គំហើញថ្មី! កំណើតរឿងព្រេងនគរគោកធ្លកទំនងជាមិនមែននៅតាកែវទៀតទេ
- 2019-03-14 09:55:59
- ចំនួនមតិ 0 | ចំនួនចែករំលែក 0
គំហើញថ្មី! កំណើតរឿងព្រេងនគរគោកធ្លកទំនងជាមិនមែននៅតាកែវទៀតទេ
ចន្លោះមិនឃើញ
ក្រុមអ្នកស្រាវជ្រាវភ្ញាក់ផ្អើលខ្លាំងក្រោយរកឃើញដើមធ្លក និងគ្រាប់ធ្លកកប់ក្រោមបាតប្រសាទភិមានអាកាស និងបានដាក់ការសនិដ្ឋានថាអាចមានការទាក់នឹងរឿងព្រេងនគរគោកធ្លក។
អាជ្ញាធរជាតិអប្សរានារសៀលនេះ បានសរសេរលើបណ្ដាញសង្គមហ្វេសប៊ុករបស់ខ្លួនថាគម្រោងសា្រវជ្រាវបុរាណវិទ្យា MoDaThom (ម៉ូដាធំ) របស់វិទ្យាស្ថានសាលាបារាំងចុងបូព៌ាEFEO សហការជាមួយអាជ្ញាធរជាតិអប្សរា បាននិងកំពុងស្រាវជ្រាវនៅក្នុងបរិវេណអតីតព្រះបរមរាជវាំងអង្គរធំ អស់រយៈកាលជិត២០ឆ្នាំមកហើយ។
ប្រភពដដែលសរសេរទៀតថាក្នុងឆ្នាំ២០១៩នេះ គម្រោងកំពុងបន្តធ្វើកំណាយបុរាណវិទ្យាបន្តផ្នែកខាងត្បូង ខាងជើង និងខាងលិចជុំវិញក្បែរគ្រឹះប្រាសាទភិមានអាកាស។ ការងារនេះនឹងមានទិន្នន័យថ្មីបន្ថែម និងបញ្ជាក់ទៅលើព័ត៌មានដែលបានរកឃើញកាលពីឆ្នាំមុនៗ។
ប្រភពខាងលើរៀបរាប់ទៀតថាការងារបុរាណវិទ្យា និងការវិភាគវិទ្យាសាស្រ្ត ទទួលបានលទ្ធផលជាបណ្តើរថា ព្រះបរមរាជវាំងបានស្ថាបនាជា១០ដំណាក់កាលផ្សេងៗគ្នា នៅក្នុងសម័យកាលបីធំៗនៃប្រវត្តិសាស្រ្តខ្មែរ។
ក្នុងចំណោមសំណល់បុរាណវត្ថុសំខាន់ៗដែលប្រទះឃើញ ក៏មានភស្តុតាងមួយដែលអ្នកស្រាវជ្រាវភ្ញាក់ផ្អើលខ្លាំង មិនដែលជួបប្រទះនោះ គឺឃើញដើមធ្លកកប់ពីក្រោមនៃប្រាសាទភិមានអាកាស។ ប្រភពខាងលើបន្ត។
ប្រខាងលើសរសេរថា៖ «លទ្ធផលដែលអស្ចារ្យនោះ គឺរឿងព្រេងនគរគោកធ្លកដែលលេចឮនៅសតវត្សទី១៩ ពិតជាមានកំណើតនៅអង្គរ ពោលគឺមានទាក់ទងនឹងប្រាសាទភិមានអាកាស ត្បិតដើមធ្លកនិងគ្រាប់ធ្លកបានប្រទះឃើញនៅបាតប្រាសាទនេះឯង...នេះជាទិន្នន័យថ្មី និងជាព័ត៌មានដ៏សំខាន់សម្រាប់សិក្សាពីប្រវត្តិកំណកំណើតនៃរឿងព្រេងនគរគោកធ្លក ដែលខ្មែរបាននិទានតគ្នាតាំងពីស.វទី១៩គ.ស មក។ ចំពោះលោក Jacques Gaucher ប្រធានគម្រោងស្រាវជ្រាវ MoDaThom (ម៉ូដាធំ)ភស្ដុតាងនេះគឺជាទម្ងន់មួយបញ្ជាក់ថា ប្រវត្តិនគរគោកធ្លកប្រហែលជាមានកំណើតនៅតំបន់អង្គរនេះមែន»។
គួរបញ្ជាក់ថាកន្លងមកអ្នកសិក្សាប្រវត្តិសាស្រ្តមួយចំនួនបានជឿថានគរគោកធ្លកមានទីតាំងនៅក្នុងខេត្តតាកែវ៕