ស្ដែងៗ! រញ្ជួយដីកម្រិតខ្លាំងនៅហ្វីលីពីន ធ្វើឲ្យធ្លាយទឺកក្នុងអាងលើអគារធ្លាក់ចុះមកក្រោម (មានវីដេអូ)

2019-04-23 01:40:01
ចំនួនមតិ 0 | ចំនួនចែករំលែក 0

ចន្លោះមិនឃើញ

គ្រោះរញ្ជួយដីកម្រិត ៦,១វ៉ិចទ័រ បានវាយប្រហារមកលើទីក្រុង Bodega នៃកោះ Luzon ប្រទេសហ្វីលីពីនកាលពីថ្ងៃចន្ទទី ២២ខែមេសានេះ។

យោងតាមអភិបាលខេត្ត Pampanga ឲ្យដឹងថា យ៉ាងហោចណាស់មនុស្សចំនួន ៨នាក់ត្រូវបានសម្លាប់ដោយសារគ្រោះរញ្ជួយដីនេះ ហើយធ្វើឲ្យមានរំញ័រដល់រដ្ឋធានីម៉ានីឡាផងដែរ។ ចំណែកឯប្រភពក្នុងតំបន់ឲ្យដឹងដែរថា យ៉ាងហោចណាស់មនុស្ស ៧នាក់ផ្សេងទៀត បានរងរបួសនៅពេលដែលពិដានបាក់ធ្លាក់នៅព្រលានយន្ដហោះអន្ដរជាតិ Ninoy Aquino។ ជាមួយគ្នាដែរ នាយកដ្ឋានដឹកជញ្ជូនហ្វីលីពីន បានប្រកាសឲ្យផ្អាកដំណើរការហោះហើរទាំងអស់ក្នុងពេល ២៤ម៉ោង និងផ្ដល់សំណងសមស្របសម្រាប់អ្នកដំណើរ។

ដោយឡែក យោងតាមវីដេអូមួយខ្សែដែលបង្ហោះទៅក្នុងបណ្ដាញសង្គមហ្វេសប៊ុក បានបង្ហាញពីទិដ្ឋភាពទឹកធ្លាក់ពីអាងលើអគារកម្ពស់ខ្ពស់មកលើផ្លូវក្នុងទីក្រុង ខណៈពេលដែលគ្រោះរញ្ជួយដីវាយប្រហារ។ យ៉ាងណាមិញ ហេតុការណ៍នេះមិនបណ្ដាលឲ្យមនុស្សអ្នកបាត់បង់ជីវិត ឬរងរបួសនោះទេ៕