ពេលទិញឡានមួយទឹក កុំភ្លេចធ្វើរឿងទាំងនេះ បើមិនចង់រត់រកជាងញឹក
- 2019-04-18 02:13:57
- ចំនួនមតិ 0 | ចំនួនចែករំលែក 0
ពេលទិញឡានមួយទឹក កុំភ្លេចធ្វើរឿងទាំងនេះ បើមិនចង់រត់រកជាងញឹក
ចន្លោះមិនឃើញ
រថយន្តមួយទឹក គ្របដណ្តប់ជិត ៩០ភាគរយនៅលើទីផ្សាររថយន្តនៅកម្ពុជា ដោយសារតែវាមានតម្លៃត្រឹម ១ម៉ឺន ទៅ២ម៉ឺន សមល្មមសម្រាប់អ្នកមានជីវភាពមធ្យមទិញជិះ។
ពេលទិញឡានមួយទឹកមកជិះភ្លាម តើអ្នកត្រូវធ្វើដូចម្ដេចខ្លះ?
បើតាម លោក ហេង ថាត់ ជាអ្នកលក់រថយន្តមួយទឹកនៅរាជធានីភ្នំពេញ បានប្រាប់ Sabay ថា ពេលទិញរថយន្តមួយទឹកភ្លាម ត្រូវអនុវត្តប៉ុន្មានចំណុចសំខាន់នេះ។
១. លាងសម្អាត
ពេលទិញភ្លាម គួរយកទៅកន្លែងលាងសម្អាតឲ្យគេលាងសម្អាតភាពកខ្វក់ទាំងខាងក្នុងនិងខាងក្រៅរថយន្ត ដើម្បីនាំភាពស្រស់ថ្លា ក៏ដូចជានាំសិរីសួស្តីលើរថយន្តរបស់អ្នក។
២. ប្ដូរប្រេង
ត្រូវប្ដូរប្រេងម៉ាស៊ីនចោលភ្លាម ក៏ដូចជាប្រេងប្រអប់លេខ ប្រេងចង្កូត ប្រេងមីញុង ប្រេងហ្វាំ្រងជាដើម។ ព្រោះមុនពេលម្ចាស់រថយន្តលក់ មិនបានផ្លាស់ប្តូរបានត្រឹមត្រូវ ដើម្បីឲ្យរថយន្តដំណើរការបានល្អ។
៣. ផ្លាស់ប្ដូរសម្បកកង់
សម្បកកង់ បើត្រូវប្តូរក៏គួរតែប្តូរដែរ។ ពិនិត្យមើលឲ្យបានលម្អិតថាសម្បកកង់មានការប្រេះ ឬសឹក? ពិសេសពេលទិញនៅច្បាស់ណាស់អ្នកលក់ប្រកាដជាផ្ដល់ជម្រើសឲ្យអ្នកក្នុងការជ្រើសរើសកង់ប្ដូរ ហើយបើសម្បកហើមវាអាចធ្វើឲ្យរថយន្តញ័រ ខណៈពេលបើកបរក្នុងល្បឿនលឿន។ បើជួបថាមានសភាពដូចការរៀបរាប់ខាងលើ ប្រញាប់ប្ដូរយកសម្បកកង់ថ្មី។
៤. ឆែកប្រព័ន្ធហ្រ្វាំង
ហ្រ្វាំងឡានមាន ២ប្រភេទគឺហ្រ្វាំងដៃ ដែលអ្នកអាចដាក់បានដោយការទាញវានៅពេលឈប់ស្ងៀម និងហ្វ្រាំងជើង ដែលអ្នកត្រូវប្រើប្រាស់ភ្លាមៗ ដើម្បីបន្ថយល្បឿន ឬចង់ឈប់រថយន្ត។ ដូច្នេះការមើលថែទាំហ្រ្វាំងដោយថែមប្រេង ឬប្ដូរស្បែកហ្រ្វាំងជួយឲ្យរថយន្តអ្នកដំណើរការបានយ៉ាងប្រក្រតី។ ហ្រ្វាំងសំខាន់ណាស់ ទាក់ទងសុវត្ថិភាពក្នុងការបើកបរ។ ពិនិត្យមើលប្រព័ន្ធហ្រ្វាំង ហើយបើចាំបាច់ត្រូវប្តូរថ្មីកុំឲ្យមានបញ្ហាពេលធ្វើដំណើរ។
៥. ជួសជុលចំណុចខូចខាត
ពេលទិញអ្នកបានពិនិត្យមើលគ្រប់ជ្រុងជ្រោយក៏ដោយ ប៉ុន្តែពេលខ្លះក៏អាចមើលរំលងចំណុចណាមួយក៏ថាបាន។ វិធីល្អអ្នកត្រូវយករថយន្តទៅយានដ្ឋាន ដើម្បីពិនិត្យមើលសភាពរថយន្ត ហើយឲ្យជាងបញ្ជាក់ពីផ្នែកណាខ្លះដែលត្រូវប្ដូរចេញ ។
ជាចុងក្រោយលោកបញ្ជាក់ប្រាប់ថា ការទិញរថយន្តមួយទឹកមិនល្អ១០០% ក៏មិនមែនជារឿងប្លែកដែរ។ តែរឿងសំខាន់បំផុតគឺការថែទាំឲ្យបានល្អដើម្បីឲ្យប្រើប្រាស់បានយូរ៕
ចុចអាន៖