ចូលឆ្នាំថ្មីភ្នំពេញស្ងាត់ស្ទើរគ្រប់ច្រកល្ហក តែមនុស្សឈូរឆរមកពីគ្រប់ទិសទីបន្តមកចាក់វ៉ាក់សាំងនៅប៉ាស្ទ័រ (មានវីដេអូ)

2019-04-15 05:27:53
ចំនួនមតិ 0 | ចំនួនចែករំលែក 0

ចន្លោះមិនឃើញ

បើទោះជាថ្ងៃបុណ្យចូលឆ្នាំថ្មីប្រពៃណីជាតិក៏ពិតមែន តែប្រជាពលរដ្ឋយ៉ាងច្រើនកុះករបានសម្រុកមកចាក់ថ្នាំការជំងឺឆ្កែឆ្កួតនៅវិទ្យាស្ថានប៉ាស្ទ័រកម្ពុជារាជធានីភ្នំពេញកាលពីព្រឹកមិញនេះ។

លោកវេជ្ជបណ្ឌិតមួយរូបប្រាប់ Sabay ក្នុងលក្ខខណ្ឌមិនបញេ្ចញឈ្មោះឲ្យដឹងថា មន្ទីរពេទ្យនៅបន្តបើកឲ្យមកចាក់ថ្នាំជំងឺឆ្កែឆ្កួត និងសេវាកម្មផ្សេងទៀតធម្មតាមិនមានការឈប់សម្រាកទេ។ មិនឈប់សម្រាកដោយសារវេជ្ជបណ្ឌិតបានណាត់អ្នកត្រូវឆ្កែ ឬឆ្មាខាំមកទទួលវ៉ាក់សាំងតាមការកំណត់។

លោក យិន យឿន ប្រជាពលរដ្ឋរស់នៅខេត្តកំពង់ស្ពឺ ឲ្យដឹងថា លោកមិនអាចធ្វេសប្រហែលទេ ត្រូវតែមកទទួលវ៉ាក់សាំងការពារឆ្កែឆ្កួតតាមការកំណត់របស់វេជ្ជបណ្ឌិត ដោយសារកូនលោកបានទទួលវ៉ាក់សាំងម្តងហើយ។

ចំណែកកញ្ញា ពៅ ដានី រស់នៅរាជធានីភ្នំពេញ ថា ខ្លួនធ្លាប់ត្រូវឆ្មារខ្វាចទើបមកទទួលវ៉ាក់នៅពេលនេះដោយគិតថាស្ងាត់ស្រួលមិនបាច់ចាំលេខរៀងយូរ ផ្ទុយទៅវិញថ្ងៃចូលឆ្នាំខ្មែរស្ងប់ស្ងាត់នៅកន្លែងខ្លះក៏ពិតមែន តែនៅប៉ាស្ទ័រមិនស្ងាត់ទេ។ពោលប្រជាពលរដ្ឋស្ទើរគ្រប់ទិសទីមកទទួលវ៉ាក់សាំងការជំងឺឆ្កែឆ្កួត។

ថ្មីៗកន្លងមកនេះប្រជាពលរដ្ឋបានផ្អើលមកចាក់វ៉ាក់សាំងការជំងឺឆ្កែឆ្កួត បន្ទាប់ពីមានការសង្ស័យថាមានមនុស្សស្លាប់ដោយឆ្កែឆ្កួតខាំដំបូងបង្អស់នៅខេត្តស្វាយរៀង កាលពីដើមឆ្នាំនេះ។

ឆ្លើយតបនឹងបញ្ហានេះ ក្រសួងសុខាភិបាល បានជូនដំណឹងឲ្យប្រជាពលរដ្ឋ ដែលមានឆ្កែខាំ ឬឆ្មាខ្វាចនៅតាមមណ្ឌលសុខភាពទូទាំងប្រទេស ឬទៅកាន់មជ្ឈមណ្ឌលឆ្កែឆ្កួតនៅបាត់ដំបង ខេត្តកំពង់ចាម ដែលទើបបើកឲ្យដំណើការ កាលពីពេលថ្មីៗនេះ និងវិទ្យាស្ថានប៉ាស្ទ័រកម្ពុជានៅភ្នំពេញ។