សង្ខេប៦រឿងសំខាន់ពេលកម្ពុជាធ្វើម្ចាស់ផ្ទះជម្រុះAFCU-23 ពូលH

2019-03-27 02:14:30
ចំនួនមតិ 0 | ចំនួនចែករំលែក 0

ចន្លោះមិនឃើញ

ការប្រកួតវគ្គជម្រុះតាមពូលនៃព្រឹត្តិការណ៍ពានរង្វាន់ជើងឯកយុវជនអាស៊ីឆ្នាំ២០២០ (2020 AFC U-23 Championship) បានបញ្ចប់គ្រប់ពូលអស់ហើយក្នុងនោះកម្ពុជាទទួលរៀបចំការប្រកួតពូល H។ មានរឿងខ្លះៗដែលត្រូវតាមដានក្នុងការប្រកួតវគ្គជម្រុះនៅកម្ពុជានេះ។

ទី១៖ ក្រុមខ្លាំងទាំងពីរបានឡើងជុំផ្តាច់ព្រ័ត្រ

ក្រុមកូរ៉េខាងត្បូង

ក្រុមអូស្ត្រាលី

ក្រុមកូរ៉េខាងត្បូង និងអូស្ត្រាលី នៃពូល H នេះបានឡើងទៅជុំផ្តាច់ព្រ័ត្រដែលប្រកួតឆ្នាំ២០២០នៅប្រទេសថៃ បន្ទាប់ពីកូរ៉េខាងត្បូងឈរលេខ១ដែលមាន៧ពិន្ទុពីការឈ្នះ២ប្រកួត និងស្មើ១ប្រកួត ខណៈអូស្ត្រាលីបានក្លាយជាក្រុមលេខ២ល្អបំផុត បន្ទាប់ពីឈ្នះ២ប្រកួត និងស្មើ១ប្រកួតមាន៧ពិន្ទដូចកូរ៉េខាងត្បូងដែរ។

ទី២៖ កម្ពុជា និងឆាយនិសតៃប៉ិ មិនស្គាល់ពាក្យឈ្នះ

ក្រុមកម្ពុជា

ក្រុមឆាយនិសតៃប៉ិ

ឆ្លងកាត់៣ប្រកួតក្នុងពូលនេះ ក្រុមម្ចាស់ផ្ទះកម្ពុជា និងភ្ញៀវឆាយនិសតៃប៉ិ មិនទាន់ស្គាល់ពាក្យឈ្នះ បន្ទាប់ពីចាញ់២ប្រកួត ស្មើ១ប្រកួត និងមាន១ពិន្ទុដូចគ្នា។ កម្ពុជាចាញ់អូស្ត្រាលី ៦-០, ចាញ់កូរ៉េខាងត្បូង ៦-១ និងស្មើឆាយនិសតៃប៉ិ ១-១ ខណៈឆាយនិសតៃប៉ិចាញ់កូរ៉េខាងត្បូង ៨-០, ចាញ់អូស្ត្រាលី ៦-០ និងស្មើកម្ពុជា ១-១។ អ្វីដែលខុសគ្នាគឺកម្ពុជាស៊ុតចូលគូប្រកួតបាន២គ្រាប់ ហើយគេស៊ុតចូល១៣គ្រាប់ដើម្បីបានឈរលេខ៣ក្នុងពូល។ ចំណែកឆាយនិសតៃប៉ិស៊ុតចូលគូប្រកួតតែ១គ្រាប់គត់ ហើយគេស៊ុតរហូតដល់១៥គ្រាប់។

ទី៣៖ សរុបគ្រាប់បាល់ទាំងអស់

ការប្រកួតរវាងកម្ពុជា និងអូស្ត្រាលី

ការប្រកួតមានចំនួន៦ប្រកួតដែលធ្វើឲ្យមានគ្រាប់បាល់បំប៉ោងសំណាញ់ទីចំនួន៣៣គ្រាប់។ កូរ៉េខាងត្បូងរកបាន១៦គ្រាប់ អូស្ត្រាលីរកបាន១៤គ្រាប់ កម្ពុជារកបាន២គ្រាប់ និងឆាយនិសតៃប៉ិ រកបាន១គ្រាប់។ ក្នុងនោះគ្រាប់បាល់ប៉េណាល់ទី១គ្រាប់ និងគ្រាប់បាល់ចូលទីខ្លួនឯង១គ្រាប់។

ទី៤៖ កីឡាកររកគ្រាប់បាល់ច្រើនជាងគេ

ក្រុមកូរ៉េខាងត្បូងអបអរគ្រាប់បាល់

កីឡាករកូរ៉េខាងត្បូង Lee Dong-gyeong រកបានគ្រាប់ចំនួន៦គ្រាប់ដែលបានក្លាយជាកីឡាកររកគ្រាប់បាល់បានច្រើនជាគេប្រចាំពូល H នេះហើយក៏ជាកីឡាករដែលរកគ្រាប់បាល់បានច្រើនជាងគេក្នុងព្រឹត្តិការណ៍វគ្គជម្រុះទាំង១១ពូលទូទាំងទ្វីបអាស៊ី។

ទី៥៖ សរុបអ្នកទស្សនាប្រចាំពូល H

ទិដ្ឋភាពអ្នកទស្សនា

សរុបអ្នកទស្សនាទាំងអស់ពីការប្រកួតទាំង៦គឺចំនួន៨១០០នាក់។ ពេលកូរ៉េខាងត្បូងប្រកួតជាមួយឆាយនិសតៃប៉ិមាន១ ១១៣នាក់។ ពេលកម្ពុជាប្រកួតនឹងអូស្ត្រាលីមាន៣ ១១៨នាក់។ ពេលឆាយនិសតៃប៉ិប្រកួតនឹងអូស្ត្រាលីមាន៤២៤នាក់។ ពេលកម្ពុជាប្រកួតនឹងកូរ៉េខាងត្បូងមាន១ ៣២៨នាក់។ ពេលកូរ៉េខាងត្បូងប្រកួតនឹងអូស្ត្រាលីមាន៤៥៥នាក់ និងពេលកម្ពុជាប្រកួតជាមួយឆាយនិសតៃប៉ិមាន១៦៦២នាក់។

ទី៦៖ ការពិន័យជាកាត

ក្រុមអាជ្ញាកណ្តាលដើរចូលទីលាន

ការប្រកួត៦លើកក្នុងពូលនេះ អាជ្ញាកណ្តាលបានពិន័យដោយប្រើកាតលឿងអស់ចំនួន១៥ ប៉ុន្តែគ្មានពិន័យកាតក្រហមទេ។ ពេល កូរ៉េខាងត្បូងប្រកួតនឹងឆាយនិសតៃប៉ិ ប្រើកាតលឿង៧។ ពេលកម្ពុជាប្រកួតនឹងអូស្ត្រាលី ប្រើកាតលឿង១។ ពេលឆាយនិសតៃប៉ិប្រកួតនឹងអូស្ត្រាលីប្រើកាតលឿង២។ ពេលកម្ពុជាប្រកួតនឹងកូរ៉េខាងត្បូងប្រើកាតលឿង៣។ ពេលកម្ពុជាប្រកួតនឹងឆាយនិសតៃប៉ិប្រើកាតលឿង២។ ពេលកូរ៉េខាងត្បូងប្រកួតនឹងអូស្ត្រាលីគ្មានកាតពិន័យឡើយ៕