៧ជំហានជួយអ្នកឲ្យធ្វើការសម្រេចចិត្តរឿងជីវិតបានល្អ មិនភ័យខ្លាចស្តាយក្រោយ

2019-02-28 00:44:21
ចំនួនមតិ 0 | ចំនួនចែករំលែក 0

ចន្លោះមិនឃើញ

ពីមួយថ្ងៃទៅមួយ អ្នកត្រូវធ្វើការសម្រេចចិត្តជាច្រើនរាប់មិនអស់ ខ្លះជារឿងតូចតាចរហូតដល់អ្នកចាំមិនបាន ខ្លះក៏ធំរហូតធ្វើឲ្យអ្នកមិនដឹងគួរសម្រេចចិត្តដោយរបៀបណាក៏មាន។ នេះគឺជីវិត បើសិនជាអ្នកកាន់តែចង់ខ្ពស់មុខ ខ្ពស់មាត់ ការសម្រេចចិត្តធំក៏ត្រូវមកទន្ទឹមគ្នាដែរ។ ដើម្បីជួយឲ្យខ្លួនឯងអាចធ្វើការសម្រេចចិត្តបានត្រឹមត្រូវដោយមិនប្រឈមនឹងការស្ដាយក្រោយ មានវិធាន ៧ ដែលអ្នកត្រូវធ្វើតាម ៖

១. តាំងស្មារតីឲ្យនឹងនជាមុនសិន៖ ធម្មតាពេលត្រូវធ្វើការសម្រេចចិត្តរឿងធំដុំម្ដងៗ យើងតែងមានអារម្មណ៍ជ្រួលច្របល់ ដោយសារការភ័យខ្លាច និងបារម្ភថាខ្លួនសម្រេចចិត្តខុស។ ត្រូវចាំថាធ្វើការសម្រេចចិត្តទាំងអន្ទះសា ពេលខឹងស្របាល ពេលភ័យខ្លាច បារម្ភជ្រុល ច្រើនតែខុស។ អ្នកត្រូវធ្វើចិត្តឲ្យស្ងប់ជាមុនសិន ទើបអាចគិតថ្លឹងថ្លែងបញ្ហាបានត្រូវល្អ។

២. ស្គាល់បញ្ហាឲ្យបានជាក់លាក់៖ ត្រូវត្រឹះរិះពិចារណាថាការសម្រេចចិត្តមួយនេះ នឹងមានឥទ្ធិពលបែបណាខ្លះមកលើជីវិតអ្នក វានឹងផ្លាស់ប្ដូរអ្វីខ្លះ ហើយវានឹងទៅបង្កើតឱកាសវិជ្ជមាន និងអវិជ្ជមានអ្វីខ្លះ។

៣. ប្រមូលព័ត៌មានដែលពាក់ព័ន្ធ ឲ្យបានច្រើនបំផុត៖ សួរខ្លួនឯងថាតើត្រូវដឹងរឿងអ្វីខ្លះជុំវិញបញ្ហានោះដើម្បីធ្វើការសម្រេចចិត្តឲ្យបានត្រឹមត្រូវ ហើយបន្ទាប់មកចាប់ផ្ដើមប្រមូលព័ត៌មាន ឲ្យបានច្រើនបំផុត ហើយសិក្សាវាឲ្យអស់។ ពិសេសគឺត្រូវមើលលើករណីដែលស្រដៀងគ្នានឹងស្ថានភាពរបស់អ្នក ថាឥលូវគេទទួលបានលទ្ធផលបែបណាហើយ។

(រូបតំណាង)

**៤. រកមើលជម្រើសឲ្យបានច្រើន** ៖ បេះដូងរបស់មនុស្សយើងច្រើនលំអៀងពេលគេស្រលាញ់អ្វីមួយ ដែលធ្វើឲ្យគេមើលមិនឃើញជម្រើសផ្សេងទៀត ដែលសក្ដិសមសម្រាប់ខ្លួនឯងពិតប្រាកដ។ ដូច្នេះបើមិនចង់ស្ដាយក្រោយ គួរសួរខ្លួនឯងថាតើអាចធ្វើអ្វីបានខ្លះទៀតក្រៅពីអ្វីដែលខ្លួនកំពុងពេញចិត្តនេះ ? ការស្គាល់ច្បាស់ពីជម្រើសផ្សេងទៀត វាក៏អាចជួយអ្នកឲ្យដឹងថាតើសកម្មភាពមួយណាជាមធ្យោបាយល្អបំផុតដើម្បីសម្រេចគោលដៅរបស់អ្នកដែរ។

៥. ថ្លឹងថ្លែង និងវាយតម្លៃ៖ វិភាគទិន្នន័យដែលពាក់ព័ន្ធ រួចហើយប្រមើលមើលលទ្ធផលដែលអ្នកនឹងទទួលបាន ថ្លឹងវាជាមួយនឹងគោលដៅដែលអ្នកចង់បាន និងទុនដែលអ្នកត្រូវចាយក្រោយធ្វើការសម្រេចចិត្តមួយនោះ។ អ្នកក៏ត្រូវប្រមើលមើលបញ្ហាផ្សេងៗដែលអាចកើតមានឡើងព្រមជាមួយគ្នាដែរ ដើម្បីត្រៀមខ្លួនប្រឈមជាមួយវាបានល្អ។

៦. សម្រេចចិត្តដោយម៉ឹងមាត់៖ ពេលច្បាស់ថាខ្លួនមានព័ត៌មានគ្រប់គ្រាន់ក្នុងដៃហើយ ល្មមអាចសម្រេចចិត្តបានដោយមិនរុញរា។ ជាមួយគ្នានោះដែលអ្នកក៏អាចដឹងច្បាស់ថាការសម្រេចចិត្តមួយនោះ ត្រូវការធនធាន និងអ្នកណាខ្លះដើម្បីជួយគាំទ្រដើម្បីឲ្យការសម្រេចចិត្តនេះផ្ដល់ផ្លែផ្កាសមតាមបំណង។

៧.បន្ធូរសម្ពាធ និងពិនិត្យឡើងវិញ៖ ត្រូវចាំថាក្នុងលោកនេះគ្មានអ្វីដែលល្អឥតខ្ចោះនោះទេ គ្រប់ជម្រើស និងការសម្រេចចិត្តរបស់អ្នកក៏ដូច្នេះដែរ សំខាន់បើអ្នកបានប្រើការគិតឲ្យបានដិតដល់មុនសម្រេចចិត្ត វានឹងអាចកាត់បន្ថយការប្រថុយប្រថានបានច្រើន។ ហើយអ្នកនឹងមិនមានអារម្មណ៍ថាស្ដាយក្រោយឡើយទោះនឹងមានអ្វីកើតឡើងនៅពេលក្រោយ ព្រោះអ្នកបានធ្វើល្អបំផុតអស់ពីលទ្ធភាពហើយ៕