ខ្មែរយើងក៏មិនអន់ដែរ ៥រដ្ឋនេះជាបណ្តុំតំបន់មាននិស្សិតខ្មែររៀនច្រើនជាងគេនៅអាមេរិក

2019-03-26 05:09:16
ចំនួនមតិ 0 | ចំនួនចែករំលែក 0

ចន្លោះមិនឃើញ

បច្ចុប្បន្នចំនួននិស្សិតខ្មែរដែលកំពុងរៀននៅតាមសកលវិទ្យាល័យ និងមហាវិទ្យានានាក្នុងរដ្ឋផ្សេងៗនៅសហរដ្ឋអាមេរិក កំពុងមានការកើនឡើង។ ក្នុងនោះ មានរដ្ឋចំនួន៥ ដែលជាប់ជារដ្ឋមាននិស្សិតខ្មែរស្នាក់នៅរៀនច្រើនជាងគេ ឬភាសាអង់គ្លេសហៅថា Top 5 States។ នេះបើតាមមន្ត្រីទទួលបន្ទុកកម្មវិធីនិស្សិត និងអ្នកទស្សនាការផ្លាស់ប្ដូរ នៅនាយកដ្ឋានសន្តិសុខជាតិ។

ប្រភពរូបថត៖ ស្ថានទូតអាមេរិកប្រចាំនៅប្រទេសកម្ពុជា

លោកស្រី Rachel Canty មន្ត្រីទទួលបន្ទុកកម្មវិធី និស្សិតនិង អ្នកទស្សនាផ្លាស់ប្ដូរ នៃនាយកដ្ឋានសន្តិសុខជាតិ ផ្នែកពង្រឹងការអនុវត្តពន្ធ និងអន្តោប្រវេសន៍ របស់អាមេរិកប្រាប់ថា គិតត្រឹមខែមិនាឆ្នាំ២០១៩នេះ ចំនួននិស្សិតខ្មែរដែលកំពុងរៀនច្រើននៅក្នុងរដ្ឋចំនួន៥ ដូចជា រដ្ឋCalifornial, Massachusetts, Washington, Texas និងរដ្ឋPennsylvajiaសរុបមាន ៥៦០នាក់ ដែលនិស្សិតស្រីមានដល់ទៅ ៤៩ភាគរយ ចំណែកនិស្សិតប្រុសមាន៥១ភាគរយ។

កំណើននេះ អាស្រ័យដោយកត្តាសំខាន់គឺនិស្សិតខ្មែរគ្រប់រូប បានផ្ដើមខិតខំប្រឹងខ្លួនឯង និងមានសមត្ថភាពអាចប្រលង និងបំពេញពាក្យជាប់មករៀននៅតាមសាលានានា នៅអាមេរិក។ នេះបើតាមការបញ្ជាក់របស់លោកស្រី Rachel Cantyប្រាប់អ្នកយកព័ត៌មាន Sabayនៅក្នុងកិច្ចប្រជុំស្គីពីមហាវិទ្យាល័យសហគមន៍នៅសហរដ្ឋអាមេរិក និងការអភិវឌ្ឍន៍ធនធានដែលមានអ្នកសារព័ត៌មានអន្តរជាតិសរុប ២០ប្រទេស នៅជុំវិញពិភពលោក។ កម្មវិធីនេះកំពុងរៀបចំនៅរដ្ឋធានីវ៉ាស៊ីនតោន DC នៃសហរដ្ឋអាមេរិក ដោយមជ្ឈមណ្ឌល Washington Foreign Press Center នៃក្រសួងការបរទេសសហរដ្ឋអាមេរិក ។

ក្រៅពីនេះ បើតាម លោក Michael Newbill ភារធារីស្ដីទី នៃស្ថានទូតអាមេរិក ធ្លាប់បានបញ្ជាក់ Sabayកាលពីពេលកន្លងទៅ នៅក្នុង ពិពណ៌ការសិក្សានៃសហរដ្ឋអាមេរិក ថា ចំនួននិស្សិតខ្មែរ ដែលបានទៅរៀននៅសហរដ្ឋអាមេរិក មានការកើនឡើងពីមួយឆ្នាំទៅមួយឆ្នាំ ដោយហេតុផលសំខាន់ៗ ការរីកចម្រើននៃសេដ្ឋកិច្ចកម្ពុជា ការកែទម្រង់ប្រព័ន្ធអប់រំ របស់ក្រសួងអប់រំ យុវជន និងកីឡាដែលបង្កលក្ខណៈងាយស្រួលដល់និស្សិតឲ្យមានលទ្ធភាពទៅរៀននៅអាមេរិកក្នុងប្រព័ន្ធអប់រំថ្មី១ ដែលមានភាពល្អប្រសើរជាងគេនៅក្នុងពិភពលោក។

លោក Michael Newbill ភារធារីស្ដីទី នៃស្ថានទូតអាមេរិក

សូមបញ្ជាក់ថា បើគិតចំនួនសរុបដែលកំពុងបន្តសិក្សានៅក្នុងសហរដ្ឋអាមេរិកបច្ចុប្បន្ន គឺមានសរុប ៩៣១នាក់ នេះបើតាមមន្ត្រីទទួលបន្ទុកកម្មវិធី និស្សិតនិង អ្នកទស្សនាផ្លាស់ប្ដូរ នៃនាយកដ្ឋានសន្តិសុខជាតិ ផ្នែកពង្រឹងការអនុវត្តពន្ធ និងអន្តោប្រវេសន៍ របស់អាមេរិក លោកស្រី Rachel Canty៕

រាយការណ៍ផ្ទាល់ពីសហរដ្ឋអាមេរិក ដោយ Peov Raksa អ្នកសារព័ត៌មាន Sabay

អត្ថបទ៖ ប៊ិន ប៊ុណ្ណា