សូរ្យ អេនណា ចូលរោងការជាមួយកំលោះ ហូឡង់ ថ្ងៃនេះហើយ
- 2019-04-06 02:31:05
- ចំនួនមតិ 0 | ចំនួនចែករំលែក 0
សូរ្យ អេនណា ចូលរោងការជាមួយកំលោះ ហូឡង់ ថ្ងៃនេះហើយ
ចន្លោះមិនឃើញ
ប្រធានក្រុមម៉ូដែល "តារារះថ្មីកម្ពុជា" កញ្ញា សូរ្យ អេនណា បានសម្រេចចិត្តរោងការបញ្ចប់ភាពនៅលីវរបស់ខ្លួនហើយនៅថ្ងៃនេះ ដោយនាងបានរៀបការជាមួយបុរសសង្ហាម្នាក់ជនជាតិហូឡង់។
បុរសដែល មានសំណាងមកឃុំគ្រងជីវិតកញ្ញា សូរ្យ អេនណា មានឈ្មោះថា Maurice Boumen វ័យ៣១ឆ្នាំ ធ្វើការជាអ្នកគ្រប់គ្រងសណ្ឋាគារលំដាប់ផ្កាយ៥ នៅទីក្រុងហុងកុង។ សូរ្យ អេនណា បានប្រាប់ថា ពួកគេ ទើបតែមានទំនាក់ទំនងស្នេហាជាមួយគ្នាកាលជាង១ឆ្នាំ ក្នុងកម្មវិធីជប់លៀងលាគ្នារបស់មិត្តភ័ក្ដិនាងម្នាក់ ដែលជាបវរកញ្ញាហ្វីលីពីន ហើយចាប់តាំងពីពេលនោះមកក៏មានទំនាក់ទំនងគ្នាតែម្ដង។
ក្រោយពីបានសិក្សាចិត្តគ្នាជាង១ឆ្នាំ ឃើញថា បុរសនោះចេះ ស្រលាញ់គ្នាចុះ យោគយល់អធ្យាស្រ័យគ្នា និងការផ្ដល់តម្លៃឲ្យគ្នា ហើយឪពុកម្ដាយទាំងសងខាង ពេញចិត្តផងនោះ នាងក៏សម្រេចចិត្តរៀបការជាមួយគ្នាតែម្ដងទៅ។ តារាស្រីរូបនេះបានថ្លែងថា ខ្លួនពិតជាសប្បាយចិត្តខ្លាំងណាស់ដែលបានរកឃើញមនុស្សប្រុសម្នាក់ដែល ចេះស្រលាញ់ និងផ្ដល់តម្លៃដល់នាង និងក្រុមគ្រួសារបែបនេះ។
អាពាហ៍ពិពាហ៍របស់ប្រធានក្រុមម៉ូដែលល្បីឈ្មោះខាងលើ ធ្វើឡើងនៅ មណ្ឌលអាពាហ៍ពិពាហ៍កោះពេជ្រ អាគារ G ដោយនៅក្នុងនោះ នាងបានអញ្ជើញភ្ញៀវ ជាង៦០ តុ ក្នុងនោះ មានអ្នកសិល្បៈមួយចំនួនធំ។ ក្រោយពីរៀបការរួច សូរ្យ អេណា នឹងចេញទៅរបស់នៅជាមួយស្វាមីនាង នៅទីក្រុងហុងកុង ហើយក្រុមហ៊ុននាងនៅស្រុកខ្មែរនៅ តែដំណើរការដដែល ដោយនាងត្រូវហោះទៅហោះមក ដើម្បីមើលការងាររកស៊ីលើក្រុមហ៊ុននាង៕