វារីអគ្គិសនីមួយ និងស្ថានីយអគ្គិសនីពីរដើរដោយពន្លឺព្រះអាទិត្យនឹងមាននៅខេត្តចំនួនពីរនៅពេលខាងមុខ

2019-04-05 06:55:44
ចំនួនមតិ 0 | ចំនួនចែករំលែក 0

ចន្លោះមិនឃើញ

គណៈរដ្ឋមន្ត្រីឲ្យដឹងថាគណៈរាជរដ្ឋាភិបាលបានសម្រេចអនុម័តទាំងស្រុងលើគម្រោងវិនិយោគសាងសង់ស្ថានីយវារីអគ្គិសនីស្ទឹងពោធិ៍សាត់១ និងគម្រោងវិនិយោគស្ថានីយអគ្គិសនីដើរដោយពន្លឺព្រះអាទិត្យពីរកន្លែងនៅពោធិ៍សាត់មួយកន្លែង និងនៅកំពង់ឆ្នាំងមួយកន្លែង។

ក្នុងសេចក្ដីប្រកាសព័ត៌មានមួយចុះថ្ងៃទី៥ ខែមេសា ឆ្នាំ២០១៩ ទីស្ដីការគណៈរដ្ឋមន្ត្រីសរសេរថា៖ «រាជរដ្ឋាភិបាលបានអនុម័តឲ្យក្រុមហ៊ុន SPHP (Cambodia)Co., Ltd ធ្វើការវិនិយោគលើគម្រោងវារីអគ្គិសនីពោធិ៍សាត់១ មានទំហំ៨០មេហ្គាវ៉ាត់ និងក្រុមហ៊ុន Schnei Tec Co., Ltd វិនិយោគលើគម្រោងស្ថានីយអគ្គិសនីដើរដោយពន្លឺព្រះអាទិត្យពីរកន្លែង មួយនៅពើធិ៍សាត់ និងមួយនៅកំពង់ឆ្នាំ ដែលមានទំហំ៦០មេហ្គាវ៉ាត់ដូចគ្នា»។

បើតាមអង្គភាពអ្នកនាំពាក្យរាជរដ្ឋាភិបាលដែលសរសេរកាលពីព្រឹកមិញដែរនោះទំនប់វារីអគ្គិសនីស្ទឹងពោធិ៍សាត់១នេះគឺជាគម្រោងអាទិភាពមួយដែលរាជរដ្ឋាភិបាលបានបញ្ចូលក្នុងផែនការមេអភិវឌ្ឍវិស័យអគ្គិសនីដែលត្រូវដាក់ឲ្យដំណើរការនៅឆ្នាំ២០២៣។

ប្រភពដដែលសរសេរថាខ្លឹមសារគោលដែលគណៈកម្មការអន្តរក្រសួង និងភាគីក្រុមហ៊ុនបានចរចា និងព្រមព្រៀងគ្នាសម្រាប់ការវិនិយោគគម្រោងនេះ រូបភាពវិនិយោគ សាងសង់-ដំណើរការ-ផេ្ទរ(BOT) ដែលមានទុនវិនិយោគសរុប២៣១,១០លានដុល្លារអាមេរិក ស្ថិតក្នុងឃុំប្រមោយ ស្រុកវាលវែង។ ទំហំការងារដែលក្រុមហ៊ុនត្រូវសាងសង់រួមមាន ទំនប់ទឹក បំពង់បង្ហូរទឹក ផ្លូវថ្នល់ សា្ថនីយវារី អគ្គិសនី អានុភាព៨០MW ខែ្សបញ្ជូនតង់ស្យុងខ្ពស់២៣០គីឡូវ៉ុល ប្រវែងប្រាំគីឡូម៉ែត្រ ពីស្ថានីយវារីអគ្គិសនីស្ទឹងពោធិ៍សាត់១ ទៅភ្ជាប់ជាមួយខែ្សបញ្ជូនតង់ស្យុងខ្ពស់២៣០ គីឡូវ៉ុលដែលមានស្រាប់ពីអនុស្ថានីយអូរសោមទៅអនុស្ថានីយពោធិ៍សាត់ និងហេដ្ឋារចនាសម្ព័ន្ធបន្ទាប់បន្សំដ័ទៃទៀតហើយរយៈពេលសម្បទាន៣៩ឆ្នាំ ក្នុងនោះបួនឆ្នាំសម្រាប់ការសាងសង់និង៣៥ឆ្នាំ សម្រាប់ការធ្វើអាជីវកម្ម។ ប្រភពខាងលើបញ្ជាក់។

ចំណែកគម្រោងស្ថានីយអគ្គិសនីដើរដោយពន្លឺព្រះអាទិត្យពីរកន្លែងគឺ ខេត្តពោធិ៍សាត់មួយកន្លែង និងខេត្តកំពង់ឆ្នាំ មួយកន្លែង មានទីតាំងទីមួយអានុភាព ៦០MW នៅតាមបណ្តោយផ្លូវជាតិលេខ៥ ស្រុកក្រគរ ខេត្តពោធិ៍សាត់ និងទីតាំងទីពីរ អានុភាព ៦០MW នៅតាមបណ្តោយផ្លូវជាតិលេខ៥៣ ស្រុកទឹកផុស ខេត្តកំពង់ឆ្នាំងដោយអនុញ្ញាតឲ្យគណៈកម្មការអន្តរក្រសួងធ្វើការចរចាផ្ទាល់ជាមួយក្រុមហ៊ុនក្នុងលក្ខខណ្ឌដាក់ឲ្យដំណើរការបន្ទាន់នៅឆ្នាំ២០២១។

គម្រោងទាំងពីរនេះចំណាយទុនវិនិយោគជាង៥៨លានដុល្លារក្នុងមួយទីតាំង ក្រោមរូបភាពវិនិយោគ សាងសង់-ដំណើរការ-ផេ្ទរ(BOT) និងធ្វើអាជីវកម្មរយៈពេល២០ឆ្នាំ។ នេះបើតាមសេចក្តីប្រកាសព័ត៌មានខាងលើ៕

អត្ថបទ៖ ទូច សុខា