ពិសេសណាស់! ច្បាប់ថ្មីនឹងឱ្យម្ចាស់ឡាន រើសលេខតាមចិត្ត និងទុកលេខបាន ពេលលក់ចេញ
- 2019-04-24 08:03:31
- ចំនួនមតិ 0 | ចំនួនចែករំលែក 0
ពិសេសណាស់! ច្បាប់ថ្មីនឹងឱ្យម្ចាស់ឡាន រើសលេខតាមចិត្ត និងទុកលេខបាន ពេលលក់ចេញ
ចន្លោះមិនឃើញ
នាព្រឹកថ្ងៃទី២៤ ខែមេសា ឆ្នាំ២០១៩ នៅទីស្តីការក្រសួងមហាផ្ទៃ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក បានដឹកនាំប្រជុំពិនិត្យសម្រេចលើសេចក្តីព្រាងអនុក្រឹត្យស្តីពី៑ «ការចុះបញ្ជីផ្តល់បណ្ណសម្គាល់យានជំនិះ និងបំពាក់ផ្លាកលេខសម្គាល់យានជំនិះ»។
កិច្ចប្រជុំនេះ គឺក្នុងគោលបំណងដើម្បីពិនិត្យមើលជារួមទៅលើខ្លឹមសារនៃអនុក្រឹត្យនេះ ដើម្បីបូកសរុប និងកែសម្រួលនូវសេចក្តីព្រាងចុងក្រោយ មុននឹងដាក់ស្នើទៅរាជរដ្ឋាភិបាល ដើម្បីសុំការអនុម័តដាក់ប្រើប្រាស់ជាផ្លូវការ។ ក្នុងនោះ លក្ខណៈពិសេសបន្ថែមនៃខ្លឹមសារកែសម្រួលនៃអនុក្រឹត្យនេះ មានដូចតទៅ៖
១- លេខពិសេសផ្ទាល់ខ្លួនអនុញ្ញាតអក្សរឡាតាំង និងលេខមិនលើសពី៨ខ្ទង់ ដើម្បីផ្តល់ជម្រើសសម្បូរបែបជូនប្រជាពលរដ្ឋ
២- ម្ចាស់យានយន្តអាចរក្សាទុកលេខរថយន្តពេលដែលរថយន្តត្រូវបានលក់ និងផ្ទេរកម្មសិទ្ធិទៅឲ្យបុគ្គលទី២
៣- លេខពិសេសផ្ទាល់ខ្លួនមួយចំនួន នឹងត្រូវបានដាក់ដេញថ្លៃ ដើម្បីជំរុញការប្រមូលចំណូលមិនមែនសារពើពន្ធជូនរដ្ឋ។
សូមជម្រាបថា សេចក្តីព្រាងអនុក្រឹត្យស្តីពី៑ «ការចុះបញ្ជីផ្តល់បណ្ណសម្គាល់យានជំនិះ និងបំពាក់ផ្លាកលេខសម្គាល់យានជំនិះ» ត្រូវបានធ្វើការប្រជុំជាលក្ខណៈផ្លូវការជាមួយក្រសួងអង្គភាពពាក់ព័ន្ធចំនួន ៨លើករួចមកហើយ៕