អគ្គីភ័យបណ្ដាលឲ្យមនុស្ស ២នាក់រងរបួស នៅចំណុចខាងក្រោយមីក្រូហិរញ្ញវត្ថុ Asia Pacific Finance PLC

2019-04-22 09:43:50
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្មេងប្រុសម្នាក់ជាកូន និងស្រ្តីជាម្ដាយ ត្រូវបានសមត្ថកិច្ចសង្គ្រោះទាន់ពេលវេលា នៅក្នុងហេតុការណ៍អគ្គីភ័យមួយ កាលពីរសៀលថ្ងៃនេះ។ អគ្គីភ័យនេះកើតឡើងនៅចំណុចខាងក្រោយមីក្រូហិរញ្ញវត្ថុ Asia Pacific Finance PLC ហើយរាលដល់ហាងភីហ្សា Domino ស្ថិតនៅសង្កាត់បឹងកក់១ ខណ្ឌទួលគោក រាជធានីភ្នំពេញ។

“ភ្លាមៗនៃអគ្គីភ័យសមត្ថកិច្ច និងរថយន្តអគ្គីភ័យបានចេញប្រតិបត្តិការណ៍ជួយសង្គ្រោះមនុស្ស និងពន្លត់អគ្គីភ័យបានសម្រេច ដែលមិនមានអ្នកស្លាប់នោះទេ គឺមានអ្នករងរបួស គឺក្មេងប្រុសម្នាក់បានបញ្ជូនទៅមន្ទីរពេទ្យកុមារជាតិ និងម្ដាយក្មេងប្រុសបញ្ជូនទៅមន្ទីរពេទ្យកាល់ម៉ែត្រ។ ពួកគេសុខសប្បាយ។" នេះជាការលើកឡើងរបស់ លោកឧត្ដមសេនីយ៍ទោ ឈាង ផាន់ណារ៉ា ស្នងការរងរាជធានីភ្នំពេញ ទទួលបន្ទុកផែនអាវុធជាតិផ្ទុះ និងអគ្គីភ័យ។

លោកឧត្ដមសេនីយ៍ទោ បានបន្ថែមទៀតថា នៅក្នុងប្រតិបត្តិការណ៍ជួយសង្គ្រោះ សមត្ថកិច្ចបានប្រើប្រាស់រថយន្តពន្លត់អគ្គីភ័យចំនួន ១០គ្រឿង ដែលបណ្ដាលឲ្យខូចខាតប្រមាណជា ២០-៣០% ដែលធ្ងន់ធ្ងរផ្នែកមីក្រូហិរញ្ញវត្ថុ ឯហាង Domino's Pizza ខូចខាតផ្នែកខាងក្រៅប៉ុណ្ណោះ។ អគ្គីភ័យបានឆាបឆេះ ចាប់ផ្ដើមនៅម៉ោង ១៣:២៥ នាទី រហូតដល់ម៉ោង ១៤ រសៀលនេះទើបពន្លត់បាន១០០ភាគរយ។

ចំពោះមូលហេតុ លោកឧត្ដមសេនីយ៍ទោ បញ្ជាក់ថា សមត្ថកិច្ចកំពុងស្រាវជ្រាវលើបញ្ហានេះ ប៉ុន្ដែការសន្និដ្ឋានដំបូងគឺអគ្គីភ័យផ្ដើមចេញពីមីក្រូហិរញ្ញវត្ថុ Asia Pacific Finance PLC។ "មែនទែនទៅយើងគិតគូរពីសុវត្ថិភាពមនុស្ស ឯមូលហេតុយើងនឹងធ្វើការស្រាវជ្រាវក្រោយ"។

សកម្មភាពសមត្ថកិច្ច និងប្រជាពលរដ្ឋសង្គ្រោះក្មេងពីអគ្គីភ័យ (ប្រភពរូបភាព៖ BTV)

បើផ្អែកតាមវិបសាយរបស់អគ្គស្នងការនគរបាលជាតិ បានឲ្យដឹងថា តាមរបាយការណ៍ជាបឋមមានការខូចអាគារទាំងពីរខាងលើ និងមនុស្សពីរនាក់ (ស្រី០១ និងក្មេងប្រុសអាយុ ៦ឆ្នាំ ) ដែលស្នាក់នៅក្នុងអាគារមីក្រូហិរញ្ញវត្ថុ មានការរងរបួសបញ្ជូនទៅសង្គ្រោះបន្ទាន់នៅមន្ទីរពេទ្យ។ ចំពោះមូលហេតុ សមត្ថកិច្ចមិនទាន់បានបញ្ជាក់នៅឡើយទេ បច្ចុប្បន្នកម្លាំងជំនាញកំពុងស្រាវជ្រាវ៕