លោក ជា រិទ្ធ ពីអនុបណ្ឌិតភាសាអង់គ្លេសក្លាយជាគ្រូប្រដាល់ដ៏ល្បី

2019-04-18 01:54:54
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ជា រិទ្ធ គ្រូបង្វឹកប្រចាំក្លឹបអាណាចក្រប្រយុទ្ធក្នុងខេត្តសៀមរាបពេលបច្ចុប្បន្ននេះបានប្រែក្លាយខ្លួនពីសាស្ត្រាចារ្យអក្សរសាស្ត្រភាសាអង់គ្លេសដែលបានបញ្ចប់អនុបណ្ឌិតផ្នែកអក្សរសាស្ត្រភាសាអង់គ្លេសនៅសាកលវិទ្យាល័យន័រតុននោះ ក្លាយជាគ្រូបង្វឹកប្រដាល់ដ៏មានឈ្មោះបោះសំឡេងនៅក្នុងស្រុក។

លោក ជា រិទ្ធ និង គង់ សំបូរ

ពេលនេះលោកមាន កូន សិស្សលេចធ្លោមួយចំនួនដូចជា គង់ សំបូរ, ឫទ្ធ សាស្ត្រាវុធ និង ឆោម ប៊ុនឡុង ជាដើម។ គង់ សំបូរ បានឡើងប្រកួតលើសង្វៀន One Championship និង ឡើងប្រកួតញឹកញាប់នៅតាមសង្វៀនទូរទស្សន៍នានា។ ក្នុងអំឡុងពេលចូលឆ្នាំថ្មីប្រពៃណីជាតិនេះ សំបូរ បានយកឈ្នះ ពុយ វណ្ណៈ ដោយពិន្ទុដើម្បីឈ្នះពាន និងប្រាក់រង្វាន់ ៤០០ ដុល្លារអាមេរិកនៅខេត្តព្រៃវែង។ រីឯ អ្នកកំពុងទទួលបានការចាប់អារម្មណ៍ថ្មីៗនេះម្នាក់ទៀតគឺ ឫទ្ធ សាស្ត្រាវុធ ដែលទើបឈ្នះ សឿន ថៃសាន្ត ក្នុងកម្មវិធីប្រដាល់ចូលឆ្នាំប្រពៃណីជាតិថ្មីដូចគ្នា។ ចំណែក ឆោម ប៊ុនឡុង ក៏ទស្សនិកជនចាប់ផ្ដើមស្គាល់ជាច្រើនដែរ តាមរយៈ ការឈ្នះ ឡុង ណងសៅ និង ឈ្នះការប្រកួតជាច្រើនទៀតតាមសង្វៀនទូរទស្សន៍។

លោក ជា រិទ្ធ និង គង់ សំបូរ

មូលហេតុនាំឲ្យលោក ជា រិទ្ធ ក្លាយជាគ្រូបង្វឹកព្រោះតែរូបលោកក៏ជាអតីតកីឡាករប្រដាល់នាទសវត្សរ៍៩០ ដែលរូបលោកធ្លាប់ ប្រកួតទល់នឹង នួន បូរ៉ា និង គឹម ចាន់ធឿន ជាដើម។ លោកនៅចាំបានថា លោកឡើងប្រកួតលើរេញផ្លូវការបានចំនួន៤ដង ជាពិសេសការប្រកួតពានរង្វាន់សម្ដេចហ៊ុន សែន ឆ្នាំ ១៩៩៧។ ប៉ុន្តែបើគិតអំពីការឡើងប្រកួតក្នុងកម្មវិធីបុណ្យនានា សាស្ត្រាចារ្យភាសាអង់គ្លេសរូបនេះ ធ្លាប់ឡើងសង្វៀនបានជាង២០ដងដែរដើម្បីយកកម្រៃទៅចាយវាយក្នុងការសិក្សា។

គង់ សំបូរ ឈ្នះពានពេលប្រកួតចូលឆ្នាំនៅព្រៃវែង

គ្រូបង្វឹកវ័យ៣៧ឆ្នាំបញ្ជាក់ហេតុផលចូលមកប្រឡូកក្នុងវិស័យគុនខ្មែរបែបនេះ ៖«ពីមុនខ្ញុំហ្វឹកហាត់ប្រដាល់ជាមួយជីតារបស់ខ្ញុំឈ្មោះ សេត នៅខេត្តកណ្ដាល ហើយ បន្ទាប់មកក៏បន្តមកហាត់ជាមួយលោកគ្រូ ទឹម ម៉ៃទី នៅខេត្តកណ្ដាលដដែលពេលរៀននៅអនុវិទ្យាល័យ។ ពេលខ្ញុំរៀននៅវិទ្យាល័យ និង ត្រៀមប្រលងបាក់ឌុប ខ្ញុំក៏ផ្អាកមួយរយៈ។ ពេលចប់បាក់ឌុប ខ្ញុំជាប់រៀនជំនាញផ្នែកអក្សរសាស្រ្តអង់គ្លេសនៅ សាកលវិទ្យាល័យបៀលប្រាយ រហូតដល់ឆ្នាំ ២០០៧ ថ្នាក់បរិញ្ញាបត្រ មុនបន្តយកអនុបណ្ឌិតលើជំនាញដដែលនៅ ន័រតុន ក្នុងពីរឆ្នាំបន្ទាប់។ អំឡុងពេលសិក្សានៅ សាកល ខ្ញុំបានផ្អាកប្រដាល់ព្រោះយកពេលសិក្សា»។

លោករំលឹកទៀតថា អំឡុងពេលសិក្សានៅសាកលវិទ្យាល័យ គ្រូបង្វឹកមានស្រុកកំណើតនៅខេត្តកណ្ដាលទទួលបានថ្នាក់បង្រៀនជាហូរហែនៅសាលវិទ្យាល័យឯកជនក្នុងរាជធានីភ្នំពេញ និង ឡើងដល់ថ្នាក់បង្រៀនសាកលវិទ្យាល័យបៀលប្រាយទៀតផង។ បន្ទាប់មកលោកក៏បានឡើងចុះទៅបង្រៀននៅសាកលវិទ្យាល័យមួយចំនួននាទឹកដីអង្គរ និង បង្កើតក្រុមគ្រួសាររស់នៅទីនោះដល់បច្ចុប្បន្ន។ ជាគ្រូបង្វឹកប្រដាល់ផង លោកក៏មានថ្នាក់បង្រៀនភាសាអង់គ្លេសក្រៅម៉ោងខ្លះនៅសាកលវិទ្យាល័យនានានៅទឹកដីខេត្តសៀមរាបបច្ចុប្បន្ន។

លោក ជា រិទ្ធ (ស្តាំទី១) និង គង់ សំបូរ (កណ្តាល)

ដោយក្ដីស្រលាញ់វិស័យក្បាច់គុន ហើយ ធ្លាប់ហាត់គុនខ្មែរ តេក្វាន់ដូ និង វូស៊ូ គួបផ្សំនឹងការស្រាវជ្រាវក្បាច់គុនជាច្រើនផងនោះ កូនសិស្សលោកទឹម ម៉ៃទី ក៏សម្រេចបើកក្លិបប្រដាល់ គុហាព្រហ្មជ័យ នៅខេត្តសៀមរាប ដែលមានកូនសិស្ស ៤ ទៅ ៥ នាក់ តាំងពីឆ្នាំ ២០១៣ មុនពេលទទួលបានសេចក្ដីទុកចិត្តឲ្យចូលបង្ហាត់នៅក្លិបប្រដាល់អាណាចក្រប្រយុទ្ធជាង ១ ឆ្នាំមកនេះ៕

អត្ថបទ៖ ស៊ីធី