គាំទ្រខ្លាំង! សម្តេច ស ខេង ស្នើឱ្យមានបន្ទប់ពិសេសអប់រំថ្នាំញៀនតាមសាលាទូទាំងប្រទេស
- 2019-04-09 07:03:54
- ចំនួនមតិ 0 | ចំនួនចែករំលែក 0
គាំទ្រខ្លាំង! សម្តេច ស ខេង ស្នើឱ្យមានបន្ទប់ពិសេសអប់រំថ្នាំញៀនតាមសាលាទូទាំងប្រទេស
ចន្លោះមិនឃើញ
សម្ដេចក្រឡា ហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានស្នើឱ្យមានបន្ទប់ពិសេសមួយនៅតាមសាលាទាំងអស់ទូទាំងប្រទេស ចាប់ពីថ្នាក់អនុវិទ្យាល័យរហូតដល់មហាវិទ្យាល័យ ដើម្បីអប់រំ បង្ការ និងទប់ស្កាត់ថ្នាំញៀន។ ការលើកឡើងរបស់សម្ដេចយ៉ាងដូច្នេះត្រូវបានធ្វើឡើង ក្នុងកិច្ចប្រជុំត្រួតពិនិត្យលទ្ធផលការងារសុវត្ថិភាពចរាចរណ៍ផ្លូវគោក ប្រចាំត្រីមាសទី១ ឆ្នាំ២០១៩ នាព្រឹកថ្ងៃអង្គារទី០៩ ខែមេសា ឆ្នាំ២០១៩ នៅទីស្តីការក្រសួងមហាផ្ទៃ។ យ៉ាងណាមិញសំណើនេះនឹងត្រូវដាក់ជូនសម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាសុំការអនុញ្ញាតជាមុនសិន មុននឹងអនុវត្ត។
សម្តេចក្រឡាហោម បានបន្ថែមថា បន្ទប់ពិសេសនេះក្រៅពីមានការអប់រំទាក់ទងនឹងអប់រំ បង្ការ ការជួញដូរថ្នាំញៀន ក៏មានបញ្ជ្រាបពីការជួញដូរមនុស្ស និងបញ្ហាគ្រោះថ្នាក់ចរាចរណ៍ផងដែរ។
“អញ្ចឹងយើងស្នើឱ្យមានចាប់ពីអនុវិទ្យាល័យ រហូតដល់មហាវិទ្យាល័យ ដើម្បីអប់រំសុខភាពផង និងធនធានមនុស្ស ដើម្បីសង្គមយើងផង។ដូច្នេះស្ថានការដល់កម្រិតហើយ ហើយក្រុមយុវជនវ័យ ១៤ឆ្នាំ ដល់១៥ ឆ្នាំ ជាវ័យកំពុងរ៉េ បើមិនអញ្ចឹងនឹងមានគ្រោះថ្នាក់”។
សម្ដេចបានមានប្រសាសន៍ទៀតថា ក្រុមការងារក្រសួងមហាផ្ទៃនឹងជួបពិភាក្សាជាមួយនឹងក្រសួងអប់រំលំអិតទាក់ទងនឹងបញ្ហានេះ មុននឹងដាក់សំណើអនុញ្ញាតទៅសម្ដេចតេជោ សម្រេចចុងក្រោយ។ បញ្ហាគ្រឿងញៀនជារឿងគួរឲ្យព្រួយបារម្ភបំផុត ដែលសមត្ថកិច្ចខិតខំយកចិត្តទុកដាក់ទប់ស្កាត់។ ប៉ុន្តែវាមិនអាចបានមួយភាគរយឡើយ។ នោះក៏ព្រោះតែឈ្មួញទុច្ចរិត មានល្បិចកលខ្ពស់។ បើតាមសម្ដេច ស ខេង តំបន់ដែលចែកគ្រឿងញៀនខ្លាំងនោះ គឺចេញពីតំបន់ត្រីកោណមាស ជាពិសេសពីច្រកប្រទេសឡាវ មកកម្ពុជា។
ក្នុងឱកាសសម្ពោធអាងហែលទឹកនៅដើមសប្ដាហ៍នេះ ក្នុងខេត្តបាត់ដំបងសម្ដេចក្រឡាហោមបានមានប្រសាសន៍ថា រយៈពេលជាង ២ឆ្នាំនេះ សមត្ថកិច្ចបង្ក្រាបគ្រឿងញៀនបានជាង៧០០គីឡូក្រាម តាមរយៈយុទ្ធនាការបង្ក្រាបគ្រឿងញៀនរបស់រដ្ឋាភិបាល កាលពីឆ្នាំ២០១៧៕