ពិព័រណ៍ត្បូងពេជ្រនៅបាងកកទាក់ទាញអតិថិជនមកពី១៣០ប្រទេសជុំវិញពិភពលោក
- 2019-02-25 09:50:47
- ចំនួនមតិ 0 | ចំនួនចែករំលែក 0
ពិព័រណ៍ត្បូងពេជ្រនៅបាងកកទាក់ទាញអតិថិជនមកពី១៣០ប្រទេសជុំវិញពិភពលោក
ចន្លោះមិនឃើញ
នាយកដ្ឋានផ្សព្វផ្សាយពាណិជ្ជកម្មអន្តរជាតិ នៃក្រសួងធុរកិច្ច នៃព្រះរាជាណាចក្រថៃបានរៀបចំពិព័រណ៍ត្បូងពេជ្រលើកទី៦៣ ក្រោមពាក្យស្លោក "ដៃវេទមន្តនៃប្រទេសថៃ" កាលពីថ្ងៃទី២០ ដល់២៤ ខែកុម្ភៈ ឆ្នាំ២០១៩ នៅសាលពិព័រណ៍ Impact Muang Thong Thani ស្ថិតនៅទីក្រុងបាងកក។
ពិព័រណ៍នេះ ទទួលបានការចាប់អារម្មណ៍យ៉ាងខ្លាំងពីសំណាក់អ្នកជំនួញជាង២ម៉ឺននាក់ និងអាចទាក់ទាញអតិថិជន អ្នកនិយមគ្រឿងអលង្ការ និងត្បូងពេជ្រ មកពី១៣០ប្រទេសផ្សេងគ្នានៅជុំវិញពិភពលោក ក្នុងនោះក៏មានស្តង់ដែលជាអ្នកជំនួញមកពី ប្រទេសកម្ពុជាផងដែរ។
ខុសពីឆ្នាំមុនៗ សម្រាប់ឆ្នាំ២០១៩នេះ ពិព័រណ៍ត្បូងពេជ្ររបស់ថៃបានទទួលកិត្តិយសចូលរួមសម្ពោធពីសំណាក់ម្ចាស់ក្សត្រី Sirivannavari Nariratana។ ពិព័រណ៍ត្បូងពេជ្រដែលទើបបញ្ចប់កាលពីថ្ងៃម្សិលមិញបានបើកទ្វារ២ថ្ងៃដំបូងសម្រាប់អ្នកជំនួញមកពីបណ្ដាប្រទេសនានាមកសាកសួរព័ត៌មាន និងទំនាក់ទំនងការងាររកស៊ីផ្សេងៗជាមួយគ្នា ហើយ៣ថ្ងៃទៀតគឺសម្រាប់ឲ្យសាធារណជនទូទៅចូលទិញគ្រឿងអលង្ការ និងត្បូងពេជ្រដែលពួកគេពេញចិត្ត។
ពាណិជ្ជកម្មលើត្បូងពេជ្រដើរតួយ៉ាងសំខាន់ក្នុងការរួមចំណែកធ្វើឲ្យសេដ្ឋកិច្ចថៃរីកលូតលាស់ ដោយក្នុងឆ្នាំ២០១៨ ការនាំចេញលើវិស័យនេះមានទំហំទឹកប្រាក់ប្រមាណ ១១,៩៧៧លានដុល្លារអាមេរិក ឬប្រមាណ ៤,៧៤ភាគរយនៃការនាំចេញសរុបរបស់ថៃ។ ក្រៅពីនោះវាបានបង្កើតការងារដល់ប្រជាជនថៃប្រមាណ ១,២លាននាក់។
នៅក្នុងឆ្នាំ២០១៨ ថៃត្រូវបានចាត់ថ្នាក់លេខ១៤ជាប្រទេសដែលមានសកម្មភាពនាំចេញត្បូងពេជ្រច្រើនបំផុតក្នុងពិភពលោក។ ទីផ្សារសំខាន់ៗរបស់ថៃមានដូចជា៖ កម្ពុជា, សិង្ហបុរី, អាល្លឺម៉ង់, ចិន, សហរដ្ឋអាមេរិក, ប៊ែលហ្សិក និងបណ្ដាប្រទេសជាច្រើនទៀត៕