ចាំអីទៀត ! ចូលរួមទាំងអស់គ្នា យុទ្ធនាការសម្អាតសំរាម នៅបរិវេណតំបន់ទេសចរណ៍ ភ្នំឧដុង្គ
- 2019-04-26 07:48:40
- ចំនួនមតិ 0 | ចំនួនចែករំលែក 0
ចាំអីទៀត ! ចូលរួមទាំងអស់គ្នា យុទ្ធនាការសម្អាតសំរាម នៅបរិវេណតំបន់ទេសចរណ៍ ភ្នំឧដុង្គ
ចន្លោះមិនឃើញ
ក្រុមអ្នកស្ម័គ្រចិត្តជាច្រើននាក់មកពីទីក្រុងភ្នំពេញ និងសហគមន៍ដែលនៅជុំវិញភ្នំឧដុង្គ ខេត្តកំពង់ស្ពឺ នឹងរួមគ្នាធ្វើការសម្អាតទ្រង់ទ្រាយធំនៅបរិវេណតំបន់ទេសចរណ៍ (ភ្នំឧដុង្គ) ដែលនឹងប្រព្រឹត្តិទៅនៅថ្ងៃទី ២៨ ខែមេសា ២០១៩ ខានស្អែក។ នេះបើយោងតាមសេចក្ដីប្រកាសព័ត៌មានរួមរបស់ កម្ពុជាបាល់អោប និង ក្រុមការងារហ្គូហ្គ្រីនខែមបូឌា ដែលបានផ្ញើមកកាន់អ្នកសារព័ត៌មាន Sabay នៅថ្ងៃនេះ។
យោងតាមសេចក្ដីប្រកាសដដែលបានឲ្យដឹងទៀតថា កម្មវិធីសម្អាតមួយនេះបានរៀបចំឡើងដោយមានការសហការជាមួយអង្គការកម្ពុជាបាល់អោប និងក្រុមការងារហ្គូហ្គ្រីនខែមបូឌា ដោយបានការឧបត្ថម្ភពី ធនាគារប្រិដ និងម្ចាស់ជំនួយជាច្រើនផ្សេងទៀត រួមទាំងការចូលរួមគាំពារពីក្រសួងបរិស្ថាន និងក្រសួងទេសចរណ៍។
កម្មវិធីខាងលើនេះមានគោលបំណងសំខាន់ គឺដើម្បីលប់បំបាត់សំរាមនៅទីតាំងទេសចរណ៍ អប់រំប្រជាពលរដ្ឋស្ដីពីការទុកដាក់សំរាម និងតួនាទីរបស់ពួកគេក្នុងកិច្ចការនេះ ក៏ដូចជាការលើកទឹកចិត្តប្រជាពលរដ្ឋឲ្យមានវប្បធម៌ថែរក្សាអនាម័យ និងបរិស្ថានស្អាត។
នៅក្នុងសេចក្ដីជូនដំណឹងក៏បានឲ្យដឹងទៀតថា ព្រឹត្តិការណ៍នេះរួមមានការសម្អាតផ្នែកខ្លះនៃផ្លូវជាតិលេខ៥ និងផ្លូវចូលភ្នំឧដុង្គ ជាពិសេសតាមផ្លូវឡើងរហូតដល់បរិវេណកំពូលភ្នំ និងជុំវិញវត្ត។
ចំពោះពេលវេលានៃការធ្វើដំណើរ គឺនឹងចេញដំណើរនៅម៉ោង ៦ព្រឹក ដោយចេញពីភ្នំពេញទៅកាន់ភ្នំឧដុង្គ បន្ទាប់មកមានកិច្ចបើកសន្ទរកថា ដោយប្រធានដឹកនាំ និងអ្នកតំណាងមកពីក្រសួងបរិស្ថាន និងទេសចរណ៍ នៅនឹងបរិវេណភ្នំ ក៏ដូចជាការបែងចែកក្រុមសម្អាត។ សកម្មភាពសម្អាតនិងចាប់ផ្ដើមនៅវេលាម៉ោង៨ព្រឹក និងបិទកម្មវិធីដោយម្នាក់ៗត្រូវត្រឡប់មកជួបជុំគ្នានាទីតាំងប្រារព្ធពិធី។
ក្នុងឆ្នាំ២០១៧ នៅប្រទេសកម្ពុជាមានសំរាម ១,៤២លានតោន និងដោយមានកំណើនប្រជាជនកាន់តែកើនឡើងសំរាមកាន់តែកើនឡើងនៅថ្ងៃខាងមុខ។
ផ្អែកតាមក្រសួងបរិស្ថានសំរាមស្ទើរតែ ៦០% មិនត្រូវបានគ្រប់គ្រងបានត្រឹមត្រូវ ក្នុងនោះ ១៥.៧៤% គឺជាសំរាមផ្លាស្ទិកដែលនៅរាយពាសវាលពាសកាលនៅលើផ្ទៃដី និងផ្លូវទឹក ដែលកំណើនបញ្ហានៃសំរាម និងការគ្រប់គ្រងនៃសំរាមបានក្លាយជាប្រធានបទសំខាន់មួយនៅក្នុងពេលបច្ចុប្បន្ននេះ៕
ស្វែងរកព័ត៌មានបន្ថែមតាម Link ខាងក្រោមនេះ៖
https://docs.google.com/forms/d/e/1FAIpQLScOzri4NZoFvgGg_EMcZIb7I74jYeI1s0lhHjpG_TeB1V9UQg/viewform
រូបថត៖ Page GoGreen Camboida