សិល្បករ ជួបសិល្បករជប់លៀងផ្អើល បិទបញ្ចប់ការថតរឿងទី ១៩ របស់ទូរទស្សន៍លេខ ៥
- 2019-03-18 03:28:22
- ចំនួនមតិ 0 | ចំនួនចែករំលែក 0
សិល្បករ ជួបសិល្បករជប់លៀងផ្អើល បិទបញ្ចប់ការថតរឿងទី ១៩ របស់ទូរទស្សន៍លេខ ៥
ចន្លោះមិនឃើញ
សិល្បករ សិល្បការិនី ភាគច្រើនជាតួសម្ដែងក្នុងរឿង "មិត្តឫស្សា" បានជួបគ្នាធ្វើពិធីជប់លឿងធំមួយ ដើម្បីប្រកាសការបិទបញ្ចប់ការថតវីដេអូភាគទូរទស្សន៍ខាងលើ ក្រោយចំណាយពេលថតជាមួយអស់ពេលយ៉ាងយូរ។
សិល្បករ សិល្បការិនីមានវត្តមានក្នុងឱកាសនោះ លោក មុំ សុធារ៉ា រចនា រ៉ាវាឌី ជាតួឯកប្រុស តួឯកស្រី។ ដោយឡែក យ៉ែម ស្រីពេជ្រ ដែលជាតួឯកស្រីដែរនោះ មិនមានវត្តមាននោះទេ។ សិល្បករផ្សេងទៀតមាន សុធា ពិសិដ្ឋ លោក លាង ឧត្តម ឆ័យលី ដាឡែន ម៉ានីកា និង ម៉ានីតា ជាដើម។
សុធារ៉ា និងកញ្ញា រចនា រួមជាមួយមិត្តភ័ក្ដិរឿងសាច់រឿងឯទៀត បានពោលថា ពួកគេរីករាយដែលបានរួមគ្នារំលេចស្នាដៃពិសេសមួយ ត្រៀមដាក់បម្រើខ្សែចក្ខុរបស់បងប្អូនទស្សនិកជនឆាប់ៗលើកញ្ចក់ទូរទស្សន៍ប៉ុស្តិ៍លេខ៥។ កញ្ញា ម៉ានីកា ជាតួអង្គសំខាន់មួយរូប បានថ្លែងបញ្ជាក់ថា រឿង "មិត្តឫស្យា" សាច់រឿងឆ្លុះបញ្ចាំងពីធាតុភាពពិតក្នុងសង្គម បង្ហាញពីការអប់រំ រួមទាំងសបញ្ជាក់ពីសារធាតុមនុស្ស ល្អពីខាងមុខ លួចចាក់ពីក្រោយ និងហ៊ានក្បត់សូម្បីតែមិត្តជិតស្និទ្ធខ្លួនឯងក៏ហ៊ានក្បត់ដែរ។
ក្រៅពីនេះ ស្នេហា ច្រណែននិន្ទា ប្រជែងគ្នា ក៏មានក្នុងសាច់រឿងដែរ។ ទាំងអស់នេះ កញ្ញាថា នឹងជាចំណុចលេចធ្លោរបស់សាច់រឿង។ នេះជា សមិទ្ធផលថ្មីមួយទៀតរបស់ ទូរទស្សន៍ប៉ុស្តិ៍លេខ៥ ដែលប៉ុន្មានឆ្នាំចុងក្រោយសម្រុកថតភាពយន្តក្នុងស្រុកយ៉ាងច្រើន។ លោក ហួង តារាមុន្នី នាយកផលិតកម្មវិធីរបស់ទូរទស្សន៍ប៉ុស្តិ៍លេខ៥ បញ្ជាក់ថា ចាប់តាំងពីឆ្នាំ ២០១៦ មកផង ស្ថានីយរបស់លោកផលិតភាពយន្តក្នុងស្រុកបាន ១៨រឿងហើយ ហើយ "មិត្តឬស្សា" គឺជារឿងទី ១៩ ដែលទើបបិទបញ្ចប់ការថតនាពេលនេះ។
លោកថា បេសកកម្មនេះមិនទាន់ចប់នៅឡើយ ដោយក្នុងនោះ លោក តារាមុន្នី បន្ថែមថា លោកនៅមានផែនការផលិតភាពយន្តក្នុងស្រុកច្រើនទៀតរហូតដល់ឆ្នាំ ២០២០។ "គិតមកត្រឹមពេលនេះ យើងផលិតបានជាង១០រឿងហើយ គឺរឿងនេះ ជារឿងទី ១៩ ហើយយើងនៅមានផែនការផលិតបន្តទៀត ដែលពីហ្នឹងទៅរហូតដល់ឆ្នាំ ២០២០ យើងនៅសល់រឿង ៨រឿងទៀតដែលត្រូវផលិត"។
និន្នាការនេះ នាយកគ្រប់គ្រងកម្មវិធីខាងលើបញ្ជាក់ថា ដើម្បីផ្ដល់ការងារដល់សិល្បករ សិល្បការិនីក្នុងស្រុក សម្រួលជីវភាពរបស់ពួកគេ និងចូលរួមលើកកម្ពស់ឧស្សាហកម្មភាពយន្តក្នុងស្រុកដែរ។ យ៉ាងណា ជុំវិញការសម្រុកផលិតភាពយន្តក្នុងស្រុកនេះ ស្ថានីយក៏ទទួលពាក្យរិះគន់ខ្លះដែរ លើការទិញសិទ្ធិភាពយន្តថៃ មកថតឡើងវិញក៏ដោយ។ បញ្ហានេះ លោក ហួង តារាមុន្នី នាយកផលិតកម្មវិធីរបស់ទូរទស្សន៍ប៉ុស្តិ៍លេខ៥ បានទទួលស្គាល់ តែថា នេះជានិន្នាការសាកល និងជារឿងធម្មតា ក្នុងឧស្សាហកម្មភាពយន្ត។
ក្នុងន័យនេះ លោកថា កម្ពុជាមិនមែនជាប្រទេសតែមួយទេ ដែលទិញសិទ្ធិរឿងបរទេសមកផលិតឡើងវិញ ក្នុងនោះសូម្បីថៃខ្លួនឯង ហូលីវូដ ជប៉ុន កូរ៉េ ជាដើម ក៏មានទិញសិទ្ធិភាពយន្តប្រទេសផ្សេងមកផលិតដែរ។ យ៉ាងណាក៏ដោយ លោក តារាមុន្នី សង្កត់ធ្ងន់ថា ត្បិតតែទិញសិទ្ធិគេមែន ប៉ុន្តែសាច់រឿងមិនយកតាមគេទាំងស្រុងទេ។ ក្រៅពីនេះ ទៀតសោត លោកក៏គិតលើការបង្កើតថ្មីដែរ។
“ជាក់ស្ដែង ក្នុងចំណោមរឿងដែលយើងផលិតហើយ គឺមានទាំងទិញសិទ្ធិ និងរឿងថ្មីរបស់យើង ហើយ ៨រឿងដែលយើងគម្រោងថតដល់ឆ្នាំ ២០២០នោះ គឺដូចគ្នា គឺ ៤រឿង ទិញសិទ្ធិ ៤រឿងទៀតជារឿងថ្មីរបស់យើង ដែល២ ទូរទស្សន៍លេខ ៥ ផលិតផ្ទាល់ ២ទៀត" ក្រុមផលិតពីក្រៅផលិតឲ្យយើង!”៕