មូលនិធិព្រីនស៍ បានផ្ដល់អគារសិក្សាថ្មីដល់អនុវិទ្យាល័យ ហ៊ុនសែន ប្រាសាទ គិតជាទឹកប្រាក់ ជាង១សែនដុល្លារ
- 2019-04-22 08:35:06
- ចំនួនមតិ 0 | ចំនួនចែករំលែក 0
មូលនិធិព្រីនស៍ បានផ្ដល់អគារសិក្សាថ្មីដល់អនុវិទ្យាល័យ ហ៊ុនសែន ប្រាសាទ គិតជាទឹកប្រាក់ ជាង១សែនដុល្លារ
ចន្លោះមិនឃើញ
អគារសិក្សារបស់អនុវិទ្យាល័យ ហ៊ុនសែន ប្រាសាទ ក្នុងខេត្តកណ្តាល ដែលជាអំណោយឧបត្ថម្ភរបស់អង្គការមូលនិធិព្រីនស៍ រៀល អ៊ីស្ទេត បានដាក់សម្ពោធឲ្យប្រើប្រាស់ជាផ្លូវការហើយ កាលពីថ្ងៃទី ២០ ខែមេសា ឆ្នាំ២០១៩ ។ អគារសិក្សាថ្មីនេះ ចំណាយអស់ប្រាក់ជាង ១សែនដុល្លារអាមេរិក។
ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ លោក ឈាវ គួរស៊ីញ ប្រធានប្រតិបត្តិក្រុមប្រឹក្សាភិបាល នៃក្រុមហ៊ុនព្រីនស៍ រៀល អ៊ីស្ទេត គ្រុប និងប្រធានអង្គការមូលនិធិព្រីនស៍ រៀល អ៊ីស្ទេត រួមជាមួយនឹងថ្នាក់ដឹកនាំជាច្រើនរូបទៀត បានអញ្ជើញចូលរួមជាអធិបតីក្នុងកម្មវិធីបើកសម្ពោធដាក់ឲ្យប្រើប្រាស់អគារសិក្សានេះ។
លោក ឈាវ គួរស៊ីញ ប្រធានប្រតិបត្តិក្រុមប្រឹក្សាភិបាលនៃក្រុមហ៊ុនព្រីនស៍ រៀល អ៊ីស្ទេត គ្រុប និងប្រធានអង្គការមូលនិធីព្រីនស៍ រៀល អ៊ីស្ទេត បានឡើងថ្លែងសន្ទរកថា និងបានបញ្ជាក់ថា ការអប់រំជាមូលដ្ឋានគ្រឹះ នៃភាពចម្រុងចម្រើនរបស់ប្រជាសាស្ត្រនិមួយៗ។
ចាប់តាំងពីការបង្កើតឡើង នៃអង្គការមូលនិធីសប្បុរសធម៌ព្រីនស៍ រៀល អ៊ីស្ទេត គ្រុប យើងតែងតែយកចិត្តទុកលើការអភិវឌ្ឍន៍កិច្ចការអប់រំ និងវប្បធម៌ នៃព្រះរាជាណាចក្រកម្ពុជា ដែលបច្ចុប្បន្នយើងបានធ្វើការបរិច្ចាកក្នុងទឹកប្រាក់សរុប ២ លានដុល្លារអាមេរិក សម្រាប់ជាអំណោយការសាងសង់អគារសិក្សា អគារស្នាក់នៅរបស់លោកគ្រូ-អ្នកគ្រូ និងសាលប្រជុំក្នុងតំបន់នានាក្នុងប្រទេសកម្ពុជា។ ការសាងសង់អគារសិក្សាថ្មីនេះ នឹងជួយកែសម្រួលបរិស្ថានសិក្សារបស់អនុវិទ្យាល័យ ហ៊ុនសែន ប្រាសាទ។ លោក ឈាវ គួរស៊ីញ មានប្រសាសន៍។
"យើងសង្ឃឹមថា ក្រោមការខិតខំប្រឹងប្រែងរបស់សិស្សានុសិស្ស និងលោកគ្រូអ្នកគ្រូទាំងអស់គ្នា អនុវិទ្យាល័យហ៊ុនសែន ប្រាសាទ នឹងរីកចម្រើនឥតឈប់ឈរ។ យើងក៏សង្ឃឹមយ៉ាងម៉ុតម៉ាំផងដែរថា សិស្សានុសិស្សទាំងអស់នឹងខិតខំប្រឹងប្រែងសម្រេចសុបិនរបស់ខ្លួន និងក្លាយខ្លួនជាសសរទ្រូងរបស់ប្រទេសជាតិ"។ នេះជាការលើកឡើងរបស់ លោក ឈាវ គួរស៊ីញ។
ក្រោមសំលេងទះដៃយ៉ាងគគ្រឹកគ្រេង ឯកឧត្តម ប្រាក់សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានថ្លែងអំណរគុណយ៉ាងស្មោះស្ម័គ្រ និងលើកសរសើរយ៉ាងខ្ពស់ដល់អង្គការមូលនិធិព្រីនស៍ រៀល អ៊ីស្ទេត ចំពោះការបរិច្ចាគដោយមិនគិតពីប្រយោជន៍ផ្ទាល់ខ្លួនចំពោះការចូលរួមចំណែកក្នុងការអភិវឌ្ឍន៍កិច្ចការសប្បុរសនៅព្រះរាជាណាចក្រកម្ពុជា ការយកចិត្តទុកដាក់ចំពោះជីវភាពរស់នៅរបស់ប្រជាពលរដ្ឋកម្ពុជា ក៏ដូចជាការខិតខំប្រឹងប្រែងនិងការប្តេជ្ញាចិត្តក្នុងការជំរុញការអភិវឌ្ឍន៍កិច្ចការសប្បុរសនៅព្រះរាជាណាចក្រកម្ពុជាផងដែរ។ លោកក៏សង្ឃឹមផងដែរថា នឹងមានសហគ្រាសកាន់តែច្រើនឡើងអាចចូលរួមចំណែកក្នុងកិច្ចការសប្បុរស ដើម្បីផ្ដល់ក្ដីស្រឡាញ់រួមគ្នា។
អគារសិក្សាចាស់នៃអនុវិទ្យាល័យ ហ៊ុនសែន ប្រាសាទ មានភាពចាស់ទ្រុឌទ្រោម និងមិនអាចប្រើប្រាស់បាន។ អង្គការមូលនិធិសប្បុរសធម៌ព្រីនស៍ រៀល អ៊ីស្ទេត បានផ្តល់អំណោយជាថវិកាសរុបចំនួន ១១ ៥០០០ ដុល្លារអាមេរិកសម្រាប់ការកសាងអគារសិក្សាថ្មីទាំងស្រុងមួយ ដែលស្មើនឹងបន្ទប់សិក្សាចំនួន ៦ បន្ទប់ទឹកចំនួន ៣ ព្រមទាំងសម្ភារៈសិក្សាផ្សេងៗទៀតដូចជា តុកៅអីសម្រាប់សិក្សាជាដើម។ បន្ទាប់ពីបញ្ចប់ការសាងសង់រួច អគារសិក្សាថ្មី នៃអនុវិទ្យាល័យ ហ៊ុនសែន ប្រាសាទ នឹងទទួលបានការកែលម្អយ៉ាងច្រើនលើសម្ភារៈ បរិក្ខារសិក្សា ក៏ដូចជាលើកកម្ពស់លក្ខខណ្ឌសិក្សាផងដែរ ដែលផ្ដល់ជូនលោកគ្រូអ្នកគ្រូ និងសិស្សានុសិស្សនូវទីធ្លាសិក្សាប្រកបដោយបរិយាកាសរីករាយ និងផ្ដល់ជាវេទិកាថ្មីមួយសម្រាប់ការអភិវឌ្ឍខ្លួនរបស់វិទ្យាល័យ ហ៊ុនសែន ប្រាសាទ។