បវរកញ្ញាអាស៊ីប៉ាស៊ីហ្វិកកម្ពុជា ខា អានឆានី បង្ហើបក្តីស្រមៃខំប៉ងជាយូរក្នុងពិភពសិល្បៈ

2019-03-05 07:45:00
ចំនួនមតិ 0 | ចំនួនចែករំលែក 0

ចន្លោះមិនឃើញ

បវរកញ្ញាអាស៊ីប៉ាស៊ីហ្វិកកម្ពុជា ខា អានឆានី បានបង្ហើបពីក្ដីបំណងរបស់ខ្លួនថា ចង់សម្ដែងភាពយន្ត ដើម្បីបង្ហាញទេពកោសល្យជូនទស្សនិកជន និងអ្នកគាំទ្រទាំងអស់។

ជាស្រីស្អាត ធ្លាប់ឆ្លងកាត់ការប្រលងសម្រស់នៅលើឆាកអន្តរជាតិ ក្នុងប្រទេសហ្វីលីពីនកាលពីថ្មីៗនេះ បវរកញ្ញាមកពីខេត្តកំពង់ចាម ប្រាប់ថា ក្រៅពីដើរម៉ូដ ខ្លួនក៏អាចសម្ដែងភាពយន្តបានដែរ។ លើសពីនេះ បើសិនផលិតករចង់ឲ្យ ឆានី សម្ដែងជាតួអ្វីក៏បាន មិនថាតួស្លូត ឬកាចនោះទេ កញ្ញានឹងព្យាយាមសម្ដែងឲ្យបានល្អបំផុត ដើម្បីបង្ហាញសមត្ថភាពថ្មីមួយទៀតសម្រាប់ពុក ម៉ែបងប្អូន បានទស្សនា។

ក្រៅពីនេះ និស្សិតកំពុងសិក្សាឆ្នាំទី៣ ជំនាញគ្រប់គ្រងសណ្ឋាគារ និងទេសចរណ៍ បញ្ជាក់ទៀតថា ក៏ពូកែខាងយំផងដែរ បើដើរតួជានារីកម្សត់ ស្រក់ទឹកភ្នែក កាន់តែចូលតួបានល្អ ថែមទៀត។ មួយរយៈ នេះ ខា អានឆានី មានការមមាញឹកទៅលើការដើរម៉ូដ ក៏ដូចជាការងារសប្បុរសធម៌ នៅតាមបណ្ដាខេត្ត។ ថ្វីត្បិតកំពុងសិក្សាផង ប្រឡូកសិល្បៈផង តែ ឆានី អាចបែងចែកពេលវេលា មិនឲ្យប៉ះពាល់ដល់ការរៀនសូត្រនោះឡើយ៕

អត្ថបទ៖ លឹម សុនា