ធ្វើជាតារាចម្រៀងផង អ្នកនិពន្ធផង ចុងក្រោយ រត់ទៅបើកសាលាបង្រៀនជួសជុលទូរសព្ទធ្វើមិនដឹង

2019-03-21 01:39:32
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកនិពន្ធបទចម្រៀងវ័យក្មេងមួយរូប មានឈ្មោះថា ខូ លីន បានបាត់មុខឈឹងពីសិល្បៈប្រមាណ២ឆ្នាំ ឥឡូវទើបធ្លាយដំណឹងថា លោកបានរត់ទៅបើកសាលាបង្រៀនជួសជុលទូរសព្ទជំនួសវិញទៅហើយ។

តាមសាវតា ខូ លីន (Kho Lin) បានប្រឡូកសិល្បៈចាប់តាំងពីឆ្នាំ២០១៤ មក ដោយក្នុងនោះធ្លាប់ធ្លាប់បាននិពន្ធបទចម្រៀងឲ្យ តារាចម្រៀង និងផលិតកម្មក្នុងស្រុកមួយចំនួន ហើយបទដែលទទួលបាន ការគាំទ្រច្រើនមានដូចជាបទ "កុំទៅចោលបង" "កុំពង្រាត់ស្នេហ៍ខ្ញុំបានទេ" និងបទ "ឆ្ងាយ" ជាដើម។ ក្រៅពីនេះ លោកក៏ធ្លាប់បានបណ្ដាកម្មវិធី ប្រគំតន្ត្រី និងស្ថានីយទូរទស្សន៍ ក្នុងស្រុកអញ្ជើញជាកិត្តិយសឡើងច្រៀងជាញឹកញាប់ផងដែរ។

ប៉ុន្តែក្រោយពីមុជមិនជ្រៅទៅមិនឆ្ងាយ លោករសាត់ឆ្ងាយពីសិល្បៈឈឹងតែម្ដង។ ក្នុងជំនួបចៃដន្យកាលពីថ្មីៗនេះ សាមីខ្លួន បានបញ្ជាក់ឲ្យដឹងថា លោកបានឆ្ងាយពីសិល្បៈប្រមាណ ២ឆ្នាំមកហើយ ហើយចំពោះមូលហេតុ ដោយសារតែលោក បានសម្រេចងាកទៅបើកមុខជំនួញថ្មី បើកសាលាបណ្ដុះបណ្ដាល ជំនាញជួសជុលទូរសព្ទ និងលក់សម្ភារ៖ទូរសព្ទទំនើបជំនួសវិញ។

ជំនួញថ្មីខុសស្រឡះពីអាជីពចាស់នេះ ខូ លីន បានដាក់ឈ្មោះ លោក ខូ លីន ខ្មែរហ្វូន (Khmer Phone)ស្ថិតនៅសង្កាត់ផ្សារដេប៉ូទី២ ខណ្ឌទួលគោក ដោយជំនួញថ្មីនេះ លោកបញ្ជាក់ថា បាន និងកំពុងទទួលផ្លែផ្កាល្អ។ យ៉ាងណាក៏ដោយនិយាយពីការងារសិល្បៈ អាជីពដែលជួយឲ្យលោកមានគេស្គាល់ខ្លះៗនោះវិញ លោកសង្កត់ធ្ងន់ថា ក៏មិនបានបោះបង់អាជីពសិល្បៈទាំងស្រុងនោះទេ។ ជាក់ស្ដែងការចិញ្ចឹមចិត្តនិពន្ធ ថានឹងច្រៀង និពន្ធនៅតែមាន។

ដូច្នេះហើយ កាលៈទេសៈល្អណាមួយ លោកនឹងរំលេចស្នាដៃថ្មីជាក់ជាមិនខាន។ "ដោយសារមុខរបររកស៊ីចេះមានផ្លែផ្កាល្អ ទើបចេះតែរវល់ដកឃ្លាមិនរួច ប៉ុន្តែ ចិត្តស្រឡាញ់វិស័យសិល្បៈ អីចឹងហើយ កាលៈទេសៈណាល្អ ឬក៏អំណោយផល ខ្ញុំនឹងឆ្លៀតពេលខ្លះ ដើម្បីនិពន្ធបទភ្លេង និងទំនុកច្រៀងឡើងវិញ ដោយទុកច្រៀងខ្លួនឯងផង ឲ្យតារាចម្រៀងផ្សេង ច្រៀងផង"។ សិល្បករវ័យ២៩ឆ្នាំរូបនេះ។

ដោយសារ បេះដូងនៅមានសិល្បៈ អ្នកនិពន្ធមកពីខេត្តកំពង់ស្ពឺរូបនេះ ឲ្យដឹងថា លោកបានចងក្រង និងប្រមូលផ្តុំតន្ត្រីករ សិល្បករ អ្នកនិពន្ធវ័យក្មេងមួយចំនួន និងធ្លាប់បានបញ្ចេញស្នាដៃនិពន្ធបទចម្រៀងសម្រាប់តារាចម្រៀងជាច្រើនផងដែរ ។ ក្រៅពីនេះ លោកក៏មាន Studio ថតបទចម្រៀងផ្ទាល់ខ្លួន និងសម្រាប់សិល្បករនានាផងដែរ។

លោក ខូ លីន បញ្ជាក់ចុងក្រោយថា ក្នុងពេលដ៏ខ្លីខាងមុខនេះ លោកនឹងបញ្ចេញស្នាដៃបទ ចម្រៀងថ្មី Original Song ផ្ទាល់ខ្លួនមួយបទ "អូនទៅណាហើយ" ដែលជាប្រភេទបទមនោសញ្ចេតនាស៊ីជម្រៅ ដែលលោករំពឹងថា នឹងអាចជួយបន្តដង្ហើមសិល្បៈរបស់លោកទៅមុខទៀតបាន៕