ហេតុអ្វីយុវវ័យចូលចិត្តថតរូបក្នុងបន្ទប់ទឹក?

2019-04-22 03:20:07
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅលើបណ្ដាញសង្គម Facebook តែងតែឃើញយុវវ័យមួយចំនួន ចូលចិត្តបង្ហោះរូបខ្លួនឯង ដែលបានថតនៅក្នុងបន្ទប់ទឹក មិនថាក្នុងបន្ទប់ទឹកតាមសាធារណៈ ឬ ក៏នៅក្នុងផ្ទះទេ។ តើហេតុអ្វីបានជាយុវវ័យបច្ចុប្បន្ននិយមថតរូបក្នុងបន្ទប់ទឹក?

ឆ្លើយតបនឹងសំណួរខាងលើ យុវជន ស៊ឹម សូរ្យម៉ូនិន្ទ ជានិស្សិតឆ្នាំទី ១ នៃសាកលវិទ្យាល័យកម្ពុជា បានប្រាប់ Sabay ថា ខ្លួនចូលចិត្តថតរូបក្នុងបន្ទប់ទឹកព្រោះថា ក្នុងបន្ទប់ទឹកមានកញ្ចក់ធំមើលបានមួយជំហរខ្លួន។

យុវជនដែលសិក្សាផ្នែករដ្ឋបាល រូបនេះ ក៏បានបន្តទៀតថា៖ "មិនមែនអោយតែពេលចូលបន្ទប់ គឺសុទ្ធតែថតរូបទេ ពេលបត់ដៃបត់ជើងរួចក៏ឆ្លុះកញ្ចក់ បើមើលឃើញថា ខ្លួនឯងស្អាតទើបថត”។ ម៉ូនិន្ទ ក៏បានបន្តលើកបន្ថែមថា ការថតរូបក្នុងបន្ទប់ទឹកមិនមែនជារឿងមិនល្អនោះទេតែវាអាស្រ័យ លើទីតាំងក្នុងបន្ទប់ទឹកដែរ បើថតឱ្យឃើញចានបង្គន់ក៏មិនល្អដែរ។

Photo-in-bathroom

ការថតរូបនៅក្នុងបន្ទប់ទឹក (រូបថតបរទេស)

ស្រដៀងគ្នានេះដែរ កញ្ញា លី ស្រីពៅ និស្សិតឆ្នាំទី ២ នៃសាកលវិទ្យាល័យអន្តរជាតិបានលើកឡើងថា៖ "គ្មានឃើញខុសត្រង់ណាផង ព្រោះវាមិនមែនជាការរំខានអ្នកដទៃ"។ និស្សិតផ្នែក ធនាគាររូបនេះបានប្រាប់ថា ខ្លួនមិនចូលចិត្តថតរូបក្នុងបន្ទប់ទឹកទេតែវាក៏មិនមានផលប៉ះពាល់អ្វីដល់យុវវ័យ ដែលចូលចិត្តធ្វើរឿងដូចនេះដែរ។

កញ្ញា ជុំ ដាណែត និស្សិត ភាសាអង់គ្លេស នៃសាកលវិទ្យាល័យមួយកន្លែង បានលើកឡើងថា កន្លែងដែលខ្លួនចូលចិត្តថតនោះ គឺបន្ទប់ទឹកនៅតាម ផ្សារទំនើបព្រោះថា វាស្អាតនិងមានកញ្ចក់ធំ។

ឆ្លើយតប នឹងសំណួរដែលលើកឡើងថា តើការថតរូបក្នុងបន្ទប់ទឹកជារឿងល្អឬទេ? ដាណែត លើកឡើងថា "ខ្ញុំយល់ថា មិនមែនជារឿងមិនល្អទេ គឺវាអាស្រ័យលើអ្នកថតយកស្ទិលយ៉ាងម៉េចប៉ុណ្ណោះ!”។

តែទោះបីជាយ៉ាងណាក៏ដោយ កញ្ញា សុវណ្ណ សិលា និស្សិត បញ្ចប់បរិញ្ញាបត្រច្បាប់ បានលើកឡើងថា៖ "ថតរូបក្នុងបន្ទប់ទឹកមិនប៉ះពាល់ដល់អ្នកណាមែន ប៉ុន្តែ វាមិនមែនជារឿងសមរម្យទេពេលដែល post ទៅមានអ្នកខ្លះកំពុងញ៉ាំបាយហើយក៏ឃើញរូបភាពក្នុងបន្ទប់ទឹក គិតទៅមិនសូវសមដែរ! ម្យ៉ាងទៀត បន្ទប់ទឹកជាកន្លែងលាក់បាំង មិនគួរណាថត បង្ហោះជាសាធារណៈទេ!”៕

ចុះប្រិយមិត្តអ្នកវិញ មានយោបល់ដូចម្ដេចដែរជុំវិញបញ្ហានេះ?

អត្ថបទ៖ គង់ ច័ន្ទវ៉ាន់ណេង