មេស្វាមួយក្បាលដេកឱបកូនក្នុងដៃទាំងខ្លួនមានរបួសធ្ងន់ធ្ងរ

2019-03-19 08:25:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្វាញីមួយក្បាលបានរងរបួសយ៉ាងធ្ងន់ធ្ងរដោយគ្រាប់កាំភ្លើងខ្យល់ និងឧបករណ៍មុតស្រួចផ្សេងទៀត។

សត្វស្វានេះ ត្រូវបានក្រុមអ្នកសង្គ្រោះដាក់ឈ្មោះថា Hope ក្រោយពីបានរកឃើញនៅក្នុងតំបន់ព្រៃមួយនៅខេត្តអាឆេ ប្រទេសឥណ្ឌូណេស៊ីកាលពីសប្ដាហ៍មុន។ Hope ត្រូវបានគេដឹងថាមានអាយុ៣០ឆ្នាំ ហើយពេលរកឃើញនាងមានស្នាមគ្រាប់កាំភ្លើងខ្យល់មិនតិចជាង៧៤កន្លែងនោះទេនៅលើដងខ្លួន និងភ្នែកទាំងសងខាង។

(Hope កំពុងទទួលការសង្គ្រោះ)

ជាមួយគ្នានោះដែរ Hope ក៏មានស្នាមដាច់រយះនៅលើដកខ្លួនផងដែរ ដែលក្រុមអ្នកជួយសង្គ្រោះគិតថាHope ត្រូវគេធ្វើទថារុណ្ឌកម្មដោយវត្ថុរឹងផ្សេងទៀត។

Hope បានឱបកូនតូចនៅក្នុងដៃពេលដែលនាងកំពុងមានរបួសធ្ងន់ និងអាចធ្វើចលនាបានតិចតួច។ ពេលក្រុមជួយសង្គ្រោះបានរកឃើញ កូនស្វាឈ្មោល ដែលជាកូនរបស់Hope បានស្លាប់បាត់ទៅហើយ ដោយសារខ្វះជាតិទឹក និងអាហារ។

(កូនរបស់Hope បានស្លាប់ដោយសារខ្វះជាតិទឹក និងអាហារ)

ក្រុមអ្នកជួយសង្រោះសន្និដ្ឋានថាដោយសារតែម្តាយរបស់កូនស្វានោះមានរបួសធ្ងន់ពេកមិនអាចចេញរកចំណីឲ្យវាបានទើបកូនស្វានេះស្លាប់។

ក្រុមជួយសង្គ្រោះកំពុងវះកាត់ និងព្យាបាលរបួសនៅលើដងខ្លួនរបស់Hope ប៉ុន្តែមិនទាន់បានវះកាត់យកគ្រាប់កាំភ្លើងខ្យល់ចេញនៅឡើយ។ អ្វីដែលគួរឲ្យអាណិតទៀតនោះ Hope ពេលនេះបានពិការភ្នែកទាំងសងខាងទៅហើយ ដោយសារគ្រាប់កាំភ្លើងខ្យល់ដែលបាញ់ចំភ្នែកទាំងពីរ។

ជម្លោះរវាងសត្វស្វាប្រភេទនេះនិងក្រុមមនុស្សដែលចូលកាប់ឈើ អ្នកដាំដូងប្រេង និងម្រេច កើតឡើងកាន់តែច្រើនឡើងៗ។

មន្ត្រីរដ្ឋាភិបាលបានអះអាងថាខ្លួនកំពុងស្វែងរកអ្នកបាញ់ និងធ្វើបាបស្វាខាងលើនេះ។

មន្ត្រីអភិរក្សសត្វវិញលើកឡើងដែរថាការប្រើប្រាស់កាំភ្លើងខ្យល់សម្រាប់ប្រមាញ់សត្វព្រៃ ជាបញ្ហាធំមួយសម្រាប់ឥណ្ឌូនេស៊ី៕

ប្រភព៖ Dailymail ប្រែសម្រួល៖ ទូច សុខា