គិតគូរបរិស្ថាន Starbucks សម្រេចដាក់ឱ្យប្រើប្រាស់កែវឡើងវិញនៅថ្ងៃទិវាផែនដី
- 2019-04-22 03:08:43
- ចំនួនមតិ 0 | ចំនួនចែករំលែក 0
គិតគូរបរិស្ថាន Starbucks សម្រេចដាក់ឱ្យប្រើប្រាស់កែវឡើងវិញនៅថ្ងៃទិវាផែនដី
ចន្លោះមិនឃើញ
ដើម្បីជំរុញឲ្យមានការប្រើប្រាស់ឡើងវិញកាន់តែផុសផុល ស្របជាមួយទិវាផែនដី (២២ មេសា) និងដើម្បីលើកទឹកចិត្តឲ្យអតិថិជនរបស់ខ្លួន ឲ្យសម្រេចចិត្តដោយគិតគូរពីបរិស្ថានកាន់តែច្រើនជាងមុន ហាងកាហ្វេ Starbucks នៅប្រទេសកម្ពុជា បានប្តេជ្ញាកាត់បន្ថយការផលប៉ះពាល់ដល់បរិស្ថាន និងជួយដល់សហគមន៍។
ជារៀងរាល់ថ្ងៃ អតិថិជនអាចទទួលបានការបញ្ចុះតម្លៃ ១៣០០រៀល (០.៣០ ដុល្លារ) លើភេសជ្ជៈរបស់គាត់ដោយប្រើកែវប្រើប្រាស់ឡើងវិញបាន (reusable cups) ឬក៏ដបទឹកផ្ទាល់ខ្លួននៅគ្រប់សាខា Starbucks កម្ពុជាទាំងអស់។ លើសពីនេះទៀត Starbucks ក៏មានដាក់លក់ផលិតផលកែវប្រើប្រាស់ឡើងវិញប្រភេទថ្មី សម្រាប់ភេសជ្ជៈក្តៅនិងត្រជាក់ ក្នុងតម្លៃមួយដ៏សមរម្យ ដែលអតិថិជនអាចរកទិញបាន ចាប់ពីថ្ងៃទី ១០ ខែមេសា តទៅ ។
ដើម្បីជំរុញឲ្យសកម្មភាពប្រើប្រាស់នេះកាន់តែមានប្រសិទ្ធភាព Starbucks ក៏បានចែកជូនកែវប្រើប្រាស់ឡើងវិញបាននោះចំនួនជាង ២០០ ឈុតទៅកាន់ដៃគូឆុងកាហ្វេទាំងអស់របស់ខ្លួនផងដែរ។ កែវប្រើប្រាស់ឡើងវិញបាននេះ មានរូបរាងស្ទើរតែដូចកែវក្រដាសពណ៌ស Starbucks ហើយកែវនេះ ធ្វើពីប៉ូលីប្រូភីឡែន ដែលសារធាតុប្លាស្ទិកពិសេសម្យ៉ាង ដែលអាចយកមកកែច្នៃប្រើប្រាស់ឡើងវិញបាន។ កែវនេះ ត្រូវបានរចនាយ៉ាងផ្ចិតផ្ចង់ ដើម្បីឲ្យវាមានរាងសក្តិសមជាងក្រដាស ហើយស្តើងជាងដបដាក់ទឹកធម្មតា (tumbler)។
លោក ប៉ោ លីម ប្រធានគ្រប់គ្រងទូទៅ នៃ Starbucks កម្ពុជា ថ្លែងថា៖ "យើងឃើញថា សាធារណជន មានការយល់ដឹង និងព្រួយបារម្ភច្រើន អំពីបញ្ហាកាកសំណល់ប្លាស្ទិក នារយៈពេលប៉ុន្មានឆ្នាំចុងក្រោយនេះ។ យើងមានភាពរីករាយក្នុងការផ្តល់ជម្រើសការប្រើប្រាស់ឡើងវិញ នៅតាមហាង Starbucks ទាំងអស់នៅប្រទេសកម្ពុជា ដោយធានាផ្តល់ឲ្យអតិថិជននូវបទពិសោធន៍ល្អ នៃទម្លាប់ញ៉ាំកាហ្វេរបស់អតិថិជនដដែល ក៏ដូចជាជំរុញឲ្យអតិថិជនរបស់យើង ជ្រើសរើសអ្វីដែលអាចប្រើប្រាស់ឡើងវិញ តាមដែលអាចធ្វើទៅបាន"។
ទន្ទឹមគ្នានេះដែរ លោកបន្ថែមទៀតថា៖ "ដើម្បីចូលរួមអបអរទិវាផែនដី ថ្ងៃ ២២ មេសានេះ Starbucks នឹងមានការបញ្ចុះតម្លៃទ្វេដង គឺដល់ទៅ ២៥០០ រៀល (០.៦០ ដុល្លារ) ជូន អតិថិជនដែលទិញភេសជ្ជៈភ្ជាប់ជាមួយកែវ ឬដបប្រើប្រាស់វិញបាន"។
លើសពីនេះទៀត ក្នុងថ្ងៃទី ៣០ ខែ មេសានេះ Starbucks ដោយមានកិច្ចសហការជាមួយអង្គការ មូលនិធិអាស៊ី (The Asia Foundation Cambodia) ដែលជាអង្គការអន្តរជាតិមួយ ផ្តោតសំខាន់លើការលើកកម្ពស់សកម្មភាពស្ត្រីនិងយុវជន រួមចំណែកសកម្មភាពសង្គមនិងបរិស្ថាន តាមរយៈគម្រោងទំនួលខុសត្រូវផ្សេងៗដូចជាការប្រើប្រាស់ឡើងវិញ អនាម័យ និងការដាំដើមឈើជាដើម។
នៅទូទាំងពិភពលោក កែវក្រដាស និងប្លាស្ទិក ប្រមាណ ៦០០ ពាន់លាន ត្រូវបានចែកចាយជារៀងរាល់ឆ្នាំ។ បើទោះបីកែវ Starbucks មានតែ ១ ភាគរយប៉ុណ្ណោះនៃចំនួននេះ ក៏ដោយ ក៏ Starbucks ប្តេជ្ញាជួយបង្កើតដំណោះស្រាយប្រកបដោយនិរន្តរភាព ដើម្បីកាត់បន្ថយកាកសំណល់ប្លាស្ទិក។ បើគិតតាំងពីឆ្នាំ ២០១៤ Starbucks បានចែកចាយកែវប្រើប្រាស់ឡើងវិញបណ្តាប្រទេសធំៗដូចជា អាមេរិក កាណាដា និងអង់គ្លេស ដែលគិតសរុបមានចំនួនលើសពី ២៥ លានកែវរួចមកហើយ ។
ទិវាផែនដី ក៏ជាពេលវេលាមួយ ក្នុងការរំលឹកឡើងវិញនូវការបេ្តជ្ញារយៈពេលវែងរបស់ក្រុមហ៊ុន Starbucks ដើម្បីផ្តោតទៅលើនិរន្តរភាព។ កាលពីឆ្នាំមុន Starbucks បានវិនិយោគទឹកប្រាក់ ១០ លានដុល្លារ ដើម្បីផលិតកែវភេសជ្ជៈដែលអាចកែច្នៃឡើងវិញ និងអាចរលាយបាន ដោយសហការជាមួយ Closed Loop Partners តាមរយៈ NextGen Cup Challenge បូករួមនឹងការប្រកាសនូវគម្រោងបច្ចេកវិជ្ជាសាកល្បងប្រើប្រាស់កែវនេះ នៅលើទីផ្សារទូទាំងពិភពលោក សម្រាប់រយៈប៉ុន្មានឆ្នាំតទៅមុខទៀត។ បើយោងតាមគោលការណ៍ដែលបានប្រកាស កាលពីខែ កក្កដា កន្លងទៅ ក្រុមហ៊ុន ក៏កំពុងធ្វើការដើម្បីលុបបំបាត់ទុយោជ័រ ពីហាងជាង ៣ម៉ឺនសាខា ទូទាំងពិភពលោក ត្រឹមឆ្នាំ ២០២០ ដោយអាចឈប់ប្រើទុយោជ័រចំនួនជាង ១ ពាន់លានទុយយោ៕