នាវាចម្បាំងរុស្ស៊ី ធ្វើដំណើរមកដល់ហ្វីលីពីនខណៈសមុទ្រចិនខាងត្បូងកំពុងតានតឹង

2019-04-09 03:56:24
ចំនួនមតិ 0 | ចំនួនចែករំលែក 0

ចន្លោះមិនឃើញ

នាវាពិឃាដចំនួនពីរគ្រឿង និងនាវាដឹកប្រេងរបស់រុស្ស៊ី បានធ្វើដំណើរមកដល់ផែហ្វីលីពីនសម្រាប់ទស្សនកិច្ចខណៈពេលដែលភាពតានតឹងនៅតំបន់មានជម្លោះសមុទ្រចិនខាងត្បូងកំពុងកើនឡើង។

នាវាចម្បាំងទាំងពីរ ត្រូវបានគេស្គាល់ឈ្មោះថា Admiral Tributs និង Vinogradov ដែលត្រូវប្រើប្រាស់សម្រាប់ប្រឆាំងនឹងនាវាមុជទឹក។ នាវាទាំងពីររួមជាមួយនឹងនាវាដឹកប្រេងមួយគ្រឿងឈ្មោះ Admiral Irkut បានចូលចតនៅកំពង់ផែ Manila នាព្រឹកថ្ងៃចន្ទ នេះបើយោងតាមភ្នាក់ងារសារព័ត៌មានហ្វីលីពីន។ នេះជាលើកទីពីរហើយដែលនាវាចម្បាំងរុស្ស៊ី ចូលចតនៅកំពង់ផែហ្វីលីពីន ដោយកាលពីដើមខែមករានាវាកងទ័ពជើងទឹករុស្ស៊ីបីគ្រឿង បានចូលចតនៅរដ្ឋធានីហ្វីលីពីន ដែលត្រូវចាត់ទុកថាជាទស្សនកិច្ចដើម្បីលើកកម្ពស់ស្ថិរភាព, សន្ដិភាព និងកិច្ចសហប្រតិបត្តិការដែនសមុទ្រ។

គួរបញ្ជាក់ថា ការមកដល់នៃនាវានេះ មានរយៈពេលប៉ុន្មានខែប៉ុណ្ណោះ មុនពេលប្រទេសទាំងពីរនឹងចុះហត្ថលេខាលើកិច្ចព្រមព្រៀងសហប្រតិបត្តិការនាវាចរដែលទំនងជានឹងធ្វើសមយុទ្ធហ្វឹកហាត់រួមគ្នានិងដំណើរទស្សនកិច្ចកំពង់ផែទៅវិញទៅមក៕