាលបានមានប្រសាសន៍ថា ជំងឺឆ្កែឆ្កួតនេះ អាចឆ្លងមកមនុស្សបានតាមរយៈសត្វឆ្កែ ឆ្មា ជ្រូក ស្វា និងប្រចៀវ ខាំ។ បើក្នុងករណី មានសត្វទាំងអស់ខាងលើខាំនោះ ត្រូវលាងមុខរបួស ជាមួយអាល់កុល ឬថ្នាំបេតាឌិន(ថ្នាំក្រហម) ហើយត្រូវទៅកាន់មន្ទីរពេទ្យជាបន្ទាន់ ដើម្បីព្យាបាល។ ម្យ៉ាងទៀត ដំណាក់កាល នៃសត្វខាងលើខាំនេះ អ្នករបួស មិនត្រូវយករបស់អ្វី ដូចជា បាយកក ឬត្រាវ (តាមជំនឿបូរាណ) មកបិតមុខរបួសនោះឡើយ ព្រោះអាចនាំឱ្យគ្រោះថ្នាក់បាន។
ទាក់ទងនឹងមនុស្សម្នាជាច្រើនផ្អើលទៅទទួលវ៉ាក់សាំងច្រើននៅវិទ្យាស្ថានប៉ាស្ទ័រកម្ពុជា លោកជំទាវវេជ្ជ ឱ វណ្ណឌីន រដ្ឋលេខាធិការក្រសួងសុខាភិបាល មានប្រសាសន៍ទៀតថា ការទៅទទួលវ៉ាក់សាំងការពារជំងឺឆ្កែឆ្កួតជារឿងល្អ និងជាកិច្ចការពារមួយ តែក្នុងកាលៈទេសៈនេះគួរកុំបារម្ភពេក ពិសេសប្រជាពលរដ្ឋ ដែលមិនទាន់ឆ្កែខាំ ឬឆ្មាក្រញៅ អាចរង់ចាំពេលវេលាសមស្របណាមួយ ដើម្បីផ្ដល់ឱកាសដល់ កុមារ ស្រ្តីមានផ្ទៃពោះ និងអ្នកត្រូវមកទទួលចាក់វ៉ាក់សាំងឱ្យគ្រប់ដូស។ ចំពោះអ្នកដែលធ្លាប់បានឆ្កែ ឬឆ្មា ខាំ ក្នុងរយៈពេលពី ១ខែ ឡើងទៅ គឺមិនមានបញ្ហាអ្វីនោះ។
ចំណែកលោកវេជ្ជបណ្ឌិត អ៊ុក វិទ្យា អនុប្រធានមន្ទីរសុខាភិបាលខេត្តបាត់ដំបង និងជាអ្នកទទួលបន្ទុកការងារគ្រប់ គ្រងមជ្ឈមណ្ឌលបង្ការជំងឺឆ្កែឆ្កួត ឱ្យដឹងថា ដោយសារមជ្ឈមណ្ឌលនេះ ទើបនឹងសម្ពោធដាក់ឲ្យប្រើប្រាស់មិនដល់មួយឆ្នាំផងនោះ ទើបធ្វើឲ្យប្រជា ពលរដ្ឋមួយចំនួនមិនដឹង និងបានសុំអធ្យាស្រ័យចំពោះបងប្អូនប្រជាពលរដ្ឋ ដែលបាននាំកូនចៅមកចាក់ថ្នាំបង្ការជំងឺឆ្កែឆ្កួត ក្នុងមជ្ឈមណ្ឌលមានចំនួនច្រើន ហើយការផ្តល់សេវាអាចមានភាពយឺតយ៉ាវ ព្រោះថា ការចាក់មានកំណត់ ក្នុង១ថ្ងៃត្រឹមតែ ១០០នាក់ ប៉ុណ្ណោះ។ គ្រូពេទ្យនឹងផ្ដល់អាទិភាពសម្រាប់មនុស្ស ដែលត្រូវបានឆ្កែ ឬឆ្មាខាំ ត្រឹមរយៈពេល៧ថ្ងៃ តែបើលើសពីនោះ ត្រូវពិនិត្យជំងឺបន្ថែមសិន។
ឆ្កែ ដែលមកខាំមនុស្ស មិនប្រាកដថាឆ្កែនោះឆ្កួត ហើយក៏មិនប្រាកដថាវាអាចចម្លងជំងឺឆ្កែឆ្កួតមកមនុស្សដែរ។ ប៉ុន្តែដើម្បីចៀសវាងគ្រោះថ្នាក់ បង្កឡើងដោយការខាំត្រូវរួសរាន់លាងរបួស និងទៅរកថ្នាំបង្ការ។ ជំងឺឆ្កែឆ្កួត ជាជំងឺកាចសាហាវបំផុតក្នុងចំណោមជំងឺដែលគេស្គាល់ និងគ្មានថ្នាំព្យាបាលទេ។ បើគ្មានការសង្គ្រោះទាន់ពេលវេលាទេ ជំងឺនេះនឹងនាំទៅរកសេចក្ដីស្លាប់ ១០០%។ ប៉ុន្តែគេអាចបង្ការវាយបាន ១០០% មិនឱ្យមេរោគឆ្លងមកមនុស្សបានដោយការចាក់ថ្នាំបង្ការ បន្ទាប់ពីមានរបួសបង្កឡើងដោយសត្វខាំ។ វីរុសជំងឺឆ្កែឆ្កួត អាចមានបង្ករោគលើសត្វស្រុក និងសត្វព្រៃ ចម្លងមកមនុស្សតាមរយៈទឹកមាត់ និង បណ្ដាលឱ្យមានរោគសញ្ញាប្រព័ន្ធប្រសាទ៕