កុំខ្វល់រឿងបែកកូន បែកប្តីទៀត! មហាវិទ្យាល័យនេះ អាចឲ្យសិស្សស្រីវេចបង្វេចនាំកូនមករៀនជាមួយដល់អាមេរិកយ៉ាងស្រួល
- 2019-04-01 02:47:59
- ចំនួនមតិ 0 | ចំនួនចែករំលែក 0
កុំខ្វល់រឿងបែកកូន បែកប្តីទៀត! មហាវិទ្យាល័យនេះ អាចឲ្យសិស្សស្រីវេចបង្វេចនាំកូនមករៀនជាមួយដល់អាមេរិកយ៉ាងស្រួល
ចន្លោះមិនឃើញ
មហាវិទ្យាល័យសហគមន៍មួយ នៅសហរដ្ឋអាមេរិក បានអនុញ្ញាតឲ្យនិស្សិតស្រីជាតិ និងអន្តរជាតិអាចនាំកូន ឬស្វាមីមកស្នាក់នៅជាមួយបាន អំឡុងពេលសិក្សា ដោយហេតុផលសំខាន់មួយ។
ក្នុងចំណោមគ្រឹះស្ថានអប់រំជាច្រើនទៀត នៅទីនេះ Valencia គឺជាមហាវិទ្យាល័យសហគមន៍មានទីតាំងនៅក្នុងទីក្រុង Orlando នៃរដ្ឋ Florida ដែលបានផ្ដោតការលើកទឹកចិត្ត និងសម្រួលដល់ស្ត្រីដើម្បីបន្តការរៀនសូត្ររហូតដល់ឧត្ដមសិក្សា។
លោកស្រី Talia Popovski នាយកផ្នែកជ្រើសរើសនិស្សិតអន្តរជាតិ និងការចូលរួមជាសកល នៃមហាវិទ្យាល័យសហគមន៍ Valencia បានប្រាប់ Sabay ថា នេះជាការផ្ដល់ឱកាសល្អមួយ ចៀសវាងឲ្យសិស្សស្រីឆាប់បោះបង់ចោលការសិក្សា ព្រោះមូលហេតុបន្ទុកនៅមើលកូនតូចៗ។
មួយវិញទៀត មហាវិទ្យាល័យសហគមន៍ Valenciaចង់ចូលរួមដើរតួនាទីជួយស្ត្រី ដែលមានឆន្ទៈបន្តការសិក្សានៅអាមេរិក បើទោះខ្លួនមានស្វាមី និងកូនៗក្ដី។ លោកស្រីបន្ថែមថា វាជាការដោះបន្ទុកមួយយ៉ាងសំខាន់ ដើម្បីឲ្យនិស្សិតស្រីជាម្ដាយដែលចង់រៀនសូត្រ មានអារម្មណ៍មូល ផ្ដោតលើការសិក្សាបានល្អ និងកាត់បន្ថយការចំណាយពេលវេលាទាក់ទងគ្នា និងថវិកាធ្វើដំណើរទៅមកជាច្រើន ព្រោះមានកូន ឬស្វាមីនៅជិតស្រាប់។
បើទោះមិនទាន់មានតួលេខជាក់លាក់ក៏ពិតមែន ប៉ុន្តែលោកស្រី Talia Popovski បានបញ្ជាក់ថា បច្ចុប្បន្នមាននិស្សិតស្រីចម្រុះជាតិសាសន៍ ដែលក្នុងនោះភាគច្រើន និស្សិតស្រីជាជនជាតិអេស្ប៉ាញ កំពុងស្នាក់នៅ និងសិក្សានៅទីនេះ ជាមួយកូនតូចៗ របស់ពួកគេ។ ចំណែកអ្នកខ្លះទៀត ក៏កំពុងមានផ្ទៃពោះ ប៉ុន្តែពួកគេត្រូវបានសាលាយកចិត្តទុកដាក់ខ្ពស់។
សូមជម្រាបថា មហាវិទ្យាល័យសហគមន៍ Valencia បានសហការជាមួយទារកដ្ឋានមួយឯកជន និងកន្លែងស្នាក់ចំនួននៅជុំវិញសាលា ដើម្បីទុកទីតាំងស្នាក់នៅក្នុងតម្លៃដ៏សមរម្យ (សម្រាប់ជីវភាពអ្នករស់នៅសហរដ្ឋអាមេរិក) ដែលមានតម្លៃចន្លោះពី ៩០០ ទៅ១០០០ដុល្លារក្នុង១ខែ សម្រាប់ការមើលថែក្មេងតូចម្នាក់។ និស្សិតស្រីអន្តរជាតិ ដែលមានបំណងចង់មករៀននៅទីនេះជាមួយកូនតូច ឬស្វាមី បានតាមមុខជំនាញដែលខ្លួនពេញចិត្តជាច្រើន តាមរយៈអាហារូបករណ៍ពេញលេញ ឬពាក់កណ្ដាលបង់ថ្លៃ រួមនឹងថ្នាក់បង់ថ្លៃទូទៅជាច្រើនទៀត។ ព័ត៌មានលម្អិតសូមទាក់ទងគេហទំព័រ៖ valenciacollege.edu or valenciacollege.edu/news
រាយការណ៍ផ្ទាល់ពីសហរដ្ឋអាមេរិកដោយ៖ ពៅ រក្សា អ្នកសារព័ត៌មាន Sabay